به‌زۆرینه‌ی ده‌نگ حسابی ختامی حكومه‌تی هه‌رێم بۆ ساڵی 2009 په‌سند كرا
سه‌ره‌تای دانیشتنه‌كه سه‌رۆكی په‌رله‌مانی كوردستان به‌رنامه‌ی كاری خوێنده‌وه، كه 2خاڵ بوو، خاڵی یه‌كه‌م بریتیبوو له‌خستنه‌روو گفتوگۆكردنی حسابی ختامی حكومه‌تی هه‌رێم بۆ ساڵی 2009، خاڵی دووه‌میش خستنه‌روو گفتوگۆكردنی پرۆژه یاسای وه‌زاره‌تی بازرگانی وپیشه‌سازی بوو.
پاشان له‌سه‌ر داوای سه‌رۆكی په‌رله‌مان، لیژنه‌ی دارایی وئابووری په‌رله‌مان پێشنیازو سه‌رنجی لیژنه‌كه‌یان وحسابی ختامی له‌چوارچێوه‌ی راپۆرتێكدا پێشكه‌شی په‌رله‌مانتاران كرد، كه‌تێیدا چۆنیه‌تی زیاده‌رۆیی وكورتهێنان له‌سێكته‌ری بودجه‌ی به‌كارخستن \"ته‌شغیلی\"" وخه‌رجی فیعلی سێكته‌ری وه‌به‌رهێنانی له‌بودجه‌ی ساڵی 2009دا روونكراوه‌ته‌وه.
دواتر ده‌رگای گفتوگۆ به‌رووی په‌رله‌مانتاران كرایه‌وه‌و چه‌ندین بوچوون وسه‌رنج له‌باره‌ی راپۆرته‌كه‌ی لیژنه‌ی دارایی خرایه‌روو، له‌لایه‌ن وه‌زیری دارایی ولیژنه‌ی داراییه‌وه وه‌ڵامی سه‌رجه‌م تێبینی وسه‌رنجه‌كان درانه‌وه.
دواتر سه‌رۆكی په‌رله‌مان راپۆرتی لیژنه‌ی دارایی، كه پێشنیازو سه‌رنجی لیژنه‌كه‌و حسابی ختامی له‌خۆ گرتبوو وه‌كو خۆی خسته به‌رده‌م په‌رله‌مانتاران وبه‌زۆرینه‌ی ده‌نگ په‌سندكرا.
دوابه‌دوای په‌سندكردنی راپۆرته‌كه، وه‌زیری دارایی سوپاسی په‌رله‌مانی كردو به‌ڵێنیدا ساڵی داهاتوو راپۆرتی حسابی ختامی به‌جۆرێك بێت تێبینی په‌رله‌مانتاران كه‌متر بكاته‌وه.
دواتر سه‌رۆكی په‌رله‌مان، دانیشتنه‌كه‌ی دواخست بۆ سه‌عات 5ی ئێواره‌ی ئه‌مرۆ، بۆ به‌رده‌وامبوون له‌سه‌ر خاڵی دووه‌می به‌رنامه‌ی كار، كه‌تایبه‌ته به‌گفتوگۆكردنی پرۆژه یاسای وه‌زاره‌تی بازرگانی وپیشه‌سازی.
"
