سندس عەلی، خانمێكی خاوەن پێداویستی تایبەتە و بە رووداوێكی نەخوازراو هەردوو قاچەكانی لەدەست داوە، بەڵام ئەو رووداوە نەبووەتە رێگر لەبەردەم بەدیهێنانی خەونەكانیدا و لەم دیدارەشیدا لەگەڵ گۆڤاری گوڵان جەخت لەوە دەكاتەوە كە بە گوڕ و تینەوە شەڕی سەركەوتن و بردنەوە لەگەڵ نەهامەتییەكانی ژیان دەكات.

 

گوڵان: كۆمەڵایەتی

سندس عەلی مامۆستای كۆلێژە و قوتابیی دكتۆرایە و وەك خۆی باسی دەكات جگە لە زمانی كوردی، زمانەكانی عەرەبی و ئینگلیزی زۆر بە باشی دەزانێت و شارەزاییەكی تەواوی لە بەرنامەكانی كۆمپیتەر هەیە، لە گۆڤار و رۆژنامەكانیش نووسین و شیعری بڵاوكراوەی هەیە، هەروەها پێنج كتێبی چاپ كراوە، كە بریتین لە:

1- بەرەو بەختەوەریی راستەقینە 2- ئەو ستەمانەی لە ئافرەت دەكرێت كێ لێی بەرپرسیارە؟ 3- لەگەڵمان سەركەوە (وەرگێڕانە)، ٤- چەند پرسیار و وەڵامێك بۆ زاحاوی مێشكی منداڵان ٥- كەسایەتیی ئافرەتی موسڵمان (وەڕگێڕانە). هەروەها پێنج توێژینەشی هەیە.

سندس عەلی كە مامۆستای كۆلیژی یاسای زانكۆی سەلاحەدینە، لە دیدارێكیدا لەگەڵ گۆڤاری گوڵان بەمجۆرە باسی قۆناغەكانی ژیانی سەر عەرەبانەكەی دەكات و دەڵێت: «هیوادارم ئەو كەسانەی كە دەستیان لە خۆیان بەرداوە، بەخۆیاندا بچنەوە و بەرگێكی نوێ لەبەر بكەن، بە پێویستی دەزانم خەڵك بە دیوە شاراوەكەی ژیانی من ئاشنا بن. ژیانی من هەر ئەوەندە نییە كە ئێستا دەمبینن مامۆستای زانكۆم، من بەبێ باب گەورە بووم، ئێمە حەوت خوشك و برا بووین، دایكم ئێمەی بە بێوەژنی گەورە كرد، كاتێك گوللەم بەركەوت بۆ ماوەی 17 ساڵ بە بێ ویستی خۆم لە خوێندن دابڕام، ئەو كات لە ماڵەوە دەرسی قورئان و زانستە شەرعییەكان و تەنانەت وانەكانی قوتابخانەشم بە كچانی گەڕەكەكەمان دەدا، ساڵانە 70 بۆ 80 قوتابیم هەبوو، بە خۆڕایی دەرسم پێدەگوتن، دوای 17 ساڵ بە تاقیكردنەوەی دەرەكی پۆلی سێی ناوەندیم بە پلەی یەكەم تەواو كرد، پاشان هەر لە رێگەی تاقیكردنەوەی دەرەكی شەشی وێژەییم دیسان بە پلەی یەكەم بڕی كە 99 م بە دەستهێنا، هەر چوار ساڵی كۆلیژ یەكەم بووم، لە خوێندنی ماستەریش پلەی یەكەمم بدەستهێنا، لە ماوەی ئەو 17 ساڵە لە رێگەی چنین داهاتی رۆژانەی خۆمم پەیدا دەكرد و تەنانەت هاوكاری ماڵەوەشم دەكرد، لە هەمان كاتیشدا بە حوكمی ئەوەی دایكم فەرمانبەر بوو، چاودێریی خوشك و براكانمم دەكرد و، هەموو كارەكانی ماڵەوەشم ئەنجام دەدا.» لە وەڵامی ئەو پرسیارەشدا كە چی بەو خانمانە دەڵێت كە هەوڵی خۆپێگەیاندن نادەن، یان لە یەكەم شكست تەسلیمی واقیع دەبن؟ لە وەڵامدا گوتی: «بەداخەوە ئافرەت لە كۆمەڵگەی ئێمە بە لاواز ناسراوە، زۆرجاریش هۆكارەكەی خودی ئافرەتە، چونكە زوو چۆك دادەدات و بڕیاری شكستی خۆی رادەگەیەنێت، خودای گەورە ئافرەتی وەك مرۆڤێكی تەواو دروست كردووە، راستە لایەنی عاتفی زاڵە بەسەریدا، بەڵام لە رووی رۆحەوە هێزی زۆر لە رەگەزی بەرامبەری زیاترە، لە رووی بەرەنگاربوونەوە هێزێكی لە راددەبەدەری هەیە، پێویستە ئافرەت وەبەرهێنان لە هێز و تواناكانی بكات و بە فیڕۆیان نەدات. بەداخەوە هەندێك جار ئافرەت زوڵم لە ئافرەت دەكات، كاتێك میرات دابەش دەكرا، دایكەكە پێشوەختە ئیعازی دەدا بە كچەكانی كە عەیبە میرات وەربگرن و پێویستە بەشەكەیان بدەنە براكانیان. بەڵام خوای گەورە ئافرەتی بێبەش نەكردووە، رووبەڕووی قورساییەكیشی ناكاتەوە ئەگەر توانای هەڵگرتنی نەبێت، (لَا يُكَلِّفُ اللَّهُ نَفْسًا إِلَّا وُسْعَهَا) لەبەر ئەوە ئافرەت دەتوانێت هەموو ناخۆشییەك تێپەڕێنێت و جارێكی دی هەڵبستێتەوە.»