لە هێرشێکی چەکداریی دیکە لە پاکستان دەیان قوربانی لێکەوتەوە.

بەپێی ڕاپۆرتی میدیا ناوخۆییەكان گروپێكی چەکداران ئەمڕۆ پێنجشەممە لە ناوچەیەکی هۆزەکانی باکووری خۆرئاوای پاکستان تەقەیان لە ئۆتۆمبێلە نەفەر هەڵگرەکان کردووە و بەهۆیەوە لانیکەم 38 کەس گیانیان لەدەستداوە و 29 کەسی دیکەش برینداربوون.

بەرپرسانی پارێزگای خەیبەر پختونخوا ڕایانگەیاند، لەنێو کوژراوانی ئەم هێرشەدا کە لە ناوچەی عەشیرەتی کۆڕام ڕوویداوە، ژنێک و منداڵێکیش هەن.

تا ئێستا هیچ گروپێک و لایەنێك بەرپرسیارێتی ئەم هێرشەی لە ئەستۆ نەگرتووە.

دوو کاروانی ئۆتۆمبێلی نەفەر هەڵگر کە یەکێکیان سەرنشینیان لە پیشاوەری بەرەو پاراچنار هەڵگرتبوو و ئەوی دیکەیان لە ڕێگای بەرامبەردا بوو، لەلایەن کەسانی چەکدارەوە تەقەیان لێکرا.

ناوچەی پاراچنار كە زۆرینەی شیعەیە  هەمیشە ئامانجی هێرشە تیرۆریستییەکانی تەکفیری بووە و لە چەند ساڵی ڕابردوودا ڕووداوی خوێنڕشتن لەم ناوچەیەدا ڕوویانداوە.

 

 

 

گوڵان: سەردار خەلیل