هۆكار و ئاسەواری پێشێلكارییەكان بەرامبەر رۆژنامەنووسان
November 13, 2019
وتار و بیروڕا
1. یاساكان و جێبەجێنەكردنیان و كاركردن بە یاسای دیكەی نزیك لە یاساكانی رۆژنامەگەری و یاساكانی سزادانی عێراقی، بە نموونەی یەكێك لە دەستكەوتە گرنگەكانی هەرێمی كوردستان و سەندیكای رۆژنامەنووسانی كوردستان دادەنرێت، دەرچوواندن و بوونی یاسای ژمارە ٣٥ رۆژنامەگەریی ساڵی ٢٠٠٧ تا راددەیەكی باش ئازادیی بۆ رادەربڕین و كاری رۆژنامەگەری فەراهەم كردووە، بەڵام بەداخەوە زۆرجار دادگاكان (بە مەبەست، یان بێ مەبەست) پەیڕەوی ناكەن، لەلایەكی دیكەوە یاسای دیكەی وەك خراپ بەكارهێنانی ئامێری ئەلیكتڕۆنی بە هۆی بڵاوكردنەوەی بابەت و نووسینەكانی رۆژنامەنووس لە سایت و پەیجەكان، بیانووی داوە بە دەست دادگاوە، كە لە یاسای ژمارە ٣٥ ـەوە بڕوات بۆ كاركردن بە یاسای خراپ بەكارهێنانی ئامێری ئەلیكتڕۆنی.
2. جیاكاری لە پێدانی زانیاری و جێبەجێنەكردنی یاسای مافی بەدەستهێنانی زانیاری و واڵا نەبوونی سەرچاوەكانی زانیاری لە بەردەستی رۆژنامەنووسان بۆ دەستخستنی زانیاری و جیاكاری لە نێوان كەناڵەكان لە پێدانی زانیاری بە پەیامنێرەكانیان، كە ئەمە رۆژنامەنووس دەخاتە بەردەم دوو بەرداشی گوشاری دەزگاكەی بۆ بردنەوەی زانیاری و دەوڵەمەندكردنی راپۆرتەكەی، لەلایەكی دیكەوە شەڕ لەگەڵ سەرچاوەی زانیارییەكە بۆ دەستخستنی زانیاری كە دواجار رۆژنامەنووسەكە دەبێتە قوربانی.
3. ژینگەی میدیاییمان ژینگەیەكی سیاسیی حزبییە و زۆربەی كات رۆژنامەنووس دەبێتە ئامانجی لایەنی بەرامبەر نەیاری پارتەكەی، یان كەناڵەكەی كە كاری بۆ دەكات، لە كاتێكدا لەم هەرێمەدا بارودۆخی رۆژنامەنووس لە ئاستێكی باشدا نییە و رۆژنامەنووسەكان زۆربەیان بە مووچەیەكی كەم، یان خۆبەخش، یان بۆ دەستكەوتنی بژیوی ژیان كاردەكەن و بەشێك نین لە ململانێكان، بەڵام دووبارە باج و قوربانیی ململانێی پارتەكەی، یان كەناڵەكەی، ئەو دەیدات.
4. نەبوونی پێداویستییەكانی سەلامەتیی كاركردن لە جلوبەرگ و كڵاو و پێڵاوی تایبەت و كەلوپەلەكانی پاراستن لە گوللە و گازە بەكارهاتووەكانی ناو ژینگەی ململانێ و جەنگەكان.
5. نائاگابوونی رۆژنامەنووس بە یاسا و شوێنەكانی وەك ناوچەكانی درەوەی هەرێم و پارچەكانی دیكەی كوردستان، زۆرجار رۆژنامەنووسی كوردی دەزگاكانی هەرێمی كوردستان بۆ رووماڵ دەچنە ئەو ناوچانەی شارەزاییان تێیدا نییە، بۆیە یان دەگیرێن، یان بریندار دەبن، یانیش دەكەونە ناوچە مەترسیدارەكان و شوێنە لوغمڕێژكراوەكان.
6. پڕۆفیشاناڵبوون لەوەی كە رۆژنامەنووس بەردەوام پێویستی بە خول و راهێنان هەیە، تا ئاگادار بێت بە تەكنیكی نوێ و یاسا تازە دەرچووەكان و ماف و ئەركی خۆی لە كاتی رووماڵ و ژینگەی رووداوەكان بزانێت، كە ئەمەش تا راددەیەك لەم هەرێمە لە ئاست پێویستدا نییە و كەناڵ و دەزگاكان بە بەشێك لە ئەركی خۆیانی نازانن بەرامبەر رۆژنامەنووسان.
7. كەمیی هەماهەنگیی لایەنە پەیوەندیدارەكانی وەك دەزگا ئەمنییەكان و رانەهێنان و نەناساندنی پۆلیس و ئەو هێزانەی كە ئەركی كۆنتڕۆڵكردنی ژینگەی رووداوەكانیان هەیە بە ماف و ئەركەكانی خۆیان و چۆنێتیی مامەڵەكردن لەگەڵ رۆژنامەنووس لە ژینگەی رووداوەكان.
ئاسەوارەكانی بەردەوامیی ئەم پێشێلكارییانە:
1. مەترسی بۆ سەر ئازادیی رادەربڕین و فەرامۆشكردنی یاسای ژمارە ٣٥ هەیە كە دەستكەوتێكی گرنگی هەرێمی كوردستانە.
2. پاشەكشەی رۆژنامەنووس لە هەندێك كار و چالاكی.
3. زۆربوونی كەیسی رۆژنامەنووسان لە دادگاكان و زیندانەكان و بەرزبوونەوەی رێژەی پێشێلكارییەكان لە راپۆرتی پێشێلكارییەكانی سەندیكای رۆژنامەنووسان، كە ئەمە بە خاڵێكی لاواز دەكەوێتەوە بۆ هەرێمەكەمان و هەروەها ئیحراجبوونی سەندیكای رۆژنامەنووسانی لێ دەكەوێتەوە لە بەردەم رۆژنامەنووسەكاندا.
4. بواردان بۆ دەستی دەرەكی و بواردان بە ئەو كەسانەوە كە دەیانەوێت لە رێگەی میدیا و كێشەكانی رۆژنامەنووسەوە ئەم هەرێمە لەكەدار بكەن و پشێوی دروست بكەن .
ئەمانەو رەنگە هۆكار و ئاسەواری زۆرتر هەبێت كە من ئاماژەم پێ نەدابن.