ئیرۆ د گه‌ره‌كه‌ هن وه‌لاتێن ئه‌ره‌بیده‌ رێزدار مه‌سعوود بارزانی سه‌رۆكێ هه‌رێما كوردستانێ گهشته‌ عه‌مانا پایته‌ختا ئه‌رده‌نێ و ب گه‌رمی ژبال شاه عه‌بدوللایێ دویه‌م شاهێ ئه‌رده‌نێڤه‌ هاته‌ پێشوازیكرن .

ل گۆر نووچه‌یه‌كه‌ ئاژانسا نووچه‌یان یا ئه‌رده‌نێ ئیرۆ برێز شاه عه‌بدوللایێ دویه‌م شاهێ ئه‌رده‌نێ پێشوازی ل رێزدار مه‌سعوود بارزانی سه‌رۆكێ هه‌رێما كوردستانێ كر كو ئیرۆ ب سه‌ره‌دانه‌كێ گهشتیه‌ ئه‌رده‌نێ .
د هه‌ڤدیتنێده‌، ل سه‌ر تێكلی یێن براتی یێن نێڤبه‌را ئیراق و ئه‌رده‌نێ و چه‌وانی یا خورتكرنا وان د وارێن جودا ده‌ راوه‌ستیان .

د هه‌ڤدیتنێده‌ هه‌روه‌ها شا عه‌بدوللایێ دویه‌م پشتگری یا خوه‌ یا تام د سه‌قامگیركرن و بجهكرنا ته‌ناهی و ئارامی یا ئیراقێده‌ كو بنگه‌ها ته‌ناهی و بجهبوویی یا ده‌ڤه‌رێ یه‌ ته‌كه‌ز كر ، هه‌روه‌ها بریا رهاته‌ گرتن كو كونسلخانه‌یا ئه‌رده‌نێ ل هه‌ولێرا پایته‌ختا هه‌رێما كوردستانێ بێ ڤه‌كرن ـ ژبال خوه‌ڤه‌ سه‌رۆك بارزانی پشتگری یا به‌رده‌وام یا ئه‌رده‌نێ ژبۆ ئیراقێ د هن بیاڤ و ئالی یێن جودا ده‌ كو جهێ گرینگی یا هه‌ردو ئالیانه‌ ب تایه‌بتی مه‌كانیزما ئاكتیفكرنا هه‌ڤكاری یا دو قۆلی د وارێن ئابووری، بازرگانی و ره‌وشه‌نبیریده‌ ب بلنید نرخاند ـ پشتره‌ شاه عه‌بدوللایێ دویه‌م شاهێ ئه‌رده‌نێ ب ئاماده‌بوونا سه‌رۆك وه‌زیرێ ئه‌رده‌نێ سه‌میر رفاعی، سه‌رۆكێ دیوانا سه‌رۆكاتی یا پاشاتی یا هشامی ناسر لۆزی، شێوردارێ شاهێ ئه‌رده‌نێ ئه‌یمه‌ن سه‌فدی، وه‌زیرێ ده‌رڤه‌ ناسر جه‌وده‌، وه‌زیرێ پیشسازی و بازرگانی عامر حه‌دیدی، وه‌زیرێ ره‌وشه‌نبیری نه‌بیه شه‌قم و رێڤه‌به‌رێ گشتی یێن ئاگاهیان فه‌ریق محه‌مه‌د رقاد، مێهڤانداریه‌كه‌ نان خوارنێ ژبۆ رێزدرا مه‌سعوود بارزانی سه‌رۆكێ هه‌رێما كوردستانێ و شاندا پێره‌ ئاماده‌ كر ـ ب گه‌هشتنا خوه‌یا ژبۆ ئه‌مانێ سه‌رۆك بارزانی ل فرۆكخانه‌یێ ژبال ناسر جه‌وده‌ وه‌زیرێ ده‌رڤه‌ یێ ئه‌رده‌نێ هاتبو پێشوازیكرن .

تێ زانین به‌ری یا ده‌سپێكرنا گه‌را سه‌رۆك بارزانی ژبۆ ئه‌رده‌نێ، د راگهاندنه‌كێده‌ فوئاد حوسێن سه‌رۆكێ دیوانا سه‌رۆكاتی یا هه‌رێما كوردستانێ راگهاند: ئیرۆ رۆژا شه‌میێ سێی هه‌فتی دو هه‌زار و ده‌هێ سه‌رۆك بارزانی ته‌ڤی شانده‌كێ ده‌ست ب گه‌ره‌كه‌ ئه‌ره‌بی دكه‌ و ده‌سپێكێ ل سه‌ر وێ بانگا فه‌رمی یا برێز شاه عه‌بدوللا یێ دویه‌م شاهێ ئه‌رده‌نێ پێشكێشی سه‌رۆك بارزانی كریه‌، سه‌رۆك بارزانی به‌ر ب عه‌مانا پایته‌ختا ئه‌رده‌نا هاشمیڤه‌ دچه‌ .

فوئاد حوسێن هه‌روه‌ها گۆت: سه‌رۆكێ هه‌رێمێ و شاندا پێره‌ ل عه‌مانێ چه‌ندین ته‌وه‌رێن گرینگ و گرێدایی ره‌وشا نها یا قادا سیاسی یا ئیراقێ دگه‌ل برێز شا عه‌بدوللایێ دویه‌م شاهێ ئه‌رده‌نێ و به‌رپرسیارێن بلندێن ڤی وه‌لاتی به‌رچاڤ دكن و تێكلی یێن ئابووری و كولتووری یێن نێڤبه‌را هه‌رێما كوردستانێ و ئه‌رده‌نێ ژی گفتوگۆ دكه‌ .

د به‌رده‌واما راگهاندنا خوه‌ ده‌ سه‌رۆكێ دیوانا سه‌رۆكاتی یا هه‌رێما كوردستانێ گۆت: پشتی سه‌ره‌دانا فه‌رمی یا ئه‌رده‌نێ، سه‌رۆك بارزانی ل سه‌ر بانگا فه‌رمی یا سه‌رۆككۆمارێ مسرێ برێز محه‌مه‌د حوسنی موباره‌ك پێشكێشی رێزداری كربوو، دێ سه‌ری ل كۆمارا ئه‌ره‌بی یا مسرێ بده‌ و ل قاهیره‌یا پایته‌خت دگه‌ل برێز محه‌مه‌د حوسنی موباره‌ك و به‌رپرسیارێن وی وه‌لاتی پرس و مژارێن جۆر بجۆر یێن گرێدایی ره‌وشا ئیراقێ و ده‌ڤه‌رێ ب گشتی گفتوگۆبكه‌ .

د داوی یا راگهاندنێده‌ سه‌رۆكێ دیوانا سه‌رۆكاتی یا هه‌رێمێ هه‌روه‌ها خوه‌یا كر د چارچۆڤه‌یا سه‌ره‌دانا خوه‌یا قاهیره‌یێده‌، رێزدار مه‌سعوود بارزانی ته‌ڤی برێز عه‌مر مووسا سه‌كره‌ته‌رێ گشتیێ كۆماكارا ئه‌ره‌بی دجڤه‌ و چاڤ ب هه‌ژماره‌كه‌ نوونه‌رێن وه‌لاتێن ئه‌ره‌بی یێن ئه‌ندام د كۆمكارا ئه‌ره‌بی ده‌ دكه‌ڤه‌ .

تێ زانین د رێوره‌سما برێخستنا سه‌رۆك بارزانیده‌ ل فرۆكخانه‌یا هه‌ولێرێ، دكتۆر به‌رهه‌م ئه‌حمه‌د سالح سه‌رۆكێ حوكوومه‌تا هه‌رێما كوردستانێ و مه‌سروور بارزانی سه‌رۆكێ ئاژانسا پاراستنا ئاساییشا هه‌رێما كوردستانێ ئاماده‌ بووبوون .
هێژایی گۆتنێ یه‌ شاندا كو د ڤان هه‌ردو سه‌ره‌دانێن فه‌رمیده‌ ب سه‌رۆكێ هه‌رێما كوردستانێ ره‌ یه‌، پێكهاتیه‌ ژ فوئاد حوسێن سه‌رۆكێ دیوانا سه‌رۆكاتی یا هه‌رێما كوردستانێ، كاوه‌ مه‌حموود وه‌زیرێ ره‌وشه‌نبیری و فه‌لاح مسته‌فا به‌رپرسیارێ فه‌رمانگه‌ها تێكلی یێن ده‌رڤه‌ یا حوكوومه‌تا هه‌رێمێ و هێرش محه‌ره‌م سه‌رۆكێ ده‌سته‌یا به‌رهه‌مانینێ یا حوكوومه‌تا هه‌رێمێ و هه‌ژماره‌كه‌ شێورداران .
-Ktv