گەنجێکی وڵاتی لیبریا کە 50,000 دۆلاری بە کاش بۆ خاوەنەکەی گەڕاندەوە  بوو بە "باڵیۆزی دەست پاكی"  هەروەها سەرۆکی لیبریاش وەك پاداشتێك پارەی مانگانەی بۆ دابین كرد و تێچووی كرێی خوێندنی ساڵانەی لە ئەستۆ كرد.

ئەو کوڕە تەمەن 19 ساڵە نزیکەی دوو هەفتە پێش ئێستا كە لەسەر ماتۆڕسکلێتێک بوو جانتایەکی پلاستیکیی دۆزییەوە کە 50 هەزار دۆلاری کاشی  تێدابوو، و ڕۆژی دوواتر پاش بیستنی داواکاریی خاوەنەکەی لە ڕادیۆ پارەکەی بۆ خاوەنەكەی گەڕاندەوە  كە ئافرەتێکی  بازرگانە.

ئەو بە پەیامنێری فەڕەنسای وت: هاوڕێکانم سەرسام بوون، پێیان وتم  تۆ گەمژەی چۆن پارەكە دەگەڕێنیتەوە، بەڵام خێزانەکەم فێری دزییان نەکردووم و پێویست بوو ئەو ئەمانەتە بگەڕێندرێتەوە بۆ خاوەنەكەی.

لیبریا یەکێکە لە هەژارترین وڵاتانی جیهان، نزیکەی نیوەی دانیشتوانەکەی لە هەژارییەکی زۆردا دەژین،  كەمیی ئیش و كار و گرانی و قەیرانی ئابووری توند دەرئەنجامی چەند ساڵێکی شەڕی ناوخۆی ئەم وڵاتەیە کە 5 ملیۆن کەسن.

بە پێی بانکی جیهانی، 44٪ ی خەڵكی لیبریا لە رۆژێکدا کەمتر لە 2 دۆلاری ئەمریكایان دەست دەكەوێت.

 

 

گوڵان: سەردار خەلیل