دروست پێش نیو سەدە، نەوشیروان مستەفا، لە بەغدا بوو. ئێستێش وا لەوێیە. ئەڵبەت لەوێبوونەكەی ئەوكات و ئەمڕۆش، مەعنەوییانەیە، بەڵام بە جیاوازییەكی دیارەوە لە نێوان هەردوو زەمەنەكەدا.
مەعنەوییانە، بەو مانایەی، ئەودەم بە قەڵەمە تیژەكەی بەشێكی توند و كارا بوو لەو باڵەی پشتی كردە شۆڕش و پێشمەرگە و چووە پاڵ حكوومەتی بەغدا و هاوكاری سوپای عێراقی دەكرد لە شەڕی پێشمەرگە و سووتاندنی دێهاتەكانی كوردستاندا، ئەمڕۆ، بە شەخسی سەركردایەتی باڵی بەغداویستی كوردستان دەكات. ئێستێ پێش ئەوەی خۆی بچێت، وەفدی كوردستان(میللەتفرۆشان) دەستنیشان دەكات و پەیامە كۆنە نوێیەكەی دەنێرێتە خزمەت بەغدا. كەواتە؛ نەوشیروان، پەنجا ساڵی ڕەبەقە لە بەغدایە و دانەبڕاوە. خۆ ئەگەر بە جەستەش نەبێت، بە فیكر و سیاسەت و هەڵوێست.
بەڕاست، خووگرتنی نەوشیروان مستەفا بە بەغداوە، نۆستالیژیایە(دڵلێدان- حەنین)، یان لە پێناو مەرامێكی سیاسیدایە؟
باوەڕ ناكەم هی یەكەمیان بێت. ئاخر ناچێتە ئەقڵەوە، پاش ئەوەندە تەجرەبەیە و هەڵكشانی تەمەن تا ئاستی پیریی، تازە دڵی بۆ ڕۆژگار و تەجرەبەیەك لێ بدات كە لە باشترین وەسفیدا؛ خیانەت و شەرمەزارییەكی گەورەیە. كەواتە؛ مەرامە سیاسییەكە پاڵنەرە. گەرچی، ئەمیان بێت، یان ئەویان، یەك ئەنجام و ناوی هەیە. لە هەمووشی باڵكێشتر، مەرامە سیاسیییەكە، هەمان مەرامی پەنجا ساڵ لەمەوپێشە. پاكانەكانیش هەمان پاكانەن بە دەستكاریكردنێكی ڕستە و درووشمەكانەوە.
ئەوێ ڕۆژێ، بۆ لێدان و لە ئەرددانی بارزانی و ئامانجە سەرەكییەكەی بارزانی كە سەربەخۆیی كوردستان بوو. ئەمڕۆش هەر وایە، وەك بڵێی مێژوو بە وردەكارییەكی زۆرەوە خۆی دووبارە دەكاتەوە. ئەودەم، باڵەكەی نەوشیروان، بەناوی (پێشكەوتنخوازی و دژایەتی ئیستیعمار و چەپڕەوییەكی بێ نێوەرۆك)ەوە، زەبرێكی گەورەی بە بزاڤی ڕزگاریخوازی كوردستان گەیاند، دووبەرەكی نایەوە، شەڕی براكوژی داهێنا و خاكی كوردستانی سووتماك كرد، ئەمڕۆش بە ناوی (دیموكراسی و گۆڕینی سیستمی سیاسی و گەندەڵی و چی و چییەوە) دژایەتییەكی ئاشكرای بارزانی و ئامانجە نەتەوەیی و نیشتیمانییەكەی دەكات كە دەوڵەتی سەربەخۆیە.
لەوەتەی، خۆی بۆ دژایەتی بارزانی و ئاستەنگ دروستكردن و ڕێگەگرتن لە سەربەخۆیی كوردستان تەرخان كردووە تا ئەمڕۆ، كوردستان سەرلەبەر گۆڕاوە، بگرە هیچ شتێكی كوردستان وەك خۆی و لە جێی خۆی نەماوە، ئەوەی بە زەڕە نەگۆڕاوە؛ نە بیركردنەوەی، نە هەڵوێستی، نە مەرامە سیاسییەكانی، نە كەرەسەكانی بەردەستی، تەنیا نەوشیروان مستەفا خۆیەتی؟
پرسیاری هەرە گرینگ ئەوەیە: نەوشیروان مستەفا كە كاراكتەری سەرەكیی ڕووداوەكانی دوێنێ و داینەمۆی ڕووداوگەلی ئەمڕۆیە، بۆچی ناگۆڕێت، لە كاتێكدا، تا چل ڕۆژێك لەمەوبەر، حزبێكی هەبوو ناوی گۆڕان بوو، بە ناوی گۆڕانكارییشەوە دایمەزراندبوو؟ بۆچی پێیوایە ئەوەی پەنجا ساڵە پێی نەكراوە، ئەمڕۆ پێیدەكرێت؟ بۆچی سوود لە تەجرەبەكانی پێشوو وەرناگرێت؟ بۆچی هەموو جارێك چاوەڕوانی ئەنجامێكی باش و جیاوازە لە جارەكانی پێشووتر، لە كاتێكدا كەرەسەكانی بەردەستی، بەوەی ئەمڕۆشییەوە، هەمان كەرەسەكانی كۆنن؟
وەڵامی مەنتیقیش ئەوەیە: چونكە لەوەتەی نەوشیروان سیاسەت دەكات، نیشانەی لە یەك مەرامی سیاسی گرتووەتەوە، لە پێناو پێكانی ئەو ئامانجەشدا، هەموو شتێكی كردووە، بە خیانەتیشەوە.
ئەوەی چوونەوەی ئەمجارەی نەوشیروان مستەفا بۆ بەغدا لە جارەكانی پێشوو(كە زۆرن) جیا دەكاتەوە ئەوەیە، ئەمجارە هەر تەنیا لە ڕووی سیاسی و ئاكارییەوە لەگەڵ كوردستان و ئامانجە ڕەواكانیدا ڕووبەڕوو نییە، بەڵكو لە ڕووی قانوونیشەوە لەبەردەم لێپچینەوەدایە.
چیتر نیشتیمانپەروەرانی كوردستان لەگەڵ كەسایەتییەكی سیاسیدا لە ململانێدا نین كە هێڵە سوورە نەتەوەیی و نیشتیمانی، تەنانەت ئاكارییەكانیشی بەزاندووە، بەڵكو لەبەردەم كەسێكدان لە لایەن قانوون و دادگاوە داواكراوە.