چەپڵە رێزان و كەف و كوڵی شۆڕشی(14)ی گەلاوێژ هێندە بڕی نەكردو، كارەكە ئاڵۆزبوو، كورد چەكی لەشان كرد و پێشمەرگە لە سای شۆڕشی ئەیلوولدا لەدایك بوو، هێرشی سوپای عێراق و چەتە چڵكنە(ئەو ناوە تایبەتی خیانەتكارانی جاران بوو) لە زەوی و ئاسمانەوە دەستی پێكرد، هەستی شۆڕش و كوردایەتیمان سەری هەڵدا، پەیوەندیمان كرد بە ریزەكانی پارتی دیموكراتی كوردستانەوە و یەكێتی قوتابیانی كوردستان، جگە لەوەی حەفتانە، یان مانگی دووجار كۆبوونەوەمان دەكرد، ببووینە چاو و گوێی شۆڕش لەناو شاردا، سەرەتا هەمووان بەبێ سڵ كاریان دەكرد، ئەو دەمە پێشمەرگە بێ ترس دەهاتە ناو شارەوە و هاتوچۆی دەكرد و، پەیتاپەیتا كۆمەك، چ بە جلوبەرگ و پەتۆ یان خۆراك بۆ دەرەوە دەنێرا، حكوومەت نەیدەهێشت كیلۆیەك شەكر و چا بگاتە دەرێ، ئابلۆقەیەكی چڕی بە دەوری شارا تەنیبوو، بەتایبەت لە هاتنی گورگی دووپێی ترسنۆك( زەعیم سدیق مستەفا) كە بە گوند و حاسڵات سووتاندنەوە نەدەوەستا، بەڵكو مزگەوت و مەلا و ژن و منداڵ و خەڵكی بێ چەكی دەكوشت و ماڵ و مەڕ و ماڵاتی تاڵان دەكرد.
ساڵێكیان ئەم (زەعیم سدیق)ە، بە یەك تیپ(فرقە) سەربازەوە بە هەمەجۆر تانك و زرێ پۆش و بە هەمەجۆر فڕۆكەی جەنگی رووسییەوە و چی تۆپ هەیە، پەلاماری شاخی ئەزمەڕی ژوورووی سلێمانی دا، ئەرز و ئاسمانی كردبووە جەهەنەم، لە كاتێكدا تەنیا یانزە پێشمەرگەی پێوەبوو بەچەند تفەنگێكی شەق و شڕ و فیشەكی چرووكەوە، بەڵام چونكە بڕوایان پۆڵایین بوو، بۆیە هێندەی سەد تیپی ئەوان بەهێز بوو، چیای سەختی سەركەشی ئەزمڕ بووبوو، بە دوانزە چیای لە ئەزمڕ باڵاتر، بۆیە شەوان سوپاكەی عێراق پاشەكشێی لێدەكرد و منداڵانی شارەكەش، بەتایبەتی منداڵانی مەڵكەندی بە لاقرتێ و گاڵتە پێكردنەوە، گۆرانی(ئەزمڕ ئەزمڕ)یان بۆ دەوتنەوە، ئەم هێرشە هەتا هەفتەیەكی خایاند و هەر نەگەیشتنە سەر ئەزمڕ و منداڵە وردكەش بەزمەكەی خۆیان دەگێڕا و گاڵتەیان بە تەقە لێكردنەكانیان دەكرد، ناچار ئەو رقەیان بەخەڵكی دەڕشت...
یەكێ لەو پێشمەرگانە خاڵۆزایەكی من بوو، شەهید(نەوزادی عەلی ئاغا)گێڕایەوە و وتی: پاش ئەوەی سوپاكە هیوابڕ بوو، ئێمە سەنگارەكانمان چۆڵ كردبوو، بەڵام ترسێكی وا لە زەعیم و سوپاكەی نیشتبوو تا مانگێكیش نەیان دەوێرا روو لەو ناوە بكەنەوە، رقیان لە خۆریش دەبوویەوە، چونكە لەسەر ئەو كەل و دۆندەوە گزنگی دەدا، بۆ مێژووش دەبێ ئەوە بە نەوەكانمان بڵێین: لەو رۆژەوە سوپای عێراق دامەزراوە، لە یەكەم پێكهاتەیەوە كە فەوجی ئیمام موسای كازم بوو، لە شەڕی (بازیان)دا بەرامبەر شێخی نەمر بەكارهێنراوە، پاشانیش لەگەڵ دەستپێكردنی شۆڕشی بەرزان كاری لێدانی كوردبووە و سەراپای مێژووە رەشەكەی بریتی بووە لە كورد كوشتن و كوردستان وێرانكردن.
یەكێ لەو بیرەوەریانەی ئەو ساڵانەی خوێندنمان، ئەوە بوو واژووی مامۆستایانیان بۆ پشتگیری كردن لە وێرانكارییەكانی حكوومەت كۆدەكردەوە، مامۆستایەكانیان بانگ كردە ژووری بەڕێوەبەر، بۆ ئەوەی ئەو كارەیان پێ بكەن، تاوێكی نەبرد، مامۆستایەكمان هەبوو، عەرەب بوو، شاعیر بوو، لە هاوڕێیانی حیزبی شوعی بوو، پیاوێكی كورتە باڵای سمێڵ گەورەی، خاڵێكی كوتراو بە رووخسارییەوە بوو، زۆرجار لە گۆڤاری (ئەلئەدیب) و(فسوڵ الاربعە) شیعر و نووسینم دەخوێندەوە، بە شپرزەیی و گرژی و توڕەیی هاتە دەرەوە، بەعەرەبی دەینەڕاند دەیگوت ئەگەر بشمكوژن چۆن پشتگیری لە شەڕی كوردكوژی و كوردستان وێرانكردن دەكەم. ئێمەش ئەو دەمە كە ئەندامی شانەی سەرەكی پارتی بووین قوتابیەكانمان هاندا، بیكەنە چەپڵەڕێزان بووی و بابژی، بەڕاستی پاڵەوانێكمان بینی، بەژنی بەسەر كوردستاندا دەیڕوانی، ئیدی بردیان و تا ساڵانێكی دوورودرێژ نەمانبینییەوە، بەڵام هەمیشە لە زەینماندا ئامادەبوو، بە مامۆستا ئازاكەش ناومان دەبرد... لە تەمەنی هەرزەكارییەوە خولیایەكی بێ ئامانی ئەدەب لە كەللەی دابووم، لە خوێندنەوەی شیعرەوە، زۆر بەخەستی ئارەزووی خوێندنەوەی رۆمانم دەكرد، ئەو دەمە هێشتا وەكوو لە ئەدەبیاتی كوردیدا جێگای خۆی نەكردبوویەوە، ئەوە لە یادمە، خزمێكمان دوو سەفتە رۆمانی(پێشمەرگە)ی (رەحیمی قازی) هێنایە ماڵمان و، لەپڕا قەدەغەكردنی هاتوچۆ جاڕدرا و، ئیدی كەوتنە گیانی خەڵكەكە و نزیكەی دووسەد كوردیان كردە قوربانی، خەڵكەكە شپرزەبوون بۆ حەشاردان و شاردنەوەی كتێب و چەك و هەموو ئەو شتانەی حكوومەت لێی دەسڵەمیەوە ئاوی گەرماوی جەهەنەمی پێ داخرا و گەرمكرا، بۆیە ئێمەش بەر لەگشت شتێ چاڵێكمان هەڵكەند و كتێبەكانمانی لە ناو مشەمایەك ناو گڵمان كرد بەسەرا، هەتا ئەو دانووسانەی كرا، لەگەڵ هەڵدانەوەی تەرمی بەختبووانی كوردستاندا لە دەیان ماڵی شار هەرچۆن (حسین عارف) واتەنی: چاڵی جەرگی پیرێژنی، چاڵەكانی زیندەبەچاڵكردنی كتێبیش سەری هەڵدا و كتێبەكانی ماڵی ئێمەش بە كتێبی(پێشمەرگە)ەوە شێی زەوی زەفەری پێ بردبوو، ئەوانیش بوونە قوربانی...
لەسەرو ئەمانە شەوە، لە هەمووی سەیرتر، ئەوا هاتووچۆ قەدەغەیە و، نەك مرۆڤ پشیلەی پشیلە ئاسا دەركەوتایە دەسبەجێ دەستڕێژیان لێدەكرد، لە دەرگا درا، وامانزانی سەربازەكانە، تومەس ژنێكی ناسیاوبوو، خێراخۆی فڕێدایە حەوشەكەوە و ئامێرێكی (تایپ)ی گەورەی لەبن هەنگڵی لە ژێر(عەبا)كەیدا دانابوو، وتی: بەقوربانە ئەمە با لەماڵەكەتاندابێ، دایكم پێی گوت: باشە مێردەكەت پارێزەرە، ئاساییە لەماڵتاندابێ، بەڵام ئێمە بڵێین چی، جگە لەوەی تۆ چون چۆنی بەم رۆژە وێراوتە بەم(مەتبعەیە)وە بێیتە دەرێ، كەواتە لەوەش مەترسە و بیبەرەوە.
هێشتا وەكوو لە ئەدەبیاتی كوردیدا جێگای خۆی نەكردبوویەوە، ئەوە لە یادمە، خزمێكمان دوو سەفتە رۆمانی(پێشمەرگە)ی (رەحیمی قازی) هێنایە ماڵمان و، لەپڕا قەدەغەكردنی هاتوچۆ جاڕدرا و، ئیدی كەوتنە گیانی خەڵكەكە و نزیكەی دووسەد كوردیان كردە قوربانی، خەڵكەكە شپرزەبوون بۆ حەشاردان و شاردنەوەی كتێب و چەك و هەموو ئەو شتانەی حكوومەت لێی دەسڵەمیەوە