بەڵێ مەترسی جددیمان لەسەرە، بەڵام ئەگەر ریفراندۆم نەكەین و دوایخەین، نەك ئەگەر لە وادەی خۆیدا بیكەین..
بیرتان دێ كەی پەلاماری سەختی سەدام بۆ سەر كوردستان و پێشمەرگە دەستیپێكرد، ئەو دەمە بوو كە شەڕی عێراق ئیران كۆتایی هات و جەیش و حەرەس جمهوری دەست ئاوەڵابوون و رویان بەرەو كوردستان وەرچەرخاند.
ئێستا و ئەوكات لە روویەكەوە جیاوازن، بەڵام لە رویەكی دیكەشەوە زۆر لێك دەچن . وا موسڵ گیرایەوە و شەڕی دەوڵەتی خەلافەتی سوونە كۆتایی هات. ئەمرۆ لە بەغدا هاوشێوەی كۆتایی شەڕی قادسیە، (ئیحتیفالاتی نەصری كەبیر) دەستپێكرا. پۆست بەعسییەكانی بەغدا بە بەهانەی شەڕی داعش، جگە لە سوپایەكی پڕچەك، بوونە خاوەنی حەرەس مەزهەبیی (حەشدی شەعبی) كە لە حەرەس جمهوری وەحشیترن و و لە سایەی تەفرەقەو خۆخۆریی كورد، شەرعییەتیان بۆ وەرگرت. شەقامی عەرەبی عێراقی لە جاران مەشحونترە دژی كورد. جاران بە دافعی قەومی، ئێستا بە دافعی قەومی و مەزهەبیش دژی كوردن.
كەركوك لە بن سێبەری پیشمەرگەیە، ئەوان بە خاكی داگیركراوی عەرەبی دەزانن، سبەی كە دەپەرژێنەوە سەرخۆیان، دەمانخەنە بەردەم دوو ئیختیار: یان كشانەوە یان شەڕ. گەر بكشێینەوە، ناهێڵن لە سلێمانی و هەولێریش خۆمان بگرینەوە، گەر نەشكشێینەوە شەڕێكی دیكەی خوێناوی هەڵدەگیرسێ. (كاتێ سەرۆك بارزانی دەڵێ: ریفراندۆم و سەربەخۆیی كوردستان رێگرە لە شەڕێكی دیكەی سەخت و خوێناوی، دەزانێ چ دەڵێ).
بە مانایەكی دیكە ئەگەر كورد دەست وبرد نەكات و هەرچی زووە بەرەو پێشەوە هەنگاو نەنێ و ئەم قۆناغە هەستیار و مەترسیدارە جێنەهێڵێ، مەحاڵە بتوانێ وەزعی راهین و دەسكەوتەكانی ئێستای بپارێزێ. دەمانگەڕێننەوە بۆ چوار گۆشەی یەكەم و ئەبینەوە بە (شیمالی حەبیب).
بە كورتی: ئەگەر سەربەخۆ نەبین، فیدرالییەكەشمان فت .
تا ئەو كاتەی حەشد و پۆست بەعسیزمی نوێی عێراقی خۆ كۆدەكەنەوە و هەڵدەكوتنە سەرمان، دەبێ ئێمە ریفراندۆممان كردبێ و لەم (بۆسەیە)دا نەمابین و لەشەقەی باڵمان دابێ. دەبێ تا ئەوكاتە (سەروەری)مان بەدەست هێنابێ و تاپۆی ئەم خاكەمان خستبێتە سەر ناوی خۆمان، جگە لە سەروەری و یاسای نێودەوڵەتی كە سنور و سەروەری ووڵاتان دەپارێزێ، هیچ لەمپەڕێك لەبەردەم پۆست بەعسیزمی عێراقیدا نییە بۆ ئەوەی جارێكی دیكە بە ناوی پاراستنی سەروەریی نیشتمانی و پەكپارچەیی خاكی عێراق، بمانخاتەوە ژێر ركێفی و بمانكاتەوە بە رەعیەتی سەركوت وگوێڕایەڵ.
هەڵبژاردنی مانگی ئەیلول و پێداگیری سەرۆك لەسەر ئەو وادەیە و دوانەخستنی، لەبەرامبەریشدا هەڵپە و هات و هاوار و فشاری سەختی ئیران و توران وئەوانەی نێوخۆش بۆ (دواخستنی وادەی ریفراندۆم)، كێشمەكێشی چارەنوسسازی نێوان مان و نەمانی كوردە. یا لەو وادە هەستیار و (وقت الضائع)ەدا گۆڵی خۆمان دەكەین و بۆ هەتا هەتایە تاجی سەركەوتن و سەقامگیری لەسەر دەنێین. یان بۆ هەتا هەتایە شتێك بە ناوی كورد و دۆسییەی كورد و مافی كورد لە وجوددا نامێنێ.