هەر كێشەو پرسێكی سیاسی لە هەر كۆمەڵگەیەكدا كە دێنە پێشەوە بێ هۆكار نین، كۆمەڵێ هۆكاری سیاسی و كۆمەڵایەتی و ئابووری و هەندێ جاریش باكگراوندی مێژوویی رۆڵی خۆیان دەبینن لە سەرهەڵدانی ئەو كێشە و گرژییانە. ئەو كێشەو گرژییە ناوخۆییانەی كەوا ئەمڕۆ بەرۆكی كوردستانیان گرتۆتەوە، دەگەڕێنەوە بۆ كۆمەڵێ هۆكار، كە بە ڕای من بەشێكی زۆریان دەگەڕێنەوە بۆ ئەو ناعەدالەتییە سیاسی و كۆمەڵایەتییەی كە ئەمڕۆ لە كوردستان هەیە، بەشێكی دیكەشیان پەیوەندی بە پەرش و بڵاوی ناوەندی سیاسیی كوردستان و یەكدی قبووڵنەكردن و پەراوێزخستنی لایەنە سیاسییەكانەوەیە، هۆكارێكی دیكەش ئەوەیە؛ لە كوردستان حزب كۆنتڕۆڵی هەموو شتێكی كردووە و بەسەر هەموو شتێكدا زاڵە و دەسەڵاتی بە سەر هەموو شتێكدا هەیە. وایلێهاتووە حزب كۆنتڕۆڵی هەموو كایەكانی ژیانی كردووە، ئەمەش وایكردووە دەزگا و دامەزراوەكانی وڵاتی ئێمە سیستماتیك نەبن و لە سەر بنەمای سیستەم بەڕێوە نەچن و، لەسەر بنەمای میزاجی شەخسی بەڕێوەبچن. ئەمانە هەموو وایانكردووە پەرلەمانی كوردستانیش كە سەرچاوەی یاسادانانی كوردستانە ببێتە دەزگایەك بۆ شەرعییەتدان بە بڕیارەكانی حزب، زۆربەی كێشەكان بۆ ئەو هۆكارانە دەگەڕێنەوە، ئێمە زانیمان كێشەكانمان چین، بەڵام چۆنیان چارەسەر بكەین؟
چارەسەری ئەو كێشەو گرژییانە بەوە دەكرێت كەوا سەركردایەتی سیاسیی كوردستان مامەڵەیەكی دادپەروەرانە لەگەڵ تەواوی كۆمەڵگەی كوردستان بكات، لەهەمان كاتدا مامەڵەیەكی تەندروست لەگەڵ تەواوی لایەنە سیاسییەكانی كوردستان بكات و بە ڕاوێژ لەگەڵ هەموو لایەك نەخشەرێگەیەكی نەتەوەیی و نیشتمانی دابڕێژێت بۆ دەربازكردنی ئەم قۆناخە هەستیار و چارەنووسسازە، ئەمەش دەبێتە بناخەیەكی پتەو بۆ ئەو یەكڕیزییە سیاسی و كۆمەڵایەتییەی كە ئێمە نیمانە و پێویستیمان پێیەتی. یەكڕیزی كورد بەهێزترین فاكتەری سەركەوتنی كوردە، بەڵام ئێمە ئەو یەكڕیزییەمان نییە.
ناوەندی سیاسیی كوردستان پەرش و بڵاوەو پێویستی بە یەكخستنەوە و ڕێكخستنەوەیە. پێویستە سەركردایەتی سیاسیی كوردستان بە چاوێكی یەكسان سەیری لایەنە سیاسییەكان بكات و هیچ لایەك پەراوێز نەخات، بۆ ئەمەش پێویستە نەكەوێتە ژێر كاریگەری هیچ لایەك و بەرژەوەندی نەتەوەیی و نیشتمانی رەچاوبكات. ئەگەر باس لە یەكڕیزی و یەكدەنگی دەكەین، تەنها شەش حەوت لایەن لە كوردستان نین، كۆمەڵێ لایەنی دیكەش هەن كە خاوەن دیرۆك و خەبات و بیروڕا و بۆچوونی خۆیانن و، بۆ ئەو میللەتە خەباتیان كردووە و ماندوو بوون، ناكرێ ئێستا پەراوێز بخرێن و گوێیان لێنەگیرێت، ئەوە ناعەدالەتی و لەبەرچاو نەگرتنی رۆڵی لایەنە سیاسییەكانە، پێوستە بۆ رێكخستنەوە و یەكخستنەوەی ناوەندی سیاسیی كوردستان گوێ لەوانیش بگیرێت.
ماوەیەك لەمەوبەر پێشنیاری پێكهێنانی (ئەنجوومەنی سیاسیی كوردستان)م كرد، بۆ ئەوەی تەواوی حزب و لایەنە سیاسییەكانی كوردستان بگرێتەخۆ. واتە ئەو حزبانەی كەوا لە پەرلەمان و حكومەتدان و ئەو حزبانەی كە لە دەرەوەی پەرلەمان و حكومەتدان، لەهەمان كاتدا پێشنیاری ئەوەم كردبوو بۆ ئەمە خۆمان لە هەندێ چەمكی تەقلیدی بەدوور بگرین و رۆحییەتی خۆبەزلزانین بگۆڕین بۆ رۆحییەتی یەكدی قبووڵكردن. بۆ نموونە پێویستە دەستەواژەی حزبی بچووك و حزبی گەورە بخەینە لاوە و واقیعییانە مامەڵە لەگەڵ یەكدی بكەین. بە باوەڕی من گەورەیی و بچووكی حزبی سیاسی لە هەڵوێستیدایە، نەك لە قەبارەكەی. زۆر حزبی گەورە هەبوون، ئێستا هەر نەماون، هاوكات زۆر حزبی گەورە هەبوون ئێستا بچووك بوونەتەوە، لە هەمان كاتدا زۆر حزب هەبوون كە بچوك بوون، ئێستا گەورە بوون و رێبەرایەتی نەتەوەیەك دەكەن. مانەوەی لایەنێك لە دەرەوەی ئەو ئەنجوومەنە دەبێتە هۆی ئەوەی كەوا كێشە و گرژی دروست ببێتەوە، بۆیە پێویستە هەموومان یەكدی قبووڵ بكەین و بە گیانی برایەتی مامەڵە لەگەڵ یەكدی بكەین.
لێرەدا لە پێناو چارەسەری كێشەكان و خاوكردنەوەی گرژییەكان جارێكی دیكە داوای دروستكردنی (ئەنجوومەنی سیاسی كوردستان) دەكەمەوە، ئەمەش دەبێتە ماڵێك بۆ هەموو لایەنەكان، لە هەمان كاتدا دەتوانین تەواوی كێشە و گرژییەكان لەو ئەنجوومەندا باس بكەین و چارەسەرییان بۆ بدۆزینەوە. هەروەها دەتوانین لەڕێی ئەو ئەنجوومەنە (ئەنجوومەنی سیاسیی كوردستان) هەم ناوەندی سیاسیی كوردستان رێكبخەینەوە و هەمیش بگەینە سازانی نیشتمانی، لە هەمان كاتدا دەكرێ هەر لەو ئەنجوومەنەدا گفتوگۆ لە سەر پرسی (سەرۆكایەتی هەرێمی كوردستان) بكرێت و یەكلا بكرێتەوە. لەبەر ئەوەی ئەم پرسە پێویستی بە سازانی نیشتمانی هەیە، نەك سازانی حزبی، بێگومان سازانی نیشتمانی و سازانی حزبی دوو شتی لەیەك جیان، ئەوەی ئێستا لە باشووری كوردستان هەوڵی بۆ دەدرێت، سازانی حزبییە لە نێوان پێنج لایەنی سیاسی و كۆمەڵێ لایەنی سیاسی دیكە لەو سازانە حزبییە پرس و رایان پێنەكراوە، بۆیە بەهیچ شێوەیەك ناتوانرێت بەو سازانە پێنج حزبییە بگوترێت سازانی نیشتمانی. نیشتمان موڵكی هەمووانە، نەك بە تەنیا موڵكی ئەو پێنج لایەنە. ئەگەر چاومان لەوە بێت كێشەكانمان چارەسەر بكەین و كۆمەڵگەیەكی مەدەنی و هێمن و ئارام بنیاد بنێین، دەبێ یەكدی بخوێنینەوە و یەكدی قبووڵبكەین، یەكدی رەتكردنەوەو یەكدی پەراوێزخستن لە یەكدیمان دووردەخاتەوە و زیان بە هەموو لایەكمان دەگەیەنێت. بۆیە پێویستە چاو بە سیاسەتی پێشوودا بخشێندرێتەوەو بەشێوازێكی دادپەروەرانە مامەڵە لەگەڵ تەواوی لایەنە سیاسییەكانی كوردستان بكرێت.
بێگومان بنچینەی دەسەڵات دادپەروەرییە، بۆیە پێویستە دەسەڵات مامەڵەیەكی دادپەروەرانە لەگەڵ تەواوی لایەنە سیاسییەكان بكات و هیچ لایەك پەراوێز نەخات. سیاسەتی رەتكردنەوە و پەراوێزخستن خزمەتی بارودۆخی كوردستان ناكات و كەلێنێكی گەورە دەخاتە یەكڕیزی نیشتمانی، لە هەمان كاتدا هۆكارێكە بۆ ئەوەی كە هەندێ وڵات سوود لەو كەلێنەوە وەربگرن و بەرنامەو ئەجێندای تایبەت بە خۆیان لەسەر گۆڕەپانی سیاسی كوردستان پیادە بكەن، بێگومان ئەم حاڵەتەش ئێستا لە كوردستان بوونی هەیە.
لێرەوە داوا لە برای بەڕێزم جەنابی كاك مەسعود بارزانی سەرۆكی كوردستان دەكەم، كەوا وەك هەمیشە خاوەن بڕیاری خۆی بێت بۆ یەكلاكردنەوەی كێشەكان و بە زووترین كات بڕیار لە سەر پێكهێنانی (ئەنجوومەنی سیاسی كوردستان) بدات و بە راوێژ لەگەڵ تەواوی لایەنەكان كارنامەیەكی نیشتمانی بۆ قۆناخی داهاتووی خەبات دابڕێژێت، ئەمەش دەبێتە سەرەتایەك بۆ خاوكردنەوەی گرژییەكان و چارەسەركردنی پرسە هەڵاواسراوەكان و گەیشتن بە سازانی نیشتمانی لە جیاتی سازانی حزبی.
***
* سكرتێری گشتیی یەكێتی نەتەوەیی دیموكراتی كوردستان YNDK