سه‌رۆكى هه‌رێمى كوردستان گه‌یشته قاهیره‌و له‌لایه‌ن به‌رپرسانى وه‌زاره‌تى ده‌ره‌وه‌ى میسر پێشوازى لێكرا
دواتریش سه‌ردانى باره‌گاى كۆمكارى عه‌ره‌بی كرد له قاهیره و له‌وێش له لایه‌ن عه‌مرو مووسا ئه‌میندارى گشتى و جێگر و ئه‌ندامانى كۆمكارى عه‌ره‌بییه‌وه پێشوازی لێكرا .
له كۆبوونه‌وه‌یه‌كدا باس له ره‌وشی عێراق و پرۆسیه‌ى سیاسی و په‌یوه‌ندیی هه‌ردوولا كرا، دواتریش له كۆنگره‌یه‌كى رۆژنامه‌نووسی هاوبه‌شدا وه‌ڵامى پرسیارى رۆژنامه‌نوسانیان دایه‌وه.
دواتر عامر موسا له كۆنگره‌یه‌كی رۆژنامه‌نووسیدا باسی كرد بارزانی سه‌رۆكی هه‌رێمی كوردستان سه‌ركرده‌یه‌كی كاریگه‌رو خاوه‌ن رۆڵی عێراق و ناوچه‌كه‌یه‌و وه‌ك ئه‌و شی كرده‌وه خۆی و كۆمكاری عه‌ره‌بی به سه‌ردانی سه‌رۆك بارزانی خۆشحاڵه.
سه‌باره‌ت به ئاراسته‌ی ووتوێژو راگۆرینه‌وه‌كانیشیان له‌گه‌ڵ سه‌رۆك بارزانی ، موسا روونی كرده‌وه كه هه‌ڵوێست و بۆچوونه‌كانی سه‌رۆك بارزانی بۆ ئێستا و ئاینده‌ی عێراق و ناوچه‌كه به‌لای خۆی و كۆمكاری عه‌ره‌بی گرنگ و بایه‌خدارن و ته‌ئكیدیشی له پرۆژه‌ی سیاسی سه‌رۆك بارزانی بۆ پرۆسه‌ی عێراقی تازه‌ی كرده‌وه كه شه‌راكه‌تی هاوبه‌شی نیشتمانی له عێراقێكی یه‌كگرتوو و فیدراڵی ناوه‌رۆكه‌كه‌ی بوو.
سه‌رۆكیش سه‌رله‌نوێ هه‌ڵوێستی هه‌رێمی كوردستانی بۆ ئێستا و ئاینده‌ی عێراق كه سه‌رخستنی پرۆسه‌ی دیموكراتی وڵاته‌كه‌ی دووپات كرده‌وه پێكهێنانی حكومه‌تێكی نیشتمانی بنكه فراوانیش كه تیایدا هیچ لایه‌نێك په‌راوێز نه‌خرێت وه‌ك زه‌رووره‌تێكی قۆناغه‌كه شیكرده‌وه .
له وه‌ڵامێكی پرسیارێكی كوردستان تی ڤیدا سه‌رۆك سه‌ردانه ره‌سمیه‌كه‌ی بۆ كۆماری میسر و ئامانج و ته‌وه‌ره‌كانی گفتوگۆكردنی له‌گه‌ڵ به‌رپرسان روون كرده‌وه .
له وه‌ڵامی رۆژنامه‌نووساندا سه‌رۆك بارزانی گوتی: ئه‌مه گۆرانێكی گه‌وره‌یه له ناوه‌ندی كۆمكاری عه‌ره‌بی به زمانی كوردی قسه بكه‌ین ، مانای ئه‌وه‌یه كه لێك تێگه‌یشتنێكی زۆر باش هه‌یه ئێستا ، له راستیدا سه‌ردانی من بۆ ئێره له‌سه‌ر داوه‌تی سه‌رۆكی كۆمكاری عه‌ره‌بیه و سه‌رۆكیش ده‌بینم وه هه‌موو به‌رپرسه‌كانیش ده‌بینم وه ئێستاش ئێمه پێشه‌كی له كۆمكاری عه‌ره‌بی له‌گه‌ڵ جه‌نابی عامر موسا دانیشتووین وه پێموایه ئینشاڵڵا ئه‌نجامه‌كه‌ی باش ده‌بێت و سوودی هه‌موو لایه‌كی تێدایه .
له وه‌ڵامی پرسیاری رۆژنامه‌نووساندا سه‌رۆك بارزانی له په‌یوه‌ندیه ئیقلیمیه‌كانی هه‌رێمی كوردستان دواو په‌یوه‌ندیه‌كانی ئێستای هه‌ولێر و ئه‌نكه‌رای به چاك و نموونه وه‌سف كردو سه‌ردانه‌كه‌ی ئه‌م دوایه‌شی بۆ توركیا به ده‌ستپێكی قۆناغێكی گرنگی په‌یوه‌ندیه‌كان كه تیایدا لێك تێگه‌یشتن و كاركردنی هاوبه‌ش بۆ به ئاشتی چاره‌سه‌ركردنی كێشه‌كان بنه‌ماكانی هه‌ڵسه‌نگاند .
سه‌باره‌ت به هه‌ولێر و تارانیش سه‌رۆك بارزانی وێرای سه‌رله‌نوێ پرۆته‌ستۆكردنی تۆپبارانه‌كانی ئێران له‌سه‌ر هه‌رێمی كوردستان ، هیواشی خواست زمانی هێزو توندوتیژی به‌لاوه بنرێت چونكه وه‌ك سه‌رۆك بارزانیش روونی كره‌وه هه‌موو به‌كارهێنانێكی هێز زیان به هه‌مووان و به به‌رژه‌وه‌ندیه‌كانی هه‌مووان ده‌گه‌یه‌نێت .
هه‌ر له كۆنگه‌ر رۆژنامه‌نووسیه‌كه‌دا باس له گرێدانی كۆبوونه‌وه‌ی لوتكه‌ی وڵاتانی عه‌ره‌بی كرا كه‌وا بریاره له عێراق به‌رێوه‌بچێت و له‌و رووه‌شه‌وه سه‌رۆك بارزانی ئاماده‌ی هه‌رێمی كوردستانی بۆ پێشوازی كردن و رێكخستنی كۆبوونه‌وه‌كانی لوتكه‌ی وڵاتانی عه‌ره‌بی له‌سه‌ر خاكی كوردستان جا هه‌ر كاتێك بێت نیشاندا.
شایه‌نى باسه دوێنێش به‌رێز مه‌سعوود بارزانی سه‌رۆكی هه‌رێمی كوردستان به سه‌ردانێكى فه‌رمى گه‌یشته عه‌مانی پایته‌ختی ئۆردن و به گه‌رمی له‌لایه‌ن شا عه‌بدوڵڵای دووه‌م شای ئۆردنه‌وه پێشوازی لێكرا.
له دیداره‌كه‌دا باس له چۆنیه‌تی به‌هێزكردنی په‌یوه‌ندی نێوان عێراق و ئۆردن له بواره جیاجیاكاندا كرا.
