پەرلەمانى كوردستان لە چوارەم كۆبوونەوەى نائاساییدا كە دوێنێ بەڕێوە چوو، بڕیارى دا كۆبوونەوەكەى بۆ ئێوارەى ئەمڕۆ دوا بخات، ماڵپەڕی سەرۆكایەتیی پەرلەمان گواستییەوە.

ئێوارەى دوێنێ سەعات 17:00 بەكاتى ناوەخۆ، پەرلەمانی كوردستان بەسەرۆكایەتی كەمال كەركووكی سەرۆكی پەرلەمان و ئامادەبوونی جێگری سەرۆكى پەرلەمان و سكرتێری پەرلەمان، دانیشتنی ژمارە 4 ی نائاساییی خولی سێیەمی هەڵبژاردن بەڕێوە برد.

سەرەتای دانیشتنەكە، سەرۆكی پەرلەمان بەرنامەی كاری خوێندەوە، كە برێتی بوو لە بەردەوامبوون لەسەر خستنەڕوو و گفتوگۆكردنی راپۆرتی لێژنەی تایبەت كە بەپێی بڕگەی 17ی بریاری پەرلەمان ژمارە 1ی ساڵی 2011 پێك هێنراوە بۆ بەدواداچوون و گوێگرتن لە داخوازی خۆپێشاندەران و خاڵەكەی تریش تایبەت بوو بەباری كەركووك و شوێنە كوردستانییە دابڕاوە جێ ناكۆكەكان.

دواتر لە كاتی خستنەڕووی خاڵی یەكەمی بەرنامەی كار، سەرۆكی پەرلەمانی كوردستان، رای گەیاند، بەهۆی ئەوەی لێژنە تایبەتییەكە و سەرۆكی فراكسیۆنەكان نەگەیشتوونەتە ئەنجامی كۆتایی لەسەر راپۆرتی لێژنەی تایبەتی بەدواداچوونی داخوازییەكانی خۆپێشاندەران، بۆیە دانیشتنەكە دوا دەخەین بۆ سەعات 17:00ی پاش نیوەرۆی رۆژى سێشەم.

لەبارەى رووداوەكەى دوێنێی نێوان هەردوو پەرلەمانتارەكەی لیستی كوردستانی و گۆڕانیش، سەرۆكی پەرلەمان گوتى، زۆر بەداخەوە لێك تێنەگەیشتن لە نێوان دوو پەرلەمانتار رووی دا، سەركۆنەى ئەو كارە ناشیرینانە دەكەین و داوامان كردووە ئیجرائاتی یاسایی بگیرێتە بەر و داواش دەكەین هەموو پێكهاتەكانی ناو پەرلەمان بەهەمان رۆحی جاران كاربكەن و كاری پەرلەمانیش دیالۆگ و گفتوگۆی هێمنانەیە، دەبێ لەسەر ئەو بنەمایە كار بكەین نەك بەپێچەوانەوە.

-ئاكانيوز