مەسرور بارزانی لەگەڵ بەرپرسی تیمی ئاوەدانكردنەوەی هەرێمی ئەمریكی لە كوردستان كۆ دەبێتەوە
لە سەرەتای دیدارەكەدا، ( ئەلێكس لاسكارەس ) سوپاس و پێزانینی تیمەكەیان پێشكەش كرد بۆ ئەو رۆڵە باشە و دیارەی كە دامەزراوەكانی ئاسایشی هەرێمی كوردستان گێراویانە لە پاراستنی سەقامگیری هەرێمی كوردستان و ئارامی و ئاسایشی هاوولاتیان و رەخساندنی دەرفەتێكی گونجاو بۆ پێشكەوتنی ئابوری و پرۆسەی دیموكراسی لە هەرێمی كوردستان.
لە تەوەرێكی دیكەی دیدارەكەدا، بارودۆخی گشتی هەرێمی كوردستان و ناوچەكە و بارودۆخی كەركوك و موسڵ و دوایین پەرەسەندنەكانی عێراق و ناوچەكە خرایە روو .
لە بارەی دۆخی ناوخۆی كوردستانەوە، بەرێز مەسرور بارزانی رایگەیاند (( پرۆسەی دیموكراسی هەرێمی كوردستان لە قۆناغی وەرچەرخاندایە و هاولاتیان مافی خۆیانە كە لە چوارچێوەی شەرعیەتی دامەزراوە دەستوریەكانی هەرێمی كوردستان و بە شێوازێكی ئاشتیانە، خواست و داخوازیەكانیان بۆ چاكسازی و خزمەتگوزاری زیاتر بە شێوازی مەدەنیانەی دوور لە توندوتیژی بخەنە روو . ))، هەروەها بەرێزیان رایگەیاند (( ئێمە رێز و پێزانینی زۆرمان بۆ ئەو جەماوەرە خۆشەویستەی خۆمان هەیە كە بۆ كوردستانێكی بەهێزتر و خزمەتگوزاری زیاتر، دوور لە ئاژاوە و توندوتیژی، خواستەكانی خۆیان دەخەنە روو بەلام رێگە نادەین بە ناوی خۆپیشاندانەوە هیچ كەس و لایەنێك یاسا پێشێل بكات و سەقامگیری و ئارامی ژیانی هاولاتیان تێك بدات .))
لە بارەی بارودۆخی كەركوكەوە ، بەرێز مەسرور بارزانی رایگەیاند (( بەشێك لە كۆنە بەعسی و تیرۆریستان و ئەو شۆڤینیانەی كە باوەریان بە عێراقی نوێ نیە و دژی مافە دەستوریەكانی هاولاتیانن، دەیانویست ژیانی هاولاتیانی كەركوك بخەنە مەترسیەوە و پەلاماری كورد و دامەزراوە حكومیەكان بدەن و خواستە بەعسی و شۆڤینیەكانیان زاڵ بكەن، لەم چوارچێوەیە دا بۆ پاراستنی سەروماڵی هاولاتیانی كەركوك و رێگەنەدان بە تیرۆریست و بەعسیەكان، بە بڕیاری سەركردایەتی سیاسی كوردستان هێزی پێشمەرگە نێردراوەتە دەوروبەری كەركوك تا بە هەماهەنگی لەگەڵ سوپای عێراق و پۆلیس شارەكە، ئارامی و سەقامگیری شاری كەركوك لە هەرەشەی تیرۆریستان و بەعسیەكان بپارێزن . )) .
