لەبۆنەیەكی ئاوادا،دەگمەن و دانسقە و نازدار لەژیانی شانۆكار و نووسەرێكی كوردا، چی دروست و ڕەوایە بگوترێ؟ دیارە سوپاس و پێزانین سەرتۆپی گوتارەكەیە،كە هەستێكی پاكژ و باڵا،پاداشتی ئەو كۆششەی كە سەراپای تەمەنم تیادا قوربانی شانۆ كردووە، ئەو شانۆیەی ژیان بایەخدارتر و مەزنتر و گەشاوەتر دەكات، بەڵكو واتاكەی پڕ واتاتر دەكات و هەمیشە خەمی گەورەی لەئەستۆنراوی،تەكان و گۆڕانە و، دڕدانە بەشەوەزەنگ و بیرە مەییوو بەستەڵۆكەكان و، بەڵكو هەڵگیرسانی ئەو شۆڕشەیە كەمایەی سەرفرازی گەل و شكۆمەندی مرۆڤە.
سوپاس بۆ پەروەردگار كەسەراپای شانۆییەكانم ڕووگەش و ڕووسوریان كردووم لەدەرباری خودا و خەڵك و خاكدا.
سوپاس بۆ ئەو گەواهە زیندووانەی، كەبۆ تەنها ساتێك لەخەمی هەمووان تەریك و بێلایەن نەبووە. هەبوونی ئەم پەیكەرەی كە زادەی هونەری هونەرمەندی زرنگ كاكە(چێنەر نزار)ەو بەسەرپەرشتی مامۆستای هونەرمەند(د.ئازاد جەمال)ە.
ئەوە ئەو چاودێرەیە كەتا دواماڵئاوایی چاوی لەهەنگاوەكانمە، نەبادا،خوانەخواستە، پەیام و ئەركە پیرۆزەكەی شانۆ بزر بكەم،كەواتە چاودێرمە بۆ سەر ڕاستی و دەست پاكی و بەردەوام هەڵكشان، نەك ڕۆچوون و لەدەست دا.
كەواتە حەز و ئارەزووی هەڵچووی هونەرمەندی پەیكەرساز لەتەك ئەو هەموو جەختكردن و ئیستەرەم و كۆڵنەدانەدا، ئەو مەبەست و فەلسەفەیەی بەئاگابوونی منی پێوەیە، دەنا بۆچی پەیكەر بۆ ئەحمەد سالاری شانۆڤان دەكرێ كەنە لەزەین و نە لەهزر و نەلە خەون و خەیاڵیشیدا نەبووە، بەڵام جەربەزانە و ژیرانە قایلی كردم، دیارە ئەو هونەرمەندەش وەك سەرجەم هونەرمەندانی وڵاتەكەمدا ئەو وڵاتەی وەك گۆران واتەنی پتر لە نیوسەدە لەمەوبەر: (تازە هەنگاو بەرەو ئەو ژیانە هەڵدەهێنێتەوە).
ئەم هونەرمەندە بێباكە تووشی چەرمەسەری و بگرە و بەردە و ڕەتاندن و سەرەگێژەی كێشمەكێش و ڕەنجاندنێك بوو هەتا بەدەردی ئەشكەنجەدان چوو،بەڕادەیەك كەسێكی خۆپاراستووی هێدی دوورە هەڵچوون و گرژبوون ببمە حسێن عارف واتەنی( كڵافەیەك ژانی تووڕە)، بۆیە دەنگە شانۆییە ناسراوەكەم،ئەو دەنگەی كە نیو سەدەیە هۆڵە هەژارەكانی كوردستانی پێ دەهەژاند،بەڕووی ئەو جووتە بەڕێزەی (بەڕێز سەرۆكی شارەوانی سلێمانی و بەڕێز سەرۆكی ئەنجوومەنی شارەوانی سلێمانی) بڵێم: جووتە برا سوپاستان دەكەم بۆ ئەو پەرۆشی و بەتەنگەوەهاتنەی پرۆژەی پەیكەرەكەم كە نواندتان،بم بەخشن ناوم نەهێنان نەك خوانەخواستە ناوزڕاندنی پێوە بێت بۆیە بەناوی ئەسكەمل و كورسی و مەقامە باڵاكانتانەوە ئاماژەم بۆ كردوون،سوپاس كەلەشارەكەی خۆمدا تەنها ( یەك مەتر دووجاتان) پێ ڕەوا نەبینیم!!، خۆنەبێگانە بووم و نەگومان لێكراو و نەنەناسرا و (عەزیزی كوللی عالەم بووم..)
كەوتمە سەر خولیا و كەڵكەڵەی چوونە ناو جەنجاڵی خەمی پەیكەرسازەكەوە گووتم : با كەمێك باری گرانی خەمی سووك كەم، هەستام و پتر لە 20 جار زەنگم بۆ ڕێزدار سەرۆكی شارەوانی لێدا و تەنانەت مەسیجیشم بۆ نارد بەڵام كپ و كڕ بوو! وەرام نەبوو! لەدڵی خۆمدا سوپاسی خودام كردوو گووتم:بەس نەبوو ئەوە مۆبایلی بەرپرسی ئاگركوژانەوە یان پۆلیسی فریاكەوتن و چارەسەری كت و پڕی نەبوو .
ناچار زەنگم بۆ رێزدار سەرۆكی ئەنجوومەنی شارەوانی لێدا، ماڵی ئاوا بەڵێی كرد و خۆم پێناساند، بەڵام ( داخ لەبەڵام،بریا بەڵام نەبووایە)هەرگیز لەو بڕوایەدا نەبووم دەنگی گۆڕا كپ بوو، ئەم سەر و ئەوسەری بەپیت و وشەكان دەكرد(خۆم مامۆستای زانستی دەنگ و ئاخافتم، چاك لەنەبرە یان كپی و بنە وشە دەزانم)، زانیم ئەوقە و واقی وڕماوە بۆیە گوڕی دایە خۆی و زەنگە دەنگی ڕوون كردەوە و پاساوی دەنگ دانی ئەنجوومەنی بەڕووما هاوێشت، ئەمیش هەرچۆن یارۆی ڕۆشنبیری سلێمانی بۆخواستی بەردەم ئەو تەلاری هونەرەی، كەلەلای من و هونەرمەندان تەلاری هونەر نییە، هەرچۆن بەهەمان شێوە لیژنە و میژنەی هێنایەوە بەڵام زانیم ئەو شوێن خواستەی من كرا بە (لۆقەنتە و مۆقەنتە) .
پاش چەند مانگێك لە هاتوچۆی مەكۆئاسای جۆڵایاندا نوقمی گێژاوی ( شیردا بۆ داپیردا..)
ئاكام ئەوەمان لەهەڵوێستەكانیان چنییەوە، كە بەزمانی شانۆیی پێی دەگووترێ( ڕستەی مەبەست) یان(سەرەتانی)، واتە فەلسەفە و پوختەكەی ئەمە بوو: ( پەیكەری كەرەكەی باخچەی حەزرەتی نالی هەزار و یەك تەنگ و چەڵەمەی بۆ درووست كردووین و سەری دونیای وەك چەرمە چۆلەكە لێهێناوینەتەوە یەك) بەڵام ئێستا ئەزیزانم چی بەحاڵتان بێت لەنێرەكەرێكەوە بوو بەجووتێك..!!!؟؟؟
لەگەڵ رێز و شانازیما بۆ ئەو هونەرمەندە (زیرەك میرە) كە خودی خۆم جگە لەخۆشەویستی سەرسامم بە هونەرەكەی.
ئەمانە خستمییە چەقی مەراق و غایلە و سەربێنە و سەربەرەوە، دەمگووت یاران ( عەزیز نەسین و ئەنتیوان چێخەف و گۆگۆڵ ) لەكوێ بێنم؟!
ناو بەناوێكیش گۆران و دەروێش عەبدواللە كڵۆڵەكەیم بەدەنگە پڕ خرۆشەكەی دیلان بەرگوێ دەكەوت.
هەر لێشاوی ئەم غایلانە خستمییە سەر هەوڵی زانینی ئایە ئەم پەتایە بۆ شوێنەكانی تریش تەشەنەی كردووە، بەدڵە ڕاوكێوە زەنگم بۆ بەرپرسێك لەهەولێری پایتەختم لێدا كە بەری سی ساڵێك قوتابیم بوو، هەر كە بیرۆكەی پەیكەرەكەم بەگوێیدا دا بەبێ سێ و دوو فەرمووی: ئای كە كارێكی دروستە، ئەمە خزمەتە نەك تەنها بۆ هونەرمەند بەڵكو بۆ ڕازاندنەوەی پایتەختەكەمان، لەكام پارك و لەكام گۆڕەپان دەخوازی بفەرموو..
ئاهێكی سەر فرازیم پیادا هاتەوە و بەرچاوانم ڕوون بوویەوە و ووتم: سوپاس بۆ خوا ئەو خڵتەی جەڕەتاوەی رۆژە چارە گرانەكان بەسەرچوو.
لەخۆمم پرسییەوە من گشت بستێكی كوردستانی لام وەك یەكە،هەرهەمووی پیرۆزە و خاكی منە و بە قوربانی دەبم،بەڵام بۆ ئەم گواستنەوەیە لەسلێمانییەوە بۆ هەولێری پایتەخت چەشنەها پرسیار و تیادا ڕامانی لێوە دەكەوێتەوە و دووریش نییە لەسەر زاری كەسانێكیش ببێتە( بنێشتە خۆشە) كەبۆ ئەم بارودۆخە گران دەكەوێتەوە و نامەوێت ببێتە چەلەحانی و وەت وەتە.
پێویستە بۆ خودا بڵێم ئەم نموونە دزێوە شێوازەی لەلای شارەوانی سلێمانی بینیم نابێتە ناوزڕاندنی دەزگا حكومییەكانی دیكەی شار، زۆر بە پێچەوانەوە هەر كاتێك هونەرمەندێك كاری كەوتبێتە هەر شوێنێكیان چ لە لایەن ڕێزداران (پارێزگارەكان و یان شوێنانی دیكە ) قەرداریان كردوون و خۆشەویستییان كردووە بەسینەیانەوە، خوا چاكەیان باتەوە.
وادەی ئەوە هاتووە بپرسرێ: بۆچی ئەم ووتارە بەر لەوادەیە یان ناوەختە ؟
من بەش بەحاڵی خۆم ئەم پرسیارانەم لەخۆم كرد؟بۆچی بەر لەوادەی پەردە لادان لەسەر ئەو پەیكەرەی كە هێشتاوەكو بستۆكەیەك زەوی نییە لەسەری ڕاوەستێ، بەبێ باڵ هەر بەحەواوەیە!
تۆ بڕوات بەدرووستی گووتاری نووسراوە نەبووە،دەتگووت نوسراوە دەبێتە رێگر لەنێوانی گووتار بێژ و جەماوەردا!
باشە تۆ شانۆكاریت هەرخۆت نەبوو دەتگووت : زمانی شانۆكەم ڕەوانتر و جوانتر و دەربڕتر و كاریگەرترە؟ ئەی بۆ بەشانۆیی نەتنووسی ؟
تەنها و تەنها وەرامی دوایین پرسیار دەدەمەوە: دەڵێم سوپاستان دەكەم بەڕێزینە كەرەسەی بابەتێكی زۆر بەپێزتان خەڵات كردم، ئیلهام بەخشم بوون،خستمتانە سەر كەڵكەڵەی نووسینی باشترین شانۆیی گاڵتەجار ئامێز.
ئێوەش بۆتان هەیە قاقای خۆتان لێبدەن لەتەك قاقا لێدانی هەموواندا، بەخۆڕایی نەبووە یەزدانی مەزن لەتەك هۆش و ئەو گشت توانایانەدا كە بەمرۆڤی بەخشیوە پێكەنینیی خەڵات كردووە كە تەنها مرۆڤ دەتوانێ پێبكەنێ، كاتی خۆیەتی ئافەرین لە (بریجسۆن) بكەم بۆ خۆی و ( فەلسەفەی پێكەنین).
ئازیزان ئەمە هەناسەیەك بوو لەو هەناسە حەسرەتییانەی لەسینە داخ كراوەكەی ئەم شانۆكارەوە هاتۆتە دەر، كە خودا شایەت لەم دونیایەدا جگە لە هونەر و خۆشەویستی هیچی دیكە شك نابات.