تەمەنیش هەر چۆن ساڵ، وەرزی خۆی هەیە، هەر وەرزەو پەیوەستی رۆژانێكە، ئەوە رزمی منداڵی و، پاشان لاوێتی. هەتا تەمەن بەرەو پیریی هەڵكێشێ ئەوە رزمەكەشی خاو دەبێتەوە، ئەمە یاسا و رێسای ژیان و تەمەنە، ئەگەر هەر وەرزەو هەقی خۆی نەدەیتێ، ئەوە بێگومان كەمتەرخەمیت نواندووە، رۆژانێك هەیە، پڕە لە جموجۆڵ و چەتوونی و جەربەزەیی و سەركەشی..
بەش بە حاڵی خۆم ئەگەر لە رۆژانی منداڵ و مێر منداڵیمدا، هەلوكێن و یەكە گۆتەكە و قەڵا قەڵا و میزاجێن و شەڕە سەگ و شەرە كەڵەشێر و شەڕە گەڕەكم نەكردبێ، ئەوە حاشا كوڕی ئەو كوچەو كۆڵانەی منداڵی نەبووم، كاتێ كە دەگوترێ گەنجێتی، ئەوە لێوان لێوی حەز و خۆزگە و تافە تافی هەڵچوونی سەرجەم ئارەزوەكانەو، لە سای رەشماڵی هەواری خەون و خەیاڵا بەسەر دەبرێ.
سەردەمانێك بە بەزم و رەزم و جرت و فرت و بێ رابواردن و سەلاری، جاران دەیانگوت : ( گەنجێتی داستانی خۆی هەیە).
كاتێ لە زانكۆ دەمخوێند، زۆر لەو بەزمانە دەماغی بەرنەدابووم رۆژانە لە تەك هاوەڵەكاندا لەو كارە سەیر و سەمەرانمان دەكرد، لە بیرمە لەگەڵ كاكە(حیكمەت هیندی) هەرە ئازیزمدا، پاش نان خواردنی نیوەڕۆمان، لە یەكێك لە چێشتخانەكانی(حەیدەرخانە)، ئەچووین بۆ مەزاتخانە واتە بازاڕی(دەڵالخانە)، لەوێ چایخانەیەكی مام ناوەنجی هەبوو، كانگای مقاماتی عیراقی بوو، دیوارەكانی هیندەی تەنها پوولێكی سوتەی بە بەتاڵی نەمابووەوە، لەبەر وێنەی فۆتۆگرافی لە شووشەو چوارچێوەی گیراوی مقامبێژانی عێراقی، لەسەر رەفەیەكی توندوتۆڵ، دوو ریكوردی گرۆندێكی تیكە حەڤدەی دانابوو، تەختەبەندێكی، خانەی درێژ كۆڵەش كە دەیان شریتی بەكرەی تیادا ریز كردبوو، كابرای چایچی هەر كە سۆزی مقام لە كەللەی دەدا، خێرا(سدارە) رەشەكەی بەلاری لەسەر دادەناو، بەتایبەت ئەگەر دەنگی(رەشید قۆندەرچی) بوایە، لە تەك سۆزەی(ئەمان ئەمان) دا، چڕە دوكەڵی حەسرەت لە ناخیەوە دەردەهات، من و كاكە(حیكمەت)یش هێندەی دیكە وەك(مووشەدەمە) فورمان دەدا، ئیدی لە تەنیشتمانەوە دادەنیشت و بەسدارەكەی ئارەقەی چڕوچاوی دەسڕییەوە و ئەوسا باوەشێنی خۆی پێ دەكردو، بە شاگردەكەی دەگوت، چایەكی سەنگینی بۆ تێكات، ئێمەش دەكەوتینە ستایش و سەنای(قۆندەڕچی)، دڵی پڕ دەبوو، دەیگوت:
خۆزگە كاتی خۆی گوێتان لە دەنگی بوایە، دەڵێی چی حەسوودان و ناحەزان لە داخا، كلیسان دەرخواردا، ئیدی دەنگی نووساو بەو دەردەیان برد.
كاكە(حیكمەت) سدارەكەی لێ وەرگرت و بە نۆرە لە سەرمان كرد، بەڵام بۆخوا دەڵێم، كاكە حیكمەت شووشەبەندو چوارچێوەی نە دەویست هەر كوت و مست دەتگوت یەكێكە لەو مقامبێژانە، بەتایبەت كە دوو قۆڵی بەستەكانمان دەگوتەوە.
ئەوا رۆژێكیش هەر لەسەر ئەو هەواو بەزمە، لەگەڵ كاكە(ئەكرەم ئەحمەد)ی خوالێخۆشبوو، یەك دوو برادەر كە پێكەوە بووین، گوتمان، بۆ نەچین بۆ چایخانەی(ئەلزەهاوی)، كە لێمانەوە نزیك بوو، پڕ بوو لە پیاوانی بە ساڵاچووی سدارە بەسەر عەبابەشان و فیتك و هۆڕی نێرگەلە كێشانیان بوو، لەسەر قەنەفەیەك دانیشتین و داوای چامان كرد و منیش وتم: لەگەڵ چایە عەنابییەكەدا، نێرگەلەیەكم بۆ بێنە.
برادەرەكانم بەسەر سوڕمانەوە سەیریان كردم، وتیان: تۆ جگەرەیش ناكێشی چیت لەو فلق و هووڕە داوە؟!
دیارە دەتەوێ(بنعاتە كە رەزیلكەی ؟).
لەوەراما وتم: بابە خۆ نێرگەلەكێشان تەیارە لێخوڕین نییە و حەزم لێیەتی، تومەس نێرگەلەكێشانیش دەستور و داب و نەریتی خۆی هەیە، بە هەرحاڵ ناشیانە تێكەوتم و هەرچی فورم پیادا دەكرد، گوپەكانم دە ئاوسان و هەر دەتگوت زوڕنا لێدەدەم، ئەوجا كەوتمە هەڵمژینی و كەوتمە ژەنینی غەڵبە غەڵب و هەمە جۆر دەنگم پێ لێدەدا، برادەرانیش لە تاواندا ئاو بە چاویاندا دەهاتە خوارێ.
یەكێ لەو ئەفەندییە سدارە بەسەرانە، زۆر بە وردی سەرنجی دەدام، كاك ئەكرم ئانیشكێكی لە قەپڕغەم چەقان، كە گوایە سەیرم دەكەن، منیش وتم زۆر ئاساییە، بڵێ هێشتا دەستی(رەقاس) نەبووە.
چاوم بڕییە كابراكە و لە مژلێدان كەوتم و هاوەڵەكانیشم ورتەیان لێبرا، كابراكەم سەیری كردم و پرسی: ئەرێ كاكە پرسیارێكت لێ دەكەم؟
- فەرموو گەورەم.
- تۆ كوڕی مەلا عەبدلواحید ئەفەندی نیت ؟
- لە كوێم هەڵدەگری و لە كوێم دادەنێی) بەڵام قوربان، چۆنت زانی ؟
- رێك چاوەكانت بە چاوەكانی ئەو دەچێ.
- دیارە باوكم برادەرت بووە ؟
- ساڵەهایەك، بەڵام پتر لە بیست ساڵە بە خزمەتی نەگەیشتووم، ئەو عەیامە لە هەڵەبجە مامۆستا بووم، ئیدی خۆم گواستەوە بۆ بەغدا، ئەوە عومرێكە لێرەم.
- ئەگەر بفەرموون، ناوی شەریفتان؟
- مستەفا
- سوپاس مام مستەفا، هەر كە چوومەوە خزمەت باوكم، بۆی دەگێڕمەوە، بەڵام.
- باسی نێرگەلەكێشانەكەشت؟ نا، نا، ئەوە كە ئێمەش لە تەمەنی ئێوەدابووین، هەزار بەزمی لەوە سەیرترمان دەكرد، ئیدی ببڕای ببڕای نەك هەر توخنی ئەو چایخانەیە نەكەوتم، بگرە ئەو راستە رێییەشم لەخۆم حەرامكرد، بەڵام هەر لە دڵمابوو، كاتێ بۆ پشووی هاوین گەڕاینەوە بۆ شار، سەربوور دەكەم، بەبێ كەم و زیاد بۆ باوكم گێڕایەوە، ئەویش بە پێكەنینە پڕ جۆشەكەی كە هەندێ جار لێی دەكرد بە كۆكە پێم پێ كەنی و فەرمووی: ئا كە ئەوە پیاوێكی سەر راست و مامۆستایەكی نموونەیی بوو، خوا یاربێ كە گەڕایتەوە، نامەیەكی بۆ دەنووسم بیدەرێ بەراستی پەرۆشی دیداریم.