بەهار بە مانای لە دایك بوونەوەو نوێبوونەوەو ئاڵوگۆڕ دێت، لە بری چێژوەرگرتن لەم بەهارە، كۆمەڵگەی نێودەوڵەتی سەرقاڵی شیكردنەوەو چوارچێوە داڕشتنی ستراتیژیەتێكی جەماعییە بۆ لاوازكردن و لە كۆتاییشدا تێكشكاندنی ئەو گرووپە تیرۆریستییە بەربەریەی بە دەوڵەتی ئیسلامی لە عێراق و شام ناسراوە، كە لەمەودوا بە داعش ناوی دەهێنین.
لە پاییزی ساڵی 2014ەوە كۆمەڵگەی نێودەوڵەتی دەستی كردووە بە جێبەجێكردنی ئۆپەراسیۆنی سەربازی ستراتیژيی بۆ لەناوبردنی داعش. لە كاتێكدا هاوپەیمانێتیەكەی دژ بە داعش گورزی ئاسمانی لە عێراق و سوریا ئەنجام دەدات، هێزی سەربازی كوردی، كە بە پێشمەرگە ناسراون، لەسەر زەمین، شەڕی داعش لە هەرێمی كوردستانی عێراق(كە لەمەودوا بە هەرێمی كوردستان ناوی دەبەین)و بەشەكانی دیكەی عێراقدا دەكەن. ئەمە ئەو دۆخەیە كە لە ئێستادا لەئارادایە، بە هەوڵی یەكگرتوو و بە هاوكاری نێوان یاریزانە نێودەوڵەتییەكان، هاوپەیمانێتی دژ بە داعش توانیویانە ئەم گرووپە تیرۆریستییە كوشندەیە لاواز بكەن. ئەگەر هەنگاوی داهاتوو تێكشكاندنی داعش بێت، ئەوا پێویستمان بە بیركردنەوە هەیە لە گرتنەبەری هەنگاوی سەربازی و ناسەربازی، كە پێویستە بگیرێنەبەر بۆ ئەوەی دۆخەكە بە تەواوی كۆنتڕۆڵ بكرێت.
دەكرێت ئەركی شكستپێهێنان و لە كۆتاییدا تێكشكاندنی داعش بۆ دوو قۆناغ دابەش بكرێت: ستراتیژیەتی سەربازی و ستراتیژیەتی جەماعی. دەكرێت قۆناغی یەكەم پتر ورد بكرێتەوە، هەروەك ئەوەی پێشمەرگە ئەنجامی داوە. كاتێك داعش دەستی كرد بە هێرش كردنە سەر ئەو خاكانەی لە ژێر دەستی كورددا بوون، پێشمەرگە دەستی دایە پرۆسەیەكی بە پەلە كە لە سێ قۆناغ پێكهات بوو:
1ـ بەرگرتن بە پێشڕەوی داعش بەرەو هەرێمی كوردستان.
2ـ پاشەكشەپێكردن و ڕزگاركردنی ئەو ناوچانەی داعش دەستی بەسەرداگرتبوو.
3ـ شكستهێپێنانی داعش لە سنوورەكانی هەرێمی كوردستان و لە عێراقدا بەگشتی.
بەهۆی بەكارهێنانی ئەم ستراتیژیەتەوە، پێشمەرگە سەركەوتنی گەورەی بەدەست هێنا لە قۆناغی یەكەم و دووەمدا. بەڵام پێشمەرگە ناتوانێت بە تەنها لە قۆناغی سێیەمدا سەركەوتوو بێت. لە ئێستادا، پێشمەرگە ناتوانێت و ئەو جۆرە چەك و ئەو جۆرە سیستمی چەكەی نیيە كە پێویستن بۆ جێبەجێكردنی قۆناغی سێیەم. كەواتە پێویست بە پشتیوانیەكی سەربازی زیاتر، هەروەها چەكی پێشكەوتووتر دەكات لەلایەن كۆمەڵگەی نێودەوڵەتییەوە.
سەرەڕای ستراتیژیەتی سەربازی، بۆ تێكشكاندنی ئەم گرووپە تیرۆریستییە، دەبێت وەڵامێكی جەماعیش هەبێت- بە تایبەتی، ستراتیژیەتێكی نێودەوڵەتیی و گشتگیر و جەماعی كە پشتیوانیەكی تەواو لە هێزەكانی پێشمەرگە بكەن. پێشمەرگە تەنها هێزن لەسەر زەوی شەڕی داعش دەكەن، هەروەها تەنها هێزن كە سەركەوتوو بوون لە شكستپهێنانی داعشدا. بەو پێیە، كۆمەڵگەی نێودەوڵەتی دركی بە ڕۆڵی گرنگی پێشمەرگە كردووەو لە سەرەتای بیركردنەوەدایە لەبارەی دەستەبەركردنی چەكی پێویست بۆیان. لەوەش زیاتر، شەریكەكانی هاوپەیمانێتی نێودەوڵەتی ڕێگایان داوە بە سوپاكانیان بۆ ئەوەی پشتیوانیی ئاسمانی دەستەبەر بكەن و كار لەگەڵ نەتەوە شەریكەكانیاندا بكەن بۆ ئەنجامدانی گورزی ئاسمانی بە ئامانجگیراو لە عێراق و سوریا وەك بەشێك لە ستراتیژیەتێكی گشتگیر بۆ لاوازكردن و تێكشكاندنی داعش.
پێویستە ئۆپەراسیۆنەكانی گۆڕەپانی شەڕ و گورزە ئاسمانییە سەربازییەكان بەردەوام بن لە دژی داعش لە عێراق و سوریا تاوەكو ئەم گرووپە لاواز دەبێت و تێكدەشكێت، لەبەر ئەوەی داعش تەنها هەڕەشەیەكی ناوچەیی نیيە، بەڵكو لە هەمان كاتدا هەڕەشەیەكی نێودەوڵەتیشە، دۆخەكە پێویستی بە وەڵامێكی نێودەوڵەتی هەیە.
بە پێشێلكردنی یاسای نێودەوڵەتی بە شێوەیەكی سیستماتیكی و قێزەوەن، داعش توانیویەتی زیان بە خەڵكانی مەدەنی بگەیەنێت و بەردەوام لەسەر بنەمای ئیتنی خەڵكانی مەدەنی بكاتە ئامانج. داعش ناسەقامگیری لە عێراق و سوریا و رۆژهەڵاتی ناوەڕاستدا دروست كردووە، هەروەها بۆتە هەڕەشەیەكی گەورە بۆ سەر ئاسایش و ئاشتی ناوچەیی. لەوەش زیاتر، داعش بەردەوامە لە ڕاكێشانی هەزارەها شەڕكەری بیانی بۆ نێو ڕیزەكانی لە سوریا و عێراقدا. لەبەر ئەم هۆكارانە پێویستە لە ئێستاداو بە گوێرەی ئەم واقیعە هەڵسوكەوت بكەین.
بۆ ئەوەی باشتر لەو قەیرانەی ئێستا تێبگەین و ستراتیژیەتێكی سەركەوتوو پیادە بكەین، دەبێت بە تەواوەتی لە قۆناغەكانی پەرەسەندنی ئەم قەیرانە تێبگەین. وێنە پڕ لە مەترسیەكانی مەدەنیە بێتاوانەكان: كورد و كوردی ئێزیدی، موسڵمان و مەسیحی و خەڵكانی لۆكاڵی و خەڵكانی بیانی كە دەكوژرێن و دەستدرێژیی جەستەییان دەكرێتەسەر و سەریان لە لەشیان جیا دەكرێتەوەو بە زیندوویی دەسووتێنرێن لە عێراقدا، كە تەواوی جیهانیان تووشی شۆك كرد. لە سەرەتادا پلانی ئەم گرووپە تیرۆریستیە بەربەریە لە پێشڕەویاندا بەرەو موسڵ بە مەبەستی ڕزگاركردنی كۆمەڵێك زیندانی بوو. ئامانجیان دەست بەسەرداگرتنی شارەكەو بەرفراوان بوونیان لە ناوچەكەدا نەبوو. بەڵام ئەمە دەقاو دەق بە شێوەیەكی چاوەڕوان نەكراو لە هاوینی ساڵی ڕابردوودا ڕوویدا.
ئەوەی لێرەدا شایستەی ئەوەیە بە بیری بهێنینەوە ئەو سیاقەیە كە تێیدا داعش سەریهەڵداو ئەو پەرەسەندنە گرنگانە بوون كە ڕوویاندا لە هاوینی ساڵی 2014دا. سەرهەڵدانی داعش بۆ چەند هۆكارێك دەگەڕێتەوە، لە نێویاندا هەوڵی شكستخواردوو بۆ سەپاندنی عێراقێكی یەكگرتوو لە ناوچەكەدا، شكستەكانی حكومەتی سەرۆك وەزیران، نوری ئەل مالیكی، هەروەها نەبوونی متمانە و هاوكاری لە نێو گرووپە جیاوازەكانی عێراقدا. سیاسەتە تایفەگەری و تاكڕەویەكانی مالیكی ئاگری ناكۆكییە تایفەگەریەكانی خۆش كرد، لەگەڵ دوورەپەرێزخستنی سوننەكان لە عێراق و پێشێلكردنی دەستوور و شكستی حكومڕانی لە بەغدا.
لەوەش زیاتر، نەبوونی سوپایەكی نیشتیمانی لە عێراق و بنیاتنانی سوپایەكی تایفەگەری– هەروەك بە «سوپای دەنگدەر» بۆ مالیكی ناسراوە- ئەویش بۆ تەلاعوبكردن بە دەرئەنجامی هەڵبژاردنەكان بۆ بەرژەوەندی خۆی، یەكێكی دیكەیە لە فاكتەرەكان. بەو پێیە، لە هەڵبژاردنەكانی پێشوودا، مالیكی نزیكەی 500,000 دەنگی لە نێو سوپادا بەدەست هێنا. هۆكارێكی دیكە كە بەشدار بوو لە سەرهەڵدانی داعش بریتییە لەو كەشە سۆسیۆ-سیاسییەی لە عێراقدا لە ئارادا بوو، كە كەشێكی لەبار بوو بۆ سەرهەڵدان و بەهێزبوونی داعش. لەبەرئەو هۆكارانەی ئاماژەیان پێكرا، تێڕوانینی ئێمە ئەوەیە كە داعش بەرهەمی حكومڕانی شكستخواردوی مالیكی بوو لە عێراقدا.
ئەوە تێڕوانینێكی بەربڵاوە كە داعش نەخۆشی ناوچەكە نیيە، بەڵكو نیشانەی ئەو نەخۆشیەیە كە لە ناوچەدا لە ئارادایە، كە لە بنەڕەتدا بەهۆی ئەم سیاسەتە شكستخواردوانەوە دروست بوون. عێراق و هەرێمی كوردستان لەم دۆخەدا نەدەبوون ئەگەر حكومەتی بەغدا گوێی بۆ ئەو هۆشداریانە بگرتایە كە لەلایەن بەرپرسانی كوردەوە، هەروەها دۆستە ئەمەریكیەكان و هاوەڵە ئیقلمیەكانەوە پێی درا. ئێستا ئێمە لە شەڕێكی كوشندە و قەیرانێكی مرۆییداین.
پێش ئەوەی موسڵ بكەوێتە دەستی داعش، لە كانونی یەكەمی ساڵی 2013دا، بەرپرسانی كورد حكومەتی فیدڕاڵی عێراقیان لە بەغدا ئاگادار كردەوە لەبارەی هەڕەشەی ئان و ساتی داعش لە دژی شارەكەو پێشنیاری هاوكاریشیان كرد بە ڕەوانەكردنی هێزی پێشمەرگە بۆ بەرگری كردن لەو ناوچەیە. بە داخەوە، گوێ بە ئاگاداریەكانی ئێمە نەدرا. شەش مانگ دواتر، لە 9ی حوزەیرانی ساڵی 2014دا موسڵ كەوتە دەستی میلیشیا بەربەڕیەكان. دوای چەند كاتژمێرێك لە كەوتنی موسڵ، پێنج فیرقەی سوپای عێراق و فیرقەیەكی پۆلیسی فیدڕاڵی بە تەواوەتی داڕووخان و بە دەیان هەزار سەرباز شوێنەكانی خۆیان و چەكی قورسیان بۆ داعش جێهێشت. لە ماوەی چەند كاتژمێرێكدا، داعش لە ڕێكخراوێكی تیرۆریستی دڕندەوە گۆڕا بۆ دەوڵەتێكی تیرۆریستی بێ پێشینە.
بەڵام ئەوە تەنها توانای سەربازی داعش نیيە كە پێویستە كۆمەڵگەی نێودەوڵەتی لەبارەیەوە نیگەران بن، بەڵكو ئەو داهاتە دارایی بێ پێشینەیە بوو كە بۆ تیرۆریزم دەستەبەر دەكرێت لە رۆژهەڵاتی ناوەڕاست و شوێنەكانی دیكەی جیهاندا.
بۆ ئەوەی ئەم تێڕوانینە بە بەرفراوانتر بخەینەڕوو:
1ـ داعش بۆ هەر رۆژێك لە نێوان سێ بۆ شەش ملیۆن دۆلار بەدەست دەهێنێت لە ڕێی فرۆشتنی نەوت و فرۆشتنی ئاسەوارەكانی عێراق و گەنم لە بازاڕی ڕەشدا.
2ـ پارەی كۆمەك و سەرانە و باج وەردەگرێت.
3ـ ئەو خاكەی كۆنتڕۆڵی كردووە لە ئەردەن گەورەترە.
4ـ چەكی پێشكەوتوویی پێیەو لە چەند بەرەیەكەوە شەڕ دەكات، بە هەزارەها شەڕكەری بیانی لە سەرتاسەری جیهانەوە، لە نێویاندا لە وڵاتانی ئەوروپاوە بەرەو رۆژهەڵاتی ناوەڕاست دەچن بۆ ئەوەی بچنە نێو داعشەوە.
لەگەڵ بوونی ئەو توانا داراییەو ئەو هاوسۆزیە ڕوو لە گەورەبوونە، دەكرێت ئەوە ڕووبدات كە قابیلی بیرلێكردنەوە نەبێت. پێویستە كۆمەڵگەی نێودەوڵەتی ئامادە بێت و هەموو فاكتەرەكانی ئەم هاوكێشەیە لەبەرچاو بگرێت. داعش لە عێراق و سوریا هەڵدەسورێن-ڕەنگە سبەینێ بگاتە لای ئێوەش. تەنانەت ڕاستیەكی ترسێنەر هەیە ئەویش ئەوەیە كە بە پەنهانی خەڵكانی گەنجی ئێوە ڕادەكێشرێن بۆ نێو ئەم گرووپە تیرۆریستیە بەربەریە. كەواتە، دەبێت هەر نەتەوەیەكی ئازادیخواز نیگەران بێت لە بارەی چوونی خەڵك لە سەرتاسەری جیهانەوە بۆ نێو داعش.
لە ماوەی چەند رۆژێكدا لە دوای كەوتنی موسڵەوە بە سەدان هەزار خێزان هەڵاتن و ڕوویان كردە هەرێمی كوردستان، كە قەیرانێكی مرۆیی و بارگرانیيان لەسەر سەرچاوە سنووردارەكان دروست كرد. ئێمە پەنای 1 ملیۆن و 500 هەزار پەنابەر و ئاوارەی ناوخۆییمان داوە، كە ئێستا لە سەدا 20ی دانیشتووانی كوردستان پێكدەهێنن. وێنای ئەوە بكەن كە لە ماوەی چەند مانگێكدا لە سەدا 20ی دانیشتووانەكەت زیاد بكات، چۆن دەكرێت ئیدارەی ئەم پەرەسەندنە بكرێت، بەتایبەتی كە پێویستی بە ئاوڕدانەوەی بە پەلە هەیە؟
لەوەش زیاتر، بەهۆی ئەو توانا پێشكەوتوانەی لە هێرشی سەر موسڵەوە بەدەستیان هێنا، داعش لە 3ی ئابدا هێرشی كردە سەر شەنگال، توانیویەتی دەست بەسەر شارەكەدا بگرێت و تاوانی ترسناك ئەنجام بدات. لەو كاتەدا ئێمە داوای هاوكاری سەربازیمان لە دۆست و هاوپەیمانەكانمان كرد. ئێمە سوپاسگوزاری ئەمەریكا و ئەندامانی هاوپەیمانێتی نێودەوڵەتین، هەروەها سوپاسگوزاری وڵاتە ئەوروپیەكانیشین بۆ گوێگرتن لە داواكاریە بە پەلەكانی ئێمە بۆ دابینكردنی پشتیوانی ئاسمانی گرنگ، بەڵام ئەمە بەس نیيە- دەبێت كاری زیاتر بكرێت. لە ئێستادا قەیرانەكە بەردەوامە. نەك هەر تەنها بە چەكێكی سنووردار شەڕ لەگەڵ كوشندەترین گرووپی تیرۆریستی دەكەین كە مرۆڤایەتی بە خۆیەوە بینیوە، بەڵكو ئەركی دابینكردنی هاوكاریی مرۆییشمان لەئەستۆیە بۆ ئەو كەسانەی پەنایان بۆ هێناوین. هیچ كاتێك سنووری ئێمە دانەخراوە بە ڕووی ئەو كەسانەی لە سەركوتكاری و كوشتنی سیستماتیكی هەڵدێن.
باجی شەڕێكی بەردەوام، هاوشان بە بوونی 1 ملیۆن و 500 هەزار پەنابەر و ئاوارەی ناوخۆیی- لە نێویاندا ئێزیدی و مەسیحی و كورد و عەرەب- بارگرانیيان لەسەر تواناكانی ئێمە دروست كردووە، بۆ بایەخدان بەو خەڵكانە. ئێمە ئەوانە لە خۆدەگرین بە بێ ئەوەی پشتیوانیەكی دارایی گەورەمان پێ بگات لەلایەن حكومەتی فیدڕاڵی عێراقەوە. لەوەش گرنگتر، حكومەتی فیدڕاڵی عێراق بەردەوامە لە فشارخستنەسەر وڵاتانی رۆژئاوا تاوەكو بەغدا هەڵبستێت بە پشكنینی ئەو هاوكاریە مرۆیی و تەقەمەنی و چەكی سووك و مامناوەندانە پێش ئەوەی بگەنە هەرێمی كوردستان، بەو پێیە دەبنەهۆی دواكەوتنیان. ئەم دواخستنە هۆكارێكە بۆ لەدەستدانی ژیانی ئەو كەسانەی لە سەنگەرەكاندان و ژیانی ئەو كەسانەش دەخاتە مەترسیەوە كە پێویستیان بە ئاو و خۆراك و شەڵتەرە. پێویستە كۆمەڵگەی نێودەوڵەتی درك بەوە بكات كە ئەمە مەترسیيەكە ڕووبەڕووی ئەویش دەبێتەوەو بایەخدانی بەو خەڵكانە ئەركی ئەوە لە ئاست مرۆڤایەتیدا. لەوەش زیاتر، كۆمەڵگەی نێودەوڵەتی پێویستە درك بەوە بكات كە پێویستە كاری زیاتر بكرێت بۆ تێكشكاندنی ئەم گرووپە تیرۆریستیە لە ڕێی دانپێدانان بەوەی پێشمەرگە پێویستی بە هاوكاری زیاترە. بە دیاری كراوی پێویستیان بەوەیە لە ڕووی سەربازیەوە پشتیوانی بكرێن و چەكی پێویستیان بۆ تەرخان بكرێت بۆ ئەوەی بە شێوەیەكی گونجاو شەڕی داعش بكەن. پێشمەرگەكانی ئێمە بە چەكی كلاشنیكۆف شەڕ دەكەن، ئەگەر بە شێوەیەكی واقیعی قسە بكەین ئەوا ناتوانن بەم چەكە سادە و بەسەرچووە سەركەوتوو بن، هەروەها با ئەو ڕاستیەمان لەبیر نەچێت، كاردانەوەیەكی نێودەوڵەتی دەبێت پێشمەرگە لە خۆبگرێت لەبەر ئەوەی تەنها هێزن سەركەوتووانە داعشیان تێكشكاندووە لە گۆڕەپانی شەڕدا و 20000 كیلۆمەتر خاكیان ڕزگار كردووە. بە دڵنیاییەوە، سەركەوتن قوربانيی گەورەشی دەوێت. ئێمە 1200 پێشمەرگەمان لە دەست داوە لە شەڕدا. زۆربەی ئەم قوربانیانەش بەهۆی نەبوونی كەلوپەلی پێویستەوە بووە.
لە ماوەی چەند مانگی كەمی ڕابردوودا، داعش توانیويەتی لە باكوور و رۆژئاوای عێراق و رۆژهەڵاتی سوریا دەست بەسەر خاكدا بگرێت. هەرچۆنێك بێت، خۆشبەختانە هێزەكانی پێشمەرگە و گورزە ئاسمانیە بەردەوامەكانی هاوپەیمانێتی دژ بە داعش لاوازی كردوون. پێشمەرگە لە باری هێرشبردندا دەبێت تاوەكو ئەو گروپە بە تەواوەتی تێكدەشكێت. هەروەها بەشداربووانی ئەو هاوپەیمانێتیەش پابەندن بە ریشەكێشكردنی ئەو هەڕەشەیەی لە داعشەوە سەرچاوە دەگرێت، بەڵام بۆ ئەنجامدانی ئەم كارە دەبێت سێ شت بكرێت:
1ـ ئاوێتەكردنی سوننەكان لە هاوپەیمانێتی دژ بە داعش
2ـ هەوڵ و كۆششێكی بەهێز و بوونی ئامادەیی زیاتر لەلایەن سوپای عێراقەوە بۆ ئەوەی رۆڵێكی چالاكتر ببینن لە شەڕەكەدا.
3ـ ئامادەیی هاوپەیمانێتی نێودەوڵەتی بۆ ئەوەی پشتیوانیی تەواو لە پێشمەرگە بكەن، هەم لە سەر ئاستی ستراتیژی و هەم لەسەر ئاستی سەربازی، بە تایبەتی لە پەیوەندیدا بە چەكی پێویستەوە بۆ بردنەوەی شەڕەكە.
پوختەی مەسەلەكە ئەوەیە كە هێزەكانی پێشمەرگە ناتوانن بە تەنيا ئەم شەڕە بكەن كە چەكێكی سنوورداریان هەیە. ئێمە ئامادەین بۆ ئەوەی ئەركی خۆمان ئەنجام بدەین بۆ لاوازكردن و تێكشكاندنی داعش لە ناوچەكەدا، هەروەها بۆ بەشداریكردن لە سەقامگیركردنی عێراق و سوریا و رۆژهەڵاتی ناوەڕاستدا، بەڵام پێویستە پێشمەرگەكانی ئێمە چەك و كەلوپەل و مەشقیان بۆ دەستەبەر بكرێت.
ڕێككەوتنێكی گشتی هەیە لە نێو شەریكەكانی هاوپەیمانێتیەكە لەبارەی رۆڵی ئیجابی پێشمەرگەكانمان و هەرێمی كوردستان لە ئیدارەدانی ئەم شەڕەو ئەو قەیرانە مرۆییە بەردەوامەی لە ئارادایە. ئێمە وەك هەرێمی كوردستان و هێزە پێشمەرگەكانمان ناتوانین ئەو دۆخ و قەیرانەی ئێستا لەبەرچاو نەگرین. ئێمە بەرپرسیارێتی تەواوی سەلامەت و ئاسایشی خەڵكی خۆمان لە ئەستۆ دەگرین، هەروەها بەرپرسیارێتی ئەو خوشك و برایانەی پەنایان بۆ هەرێمەكەمان هێناوە، كە دەبێت بەرگریيان لێبكەین، لە دژی هەر هێزێك كە هەڕەشە لە ئاسایش و سەلامەتیيان دەكات.
ئێمە، وەك هەرێمی كوردستان و هێزە پێشمەرگەكانمان سوپاسگوزارین بۆ ئەو پشتیوانیەی لەلایەن كۆمەڵگەی نێودەوڵەتیەوە دەبەخشرێت، بەڵام پێویستمان بە هاوكاریی سەربازی زیاتر هەیە. پشتیوانی هێزەكانی هاوپەیمانێتی نێودەوڵەتی لە ڕێی گورزە ئاسمانیەكانەوەو ڕەوانەكردنی چەند بڕە چەكێك كە پێویستن بۆ شەڕكردن لە دژی داعش بەس نین بۆ تێكشكاندنی ئەم گرووپە تیرۆریستیە. تەنيا رزگاركردنی موسڵ بەس نیيە، هەروەها بە دڵنیاییەوە جێبەجێكردنی ستراتیژیەتێكی بە پەلە بەس نیيە بۆ تێكشكاندنی داعش. تاوەكو داعش لە موسڵدا بێت، ئەوا داعش هەڕەشەیەكی گەورە دەبێت بۆ هەرێمی كوردستان، بۆ تێكڕای عێراق و بۆ رۆژهەڵاتی ناوەڕاست و بۆ تەواوی جیهان. جار لە دوای جار هەرێمی كوردستان دڵسۆزی خۆی سەلماندوە بۆ دۆست و هاوپەیمانەكانی لە ناوچەكە و كۆمەڵگەی نێودەوڵەتی سەلماندووە، بەڵام تاوەكو ئێستا داواكاری ئێمە بۆ دابینكردنی چەكی پێویست بۆ تێكشكاندنی داعش فەرامۆش كراوە. كاتی ئەوە هاتووە گوێ بۆ حكومەتی هەرێمی كوردستان بگیرێت و هاوكاریی بكرێت و لەم ڕوانگەیەوە هەڵسوكەوت بكرێت، ئەویش لە پێناوی بەدیهێنانی ئاشتی لە ناوچەكە، هەروەها پاراستنی ئاشتی و ئاسایشی نێودەوڵەتی.
***
ئهم باسه به زمانی ئینگلیزی له گۆڤاری (Turkish Policy Quarterly) له بههاری 2015 بڵاو كراوهتهوهو بهزمانی كوردی له گۆڤاری گوڵان بڵاو دهكرێتهوه.

*ئەندامی سەركردایەتی پارتی دیموكراتی كوردستان