بە درێژایی مێژووی نوێی نەتەوەی كورد، رووینەداوە مورتەزەقە و چەكبەدەستانی شۆڕشی چەواشە لە دژایەتیكردنی شۆڕشی سەربەخۆییخوازی كوردستاندا، پشتیان بە تیۆری و ئایدیا بەستبێ و تەنزیریان بۆ هەڵوێستەكەیان كردبێ و وەك رێباز و دنیابینییەك وێنایان كردبێ و هەوڵیان دابێ داكۆكی لە راستی و دروستیی رەفتارەكەیان بكەن. چەكبەدەستانی دژە شۆڕش هەمیشە لە عەوامێكی نەفام و ناهۆشیار و سەرۆك جاشانی ناپاك و كاسەلێس و پارەخواز پێكدەهات و لە هەندێك قۆناغیشدا گەنجانی بێچارەی هەڵاتوو لە بەسەربازگرتن و شەڕ و مەرگ دەكەوتنە ئەو خانەیەوە و جاروباریش شۆڕشگێڕی بەرگەنەگر و رووخاو و خۆبەدەستەوەدەریشی تێدەكەوت. ئەمانە لە هیچ قۆناغێكدا زاتی ئەوەیان نەبوو بەهانەی ئایدیۆلۆجی بۆ هاوسەنگەرایەتیی دوژمن و داگیركەران بهێننەوە، یان تەنزیرات بۆ پێگە شەرماوەرەكەیان داتاشن. ئەوان وەك هەر بەكرێگیراوێك خزمەتی خۆیان پێشكەش دەكرد و كرێ و ئیمتیازاتی خۆیان وەردەگرت، لەو پێناوەشدا بە سەرشۆڕی و بێزراویی نێو میللەت رازی بوون و تەماعی ئەوەیان نەبوو پاساوبێننەوە و خەڵك بە پاساوەكانیان قایل بێ، چ جای ئەوەی هەوڵ بدەن كوێرە رێگەكەیان وەك رێبازێكی سیاسی وێنا بكەن و خەڵكی بۆ بانگ بكەن. ئاخر بانگكردنی ئینسانی كورد بۆ دژایەتی سەربەخۆیی كوردستان، هەم لای داگیركەران و هەم لای كرێ گرتەكانیشیان دەزانرا كە بانگێكی كپ و بێ دەنگدانەوە و بێ جەدوایە.
مانفێستی دژە سەربەخۆیی و دژ بە نەتەوە كە پەكەكە و لقەكانی لەم چەند ساڵەی دواییدا بەرزیان كردەوە، خاڵێكی وەرچەرخانی مەترسیداری چاوەڕواننەكراو بوو. تا چركە ساتی راگەیاندنی راشكاوانەی ئەم مانفێستە و بە درێژایی تەمەنی شۆڕشی كوردستان، ناكۆكییە سیاسییەكانی نێوخۆیی كورد لەسەر رێ و رێچكەكانی گەیشتن بە سەربەخۆیی كوردستان بوو، نەك لەسەر خودی سەربەخۆیی وەك ئامانجێكی نەتەوەیی باڵا. رەنگە لەسەر كات و ناكاتی هەڵگرتنی دروشمەكە بووبێت، لەسەر قۆناغبەندییەكانی خەباتی سەربەخۆییخوازی بووبێت، بەگشتی ناكۆكی و ململانیێەك بوو لە باشترین حاڵەتدا لەسەر ئەوەی بە كامە ئایدیۆلۆجیا و دنیابینی و بە رابەرایەتی كام چین و دەستەبژێر دەگەین بەو ئامانجە و لە خراپترین حاڵەتیشدا زادەی ئەو دەردە كوردە بوو كە كەسمان رابەرایەتی ئەوی دیكەمان لەو كاروانەدا قبوڵ نەدەكرد و شەڕمان لەسەر زەعامەت دەكرد. بەڵام تا ساتەوەختی بەگۆهاتنی (مانفیستی دژە نەتەوە)ی پەكەكە، ناكۆكیی نوخبەی سیاسیی كورد هەرگیز لەسەر كوردایەتی و ناكوردایەتی، سەربەخۆییخوازی و بندەستیخوازی نەبووە. تەنانەت چەپی كورد كە تا سەر نەیتوانی بەشێكی خەباتی نیشتمانیی عێراقی و ئوممەمیەت بێت و ماڵی كوردستانیی خۆی جیاكردەوە، هەر لەبەر ئەوە بوو كە باڵێك بوو لە خەباتی سەربەخۆییخوازیی كوردستانی و پێشمەرگەكانی رۆڵەی نەتەوەی كورد و گەلی كوردستان بوون.
پەكەكە و لقەكانی لە پارچەكانی كوردستان نەك هەر یەكەمین تەشكیلەی سیاسیی كوردن كە بە هۆشیارییەوە دژ بە سەربەخۆیی و خەباتی نەتەوەیی میللەتی كورد وەستاونەتەوە و سەربەخۆیی بە شۆڤێنیزم و كوردایەتی بە نەژادپەرستی دەزانن و راشكاوانە دژایەتی سەربەخۆیی كوردستان تیۆریزەدەكەن و بانگ لە رۆڵەكانی نەتەوەی كورد دەكەن بچنەریزی ئەو دژایەتییە، بەڵكو لە ئان و ساتێكیشدا ئەم كارە دەكەن كە كوردستان لە ئاستانەی سەربەخۆییدایە و جیهان و تەنانەت ناوچەكەش خەریكی دەستەوپەنجەنەرم كردنن لەگەڵ وەها پێشهاتێكی سیاسی و حەتمییەتی بە وجودهاتنی دەوڵەتی كوردستان.
پەكەكە لە كاتێكدا دژی كوردایەتی و دەوڵەتی نەتەوەیی كورد دەوەستێتەوە و پاساو بەوە دێنێتەوە كە كوردستانی سەربەخۆ واتا زیادبوونی دەوڵەتێكی دیكەی نەژادپەرستی وەك دەوڵەتانی تورك و فارس و عەرەب، كە هیچ كام لە تورك و فارس و عەرەب نەك هەر دەستیان لە دەوڵەتی نەتەوەیی خۆیان هەڵنەگرتووە، بەڵكو دەستبەرداری پارچە داگیركراوەكانی كورد و میللەتانی دیكەش نابن كە بە تۆبزی كردوویانە بەشێكی دەوڵەتە نەتەوەيیەكانی خۆیان. لەوبەری جیهانیش ئەوروپییەكان هەمیشە لەخەمی ئەوەدان كۆبوونەوەیان لە یەكێتییەكی كیشوەریدا، شوناس و تایبەتمەندییە نەتەوەییەكانیان كاڵ نەكاتەوە و وڵاتێكی وەك ئینگلستان لەو پێناوەدا وا شوناسە ئەوروپاییەكەی دەخاتە راپرسییەكی نەتەوەییەوە.
پەكەكە سووك و ئاسان دەیەوێ مێژوویەكی دوور و درێژ و حەكایەتی هێشتا نەبڕاوەی دروستبوونی دەوڵەتی نەتەوەیی لە سەرانسەری دنیای مۆدێڕندا لەبیر خەڵك بباتەوە. دەیەوێ پرەنسیپی جیهانیی مافی دیاریكردنی چارەنووس، چیرۆكی بێبەشبوونی چوارەمین گەورە نەتەوەی رۆژهەڵاتی ناوەڕاست لەو مافە، رازی نەبوون و نەسرەوتنی سەد ساڵی میللەتی كورد بۆ گێڕانەوەی ئەو مافە و گێڕانەوەی پێگە و ئیعتبار بۆ چوارەمین گەورە نەتەوەی ناوچەكە، نادیدە بگرێ.
پەكەكە وەك حزبێكی پۆڵپۆتی كە هەوادارەكانی بە منداڵی پەروەردە دەكات و ئیعتماد لەسەر مێشك شوشتنەوە دەكات، بە هەمان لۆژیكی منداڵ فڕیودان بابەتی سەربەخۆیی تیۆریزە دەكا، بۆیەش زۆر سادە و ساكارانە دەیەوێت پێمان بڵێ دەوڵەتی كوردستان دەبێتە دەوڵەتی چەوساندنەوەی توركمان و سریان و ئاشوور و كلدان و نەتەوە و ئایین و ئایینزاكان بەدەستی كوردەوە، بۆیە نابێ دروست بێ. وەك ئەوەی فەرەنسا و ئینگلستان و ئیسپانیا و تەواوی دەوڵەتە نەتەوەییەكانی دیكە زیندان و ئەشكەنجەخانەی گەلانی غەیرە فەرەنسی و غەیرە ئینگلیز و غەیرە ئیسپانی و میللەتانی دیكە بن كە هاوژیانیانن .
بزاڤی رزگاریخوازیی كوردستان كە لە جەوهەر و كەلتووردا خەباتێكی پێكەوەیی نەتەوە و ئایین و ئایینزاكانی كوردستانە، هەر لە سەرەتاوە ئەم كێشەیەی چارەسەر كردووە و ناوەڕۆكە دیموكراتی و لیبڕاڵەكەی گرەنتی بەخش بووە بۆ هەموو ئەو پێكهاتانە كە كوردستانی سەربەخۆ بە وێنەی هەر وڵاتێكی دیموكرات و لیبڕاڵ دەبێتە سەرزەمینی هەمووان و هەرگیز زۆرینەیی كورد، كەمینەیی ژمارەیی و ماف و كۆتا و بەركەوتی ئەوان ناخاتە مەترسییەوە و ئەم راستییە لە پێش سەربەخۆییشەوە لە هەرێمی كوردستاندا بەرجەستەیە.
سەربەخۆیی نە تەنیا حەزێكی رۆمانسی و خولیایەكی حەماسی و خەونی وەك گەلانی دیكە ژیانە، بەڵكو كەمترین هۆشیاری بەسە بۆ تیگەیشتن لەوەی بێ سەربەخۆیی، خۆشگوزەرانی و پێشكەوتن و بنیادنانی ئایندە و گەشەپێدانی وڵات مومكین نییە. دەوڵەتانی داگیركەر گەر بیانتوانیایە بە حوجەت و قەناعەت پێهێنان و پاساوهێنانەوە، میللەتانی ژێردەست لە داواكردنی سەربەخۆیی سارد و پەشیمان بكەنەوە، پەنایان بۆ رێی سەختی ئاگر و ئاسن و قەتڵ و عام نەدەبرد. چ جای حزبێك لە هەمان میللەت بیەوێ میللەتی خۆی بە بندەستی و رەتكردنەوەی ئازادی قایل بكات. پەكەكە لە دوای زنجیرەیەك هەڵوێستی دژ بەیەك و سەرلەخۆشێواندن و كلك گرێدان و بژاردەی هەڵە و لێكدانەوەی دۆگما ئێستا لەو پێگە سەختە و لەبەردەم ئەو ئەركە مەحاڵەدایە.
پەكەكە دەزانێ دژایەتی راستەوخۆی سەربەخۆیی و مافی نەتەوەیی، دژایەتی كۆی نەتەوەی كورد و مێژووی سەد ساڵ خەباتیەتی و چاوقایمییەكی لە رادە بەدەری دەوێت، بۆیە پەنا بۆ قێزەونكردن و ناشرینكردنی كوردایەتی و سەربەخۆیی دەبات، تا پەلاماردانی مومكین بێت. چەمكە سەیر و سەمەرەكانی وەك (بەسەر چوونی سەردەمی دەوڵەتی نەتەوەیی، دروستكردنی نەتەوەی دیموكراتیك لە جێی ئینتمای نەتەوەیی، خۆسەریی دیموكراتی لە جیاتی نیشتمان) لە هەوڵە بێ جەدواكانی ئەو حزبە و لقەكانیەتی بۆ ساردكردنەوەی كوردستانییان لە سەربەخۆییخوازی و قایل بوون بە كەمتر لە ئازادی.
لە كۆهەستی خۆڕسكانەی ئینسانی كورددا، هەر كەس و لایەنێك دژی سەربەخۆیی كوردستان بێت، دوور لە هەر پاساو و تەنزیرێكی سیاسی، وەك ناپاك و هاوسەنگەریی دوژمن دەبینرێ، لەلای داگیركەرانی كوردستانیش هەر تاك و گروپێكی لەو چەشنە دەبێتە شایستەی هاندان و دەستگیرۆیی ودەست لە پشتدان. ئێستا پەكەكە و لقەكانی بە كردەوە لەو پێگەیەدان. دژ بە دەرفەتی رەخساو بۆ میللەتەكەیان و دەست تێكەڵ لەگەڵ دەوڵەتانی داگیركەری كوردستان و دژبەری سەرسەختی بەرەی سەربەخۆییخوازین.
بەڵام پاساو و هەوڵەكانی پەكەكە بۆ تیۆریزەكردنی دژایەتی سەربەخۆیی وەك هەر ئایدیایەك كە دژ بە خواست و ئاواتی خۆڕسكانەی ئینسانەكان بێت، هەمیشە كورت دێنێ. دوایین لێدوانی ساڵح موسلیم-ی سەرۆكی لقی رۆژئاوای پەكەكە نموونەیەكی بەرجەستەی ئەو كورتهێنانەیە. موسلیم دەڵێ: مادام كورد لە عێراقدا ئیعتراف بە وجودی كراوە و بە بەراورد لەگەڵ پارچەكانی دیكە زۆرترین مافەكانی وەرگرتووە، دەبێ لەگەڵ بەغدا كۆك و تەبا بێت و لێی جیانەبێتەوە و كوردانی دیكەش بەغدا بكەنە دەروازەی ستراتیژیی خۆیان.
ئەم لێدوانەی موسلیم كرۆكی تێڕوانینی سەرلێشێواوانەی پەكەكەیە بۆ دۆزی كورد، ئەو نەك هەر كۆی خەبات و قوربانییەكانی كورد بە هۆكاری بەدەستهێنانی لانیكەمی مافەكانی لە باشووری كوردستاندا نازانێ و بە خێر و سەدەقەی رژێمەكانی دەزانێ، نەك هەر گیانەلای دەوڵەتی فاشیل و لەبەریەك ترازاوی عێراق و حەتمییەتی هەڵوەشانەوەی نابینێ و داوادەكات لێی جیانەبینەوە، بەڵكو لەگەڵ ئەو لۆژیكە سەرەتاییەش دژبەرە كە كورد لە هەر پارچەیەك زۆرترین ماف و پێشكەوتنی بەدەستهێنابێ، لە پارچەكانی دیكە نزیكترە لە سەربەخۆیی و دەبێ هەوڵی جددی بۆ بخاتە گەڕ. نەك بسرەوێ و دەست هەڵگرێ و سارد بێتەوە.
گرفتی بنەڕەتی مانفێستی پەكەكە لەوەدایە كە كورد بە شایانی سەربەخۆیی نازانێ و كەمترین مافی پێ زۆرە. قسەكانی موسلیم روونترین گوزارشتە لەو روانگەیە .