هەواڵەكان خۆش دێنەگوێ، جوڵە سیاسییەكانی هەرێم كێرڤ و هەنگاوەكانی رووەو هەڵكشانەو بە بەردەوامی و بێ هەدادان رووبەری گەمە عەقڵانییەكانی خۆی فراوانتر دەكات، ئەو هەرێمەی چەند مانگ و ساڵێك بەر لە ئێستا لە چەندین لاوە (سیاسی- ئابووری- زەمینی- ئاسمانی) گەمارۆ درابوو، خەریكە دەبێتەوە چەقی كۆكردنەوەی لایەنە دژەكانی عێراق و ناوەندی بڕیاردان لەسەر ئایندە و سەقامگیری سیاسیی ناوچەكە بەگشتی. هەموو ئەوانەی كە پێشیان وابوو هەرێمی هەوارو مەڵبەندو باوەش غەریبانی شەڕی تائیفی و داعش دەخەنەوە چوارچێوەی جوغزو تونێلی تەنگی عێراق هێز، لەخەونی خۆش بەخەبەر هاتن. نەك هەر ئەمە، بەڵكو پێشبینی ئەوەش دەكرێت لە ئایندەیەكی نزیكدا گەرمی بگەڕێتەوە بۆ ڕەگە سڕبووەكانی سیستەمی ئابووری و گۆڕانكاریش بەسەر ژیانی گوزەرانی خەڵكدا بێت، ئاخر ئەوانەی دەیانویست كوردستان بكەنە ئاشی ئاو لێ بڕاو بە مەنتقی هێز هەموو شتێك بۆ خۆیان مەیسەر بكەن، تێگەیشتن كە كوردستان بە كولتووری خۆڕاگری و هێزی مەنتق وڵامی دانەوە لە پشت هەموو ئەو بەرەوپێشچوون و ئایندە ئومێدبەخشە عەقڵێكی هێمنی سیاسی و وردبین و كارامە هەیە، پیاوێك كە پێی وایە لێبووردەیی تۆڵەیەكی نەرمە لە دوژمن و پیاوێك كە ئێستا سەرۆك وەزیرانی هەرێمی كوردستانەو هەر ئەو پیاوە ماوەیەك بەر لە ئێستا پێی گوتم: خۆشی و ناخۆشی وەكو دەستی راستەو چەپ وایە، مرۆڤ دەتوانێت سوود لە هەردووكیان وەربگرێت، پێی گوتم: دیموكراسیەت ئەوەیە كەوا كەس شەرعییەتی بەكارهێنانی هێزی لەكایەی ململانێدا نەبێت. گوتی: مرۆڤ دەبێت بەهێزیی خۆی لەكاتی بێهێزی و بێهێزیی خۆشی لەكاتی بەهێزی نیشان بدات، ئێمە بە هێزی مەنتق وڵامی مەنتیق هێز دەدەینەوە، لەو سەفەرەی كە بۆ دەرەوەی وڵاتیش لەگەڵ بەڕێزیاندا بووم، دەمبینی كە سەرۆكی وڵاتان و نوخبەی رۆشنبیری ئەو وڵاتانە كە چۆن وەكو كەسێكی هەیبەت و شكۆ لێیان دەڕوانی و سیمای سەرۆكی وڵاتیان لە سیمای رێزدار نێچیرڤان بارزانی سەرۆكی حكومەتی هەرێمی كوردستان وێنادەكرد، هەڵبەت ئەو هەموو پێشوازی و لەبەرچاوگرتنی پێگەی سیاسی و كەسایەتی ئەو، ئەوەمان پێ دەڵێت كە كوردستان و پێگەی جوگرافی سیاسی و واقیعی كوردستان ئەوەیە، كە ئێستا وڵاتانی هەرێمایەتی و ئەوروپا لێی دەڕوانن، نەك وەك ئەوانەی كە خۆیان چۆنیان دەویست، ئاوا وێنای سیاسی و مەعنەوی هەرێمی كوردستانیان دەكرد.
لە زانستی قسەدا وتەیەكی باو هەیە، دەڵێت: بەتەنیا گرنگ نییە چی دەڵێیت، بەڵكو گرنگیشە چۆن دەیڵێیت، هەروەها گرنگی تەنیا لە ناوەڕۆكی قسە نییە، بەڵكو لەو كاریگەرییەشە كە قسە لەسەر لایەنی بەرامبەر دایدەنێت، لەسەر زانستی دیپلۆماسیەتیش وتەیەك هەیە، دەڵێت: یەكێك لە خەسڵەتە دیارەكانی زانستی دیپلۆماسی راگرتنی لایەنی بەرامبەر لەسەر نوكی بێ، راستیشە هەموو جۆرە وتووێژ و دان و ستانێك بە مانای دان و وەرگرتنەو بەشێكی گەورەی سەركەوتنی هەر جووڵەیەكی دیپلۆماسیشی تا رادەیەكی زۆر بەندە بەو خەسڵەتە كە لە میانەی خەباتی دیپلۆماسی پەیڕەوی لێ دەكرێت، بەڵام زۆرجاریش هەیە مەنتقی قسەو پاراوی زمانی دەربڕین و بەهێزی كەسایەتی مەعنەوی سەركردەی سیاسی، تا رادەیەكی زۆر دەتوانێت دەرەنجامی وتووێژو كۆبوونەوەو كایەی دیپلۆماسی بە ئاقاری قەناعەت و بەرژەوەندییە سیاسییەكانی خۆیدا ببات. سەرۆك حكومەت بە رەچاوكردن و پراكتزەكردنی و كۆكردنەوەی هەموو ئەو خەسڵەتانە لەخۆیدا، بەردەوامە لەسەر چالاكی و گەشتە دیپلۆماسییەكانی خۆی، دڵنیاشم لە ئایندەیەكی یەكجار نزیكدا گەل و نیشتمانەكەمان لە سەرجەم بوارەكاندا بەرەنجامی ئەو خەبات و ماندووبوونەی سەرۆك دەبینی.