حكومه‌تى هه‌رێمى كوردستان وێرِای ده‌ربرِینی نیگه‌رانی توندی خۆی، ئیدانه‌ی ئه‌و ‏په‌لامارانه‌ ده‌كات كه‌به‌م دوایه‌ پارتى كرێكارانى كوردستان له‌ ناوچه‌ى شه‌مزینان ‏ئه‌نجامیدا، دوپاتیشی ده‌كاته‌وه‌ ئه‌و جۆره‌ كرده‌وانه‌ خزمه‌تى دۆزی كورد ناكه‌ن، ‏به‌ڵكو بارودۆخه‌كه‌ ئاڵۆزتر ده‌كه‌ن و كۆسپیش ده‌خه‌نه‌ به‌رده‌م هه‌وڵه‌كانى گه‌یشتن ‏به‌ چاره‌سه‌رى ئاشتیانه‌و ده‌ستپێشخه‌رى كرانه‌وه‌ى دیموكراتى، كه‌ده‌رفه‌تێكى ‏گونجاوه‌ بۆ چاره‌سه‌ركردنى كێشه‌كان، چونكه‌ به‌توندوتیژى كێشه‌كان چاره‌سه‌ر ‏نابن.‏

‏ له‌ هه‌مانكاتدا داوا له‌ توركیاى هاوسێ ده‌كه‌ین كه‌بۆردومانى خاكى هه‌رێمى ‏كوردستانی عیراق رابگرێت، چونكه‌ چاره‌سه‌ركردنى كێشه‌ ئه‌منیه‌كان له‌سه‌ر سنور، ‏پێویسته‌ له‌ رِێى هه‌ماهه‌نگى وهاوكارى هاوبه‌شی نێوان حكومه‌تى عیراق به‌ ‏حكومه‌تى هه‌رێمى كوردستانه‌وه‌ له‌گه‌ڵ حكومه‌تى توركیا و له‌سه‌ر بنه‌ماى ‏رێزگرتن له‌ شه‌رعیه‌تی نێوده‌وڵه‌تی بێت. بۆیه‌ حكومه‌تى هه‌رێمى كوردستان دژی ‏به‌كارهێنانی خاكی هه‌رێمه‌ بۆ هێرشكردنه‌ سه‌ر وڵاتانی دراوسێ، پابه‌ند بوونی ‏خۆشی به‌ به‌رژه‌وه‌ندیه‌ هاوبه‌شه‌كانى له‌گه‌ڵ وڵاتانى دراوسێ و ده‌ست وه‌رنه‌دان له‌ ‏كاروبارى ناوخۆى یه‌كتر و رِێزگرتن له‌سه‌ره‌وه‌رى وڵاتانى دراوسىَ گرتنه‌به‌رى ‏رێگه‌چاره‌ی دیموكراتیانه‌ بۆ چاره‌سه‌ركرنى كێشه‌كان دوپات ده‌كاته‌وه‌.‏