گەلی كوردستان بەدرێژایی مێژوو لە تێكوشان و بەرخوداندا بووە، سەرەڕای هەوڵەكانی لەناوبردنی گەلی كوردستان بە خاك و خەڵكەوە، بەڵام توانیویەتی پارێزگاری لە بوونی خۆی بكات و رووبەڕووی هێرش و پەلاماری دوژمنان و داگیركەران ببێتەوەو دوای هەر كەوتنێك بە گڕوتینێكی نوێوە هەڵسێتەوە.
كورد وەك نەتەوەیەكی زیندووی رۆژهەڵاتی ناڤین لە رابردوودا رۆڵێكی كارای گێڕاوە لە بیناكردنی شارستانییەتی ناوچەكەدا، بەدڵنیاییەوە ئەگەر بواری پێبدرابایە، ئێستا دەیتوانی رۆڵێكی كاراتر ببینێت لە بیناكردنی كۆمەڵگەیەكی مۆدێرن و دیموكرات لە رۆژهەڵاتی ناڤینداو دەیتوانی نموونەیەكی زیندووی حوكمڕانی و پێكەوەژیان پێشكەشی هەموو جیهان بكات، بێگومان ئەمەش ئەو كاتە دەبێت كەوا گەلی كوردستان سەربەخۆو خاوەن دەوڵەتی خۆی بێت.
سەربەخۆبوونی كوردستان كەوا بابەتی گەرمی ئێستای میدیا جیهانی و ناوچەیی و ناوخۆییەكانەو بۆتە جێی بایەخ و لێكۆڵینەوەی ناوەندە سیاسی و ئەكادیمییەكانی جیهان، وایكردووە كەوا دۆستمان زێدە بن و بەچاوی هیواوە لێمان بڕوانن. لەسەر ئێمەی گەلی كوردستان و سەركردایەتی سیاسی كوردستانە كەوا بە بایەخەوە لە و پشتیوانییە بڕوانین و ئەو هەلە لەدەست خۆمان نەدەین و بە هەموو لایەكمان و بە هاوبەشی كار بۆ سەربەخۆیی كوردستان بكەین و بیكەین بە پرسێكی نەتەوەیی و نیشتمانی، بۆئەم مەبەستەش پێویستە بە زووترین كات ناوەندی سیاسیی كوردستان رێكبخرێتەوە و لەو پەرشی و بڵاوییە دەرباز بكرێت و (ئەنجومەنی سیاسیی كوردستان) پێكبهێنرێت و تەواوی لایەنە سیاسییەكانی كوردستان بگرێتەخۆ.
پێكهێنانی (ئەنجومەنی سیاسیی كوردستان)؛ دەبێتە فاكتەرێكی بەهێز بۆ یەكڕیزی و یەكدەنگیی گەلی كوردستان و كۆكردنەوە و یەكخستنی توانا سیاسییەكانی گەلی كوردستان و، سەرەتایەك دەبێت بۆ خاوكردنەوەی گرژییە سیاسییەكان و كۆتاییهێنان بە ململانێی نێوان لایەنە سیاسییەكان و دەبێتە مینبەرێكی سیاسیی بەهێزو مۆراڵ بەخش لەسەر ئاستی ناوخۆ و دەرەوە.
دوای پێكهێنانی (ئەنجومەنی سیاسیی كوردستان)؛ پێویستە سەركردایەتی سیاسیی كوردستان (بۆردی سەربەخۆیی كوردستان) پێكبهێنێت، بۆئەوەی ئەم بۆردە بتوانێت كارنامەیەكی گشتگیر دابڕێژێت بۆ چۆنیەتی كاركردن بۆ ئەنجامدانی ریفراندۆم و هەنگاونان بەرەو سەربەخۆیی كوردستان، بێگومان بۆ ئەمەش دەكرێ سوود لە ئەزموونی زۆر لە میللەتان و وڵاتان وەربگیردرێت، كەوا چۆن كاریان كردووە بۆ راگەیاندنی سەربەخۆیی خۆیان.
پێویستە پێكهاتەی (بۆردی سەربەخۆیی كوردستان)؛ بریتی بێت لە كەسانی شارەزا لە یاسا نێودەوڵەتییەكان و كەسانی ناسراوو كاریگەری كورد و بیانی كەوا ناسراو بن لەسەر ئاستی نێودەوڵەتی؛ بۆئەوەی بتوانن لەسەر ئاستی جیهان و لە ناوەندە بڕیاربەدەستەكان، لۆبی بۆ سەربەخۆیی كوردستان بكەن، كەسایەتی وابن كەوا خودان ئەزموون و بەدەسەڵات بن بۆ ئەوەی گوێیان لێبگیردرێت، لەم رووەوەش دۆستی زۆر باشمان هەن.
پرسی (سەربەخۆیی كوردستان)؛ پرسێكی نەتەوەیی و نیشتمانییە، نەك پرسێكی حزبی، بۆیە پێویستە تەواوی لایەنە سیاسییەكان و پێكهاتە نەتەوەیی و ئایینییەكانی كوردستان لەم پرسەدا راوێژیان پێبكرێت و گوێیان لێبگیرێت و بۆچوونەكانیان بەهەند وەربگیردرێت، ئەمەش وادەكات كەوا ئەم پرسە ببێتە پرسێكی میللی و هەموو لایەك ئەم پرسە بە پرسی خۆی بزانێت و بە گەرمی كاری بۆ بكات.
ئەو هەلەی كەوا ئێستا بۆ گەلی كوردستان رەخساوە، هەلێكی مێژووییە و پێویستە سوودی لێوەربگرین و لەدەست خۆمانی نەدەین و، نەیكەینە قوربانیی بەرژەوەندییە حزبییەكان، لەم پێناوەدا پێویستە هەموو لایەكمان بەرژەوەندیی خۆمان لە بەرژەوەندیی گشتیدا ببینینەوە و، جلی تەنگی حزبایەتی فڕێ بدەین و جلی كوردایەتی بپۆشین.
ئەگەر هەموو لایەكمان سوودمان لەو هەلە مێژووییەی ئێستا وەرگرت و بەیەكەوە كارمان بۆ سەربەخۆیی كوردستان كرد، ئەوا شانازییەكی مێژوویی بۆ گەلی كوردستان تۆمار دەكەین، ئەگەر ئەوەشمان نەكرد، ئەوا مێژوو بەزەیی بەكەسدا نایەتەوە، بۆیە پێویستە بە رۆحییەتێكی نەتەوەیی و نیشتمانی كار بكەین و گەلی كوردستان بگەیەنین بە كەنارێكی ئارام، ئەو كەنارە ئارامەش تەنیا سەربەخۆیی و دامەزراندنی دەوڵەتی كوردستانە.
١٤ / ٤ / ٢٠١٧ ــــ عەممان
* سكرتێری گشتیی یەكێتی نەتەوەیی دیموكراتی كوردستان YNDK