سیاسەت زۆر شتە، یەكێك لەوانە شتێكە پێی دەڵێن (شەڕە ورە). بە زمانە زۆر سادەكەی كوردەواری، شەڕە وورە مانای شكاندنی ئەژنۆی مونافیسەكەتە بە بێ ئەوەی بچیتە شەڕی جەسەدی و كوشت و كوشتارەوە لەگەڵیدا.
لە هەفتەی رابوردودا هەراو هوریایەكی گەورە دروست بوو لەسەر موقابەلەیەكی مێردمنداڵێكی (سیخوڕ و فیتنەی حەوت دەوڵەت) كە لە یەكێك لە میدیاكاندا بڵاوكرایەوە.
پەیامی ئەو موقابەلەیە سووك كردنی هەموو موقەدەساتی خەڵكی كوردستان بوو. لەم میانەدا هەندێك لە هەڤاڵانی ئێمە خەمسارد بوون لە بەرامبەر ئەم هێڕشەدا. هەندێكی تریشمان توندڕەو و كورت بین بوون لە بیركردنەوەو بڕیاردا.
ئەوانەی خەمسارد بوون، ترسنۆك بوون. ئەوانەشی كە توندڕەو بوون، لە دڵسۆزیانەوەیەو، دڵسۆزی خۆیان بەو جۆرە پیشاندەدەن. ئەمانە دوو گرووپن لە ناو حیزبی ئێمەدا، كە ئێمە لێرەدا هەوڵ دەدەین مەوقیف و قورسایی سیاسی هەریەكێكیان شیبكەینەوە.
پێش هەر شتێك پێویستە ئەوە بڵێین كە مەلا مەستەفای بارزان لە موڵكایەتی پارتی چۆتە دەرەوەو، لە ئێستادا سیمبۆلی نەتەوەیی كوردە. هەركەسێكیش سووكایەتی بەرامبەر بە مەلا مستەفا بكات، ئەوا سووكایەتی بە سیمبۆلی نەتەوایەتی كورد كردوە. دیسانەوە ئەوە ئەركی پارتی نییە داكۆكی لە مەلا مستەفا بكات، ئەو ئەركە لە پارتی گەورەترەو پێویستە خەڵكی كوردستان بەو ئەركە هەستن.
ئەو هەڤاڵانەی ئێمە كە لەم پرسانەدا خەمساردن، مانای ئەوەیە لە ئەرك و قورسایی بەرپرسیارێتی نیشتیمانی تێنەگەیشتوون و پارتایەتیەكەیان بۆ مەسڵەحەتی شەخسییە، نەك خۆشەویستی خاك و بەرژەوەندی خەڵكی كوردستان.ئەو كەسانە ئەوەندەی حەزیان لە كورسی و ئیمتیازاتە، چارەگی ئەوە لە خەمی مەلامستەفاو موعاناتی میللەتەكەی تێنەگەیشتوون و تێناگەن!
ئەوانەی كە لەناو ئێمەدا توندڕەون، لە دڵ گەورەیی مەلا مستەفاو سەرۆك بارزانی حاڵی نەبوون. ئەمانە نازانن كە مەلا مستەفا و ڕێبازەكەی لەسەر بنەمای ئازادی ئینسان بۆ ڕادەڕبڕین و هەڵبژاردن، خزمەتی ئینسان كردن، پاراستنی ژینگەی خاكی پیرۆزی كوردستان، نەهێشتن و دژایەتی كردنی گەندەڵی، بەرەنگاربوونەوەی بیرۆكراسی، ڕێزگرتن لە مافی ئافرەت و منداڵ داڕێژراوە.
ئەمانە نازانن كە لای مەلا مستەفا و لە رێبازنامەكەیدا، ئینسان و مافە سەرەتاییەكانی سەنترالن. مەسئولێك وەكو ئەندامی مەكتەبی سیاسی، وەكو وەزیر، وەكو بەرپرسێكی پاراستن، بەرپرسێكی ئاسایش، سەرۆك وەزیران، پارێزگار، حاكم، قایمقام و.. و تادێت، خزمەتگوزاری خەڵكی كوردستانن، نەك پادشایان، مەلامستەفا خزمەتگوزاری خەڵكی كوردستان بوو. سەرۆك بارزانیش وەك پەرچەمداری ئەو ڕێبازە بە هەمان ئاواز و ڕیتم كاپتەنی ئەم كەشتیەیە.
لە ئێستادا شەڕە وورەیەكی زۆر ناشییانە لەگەڵ پارتیدا دەستیپێكردوە كە نەخشە بۆ كێشراوە. مەبەستی نەیاران لە كردنەوەی ئەم جەبهەیە، بەهێزكردنی هەردوو گرووپی خەمسارد و ترسنۆكەكان و توندڕەوەكانی ناو حزبەكەمانە. چونكە ئەگەر خەمسارد و ترسنۆكەكانی ناو حزبەكەمان بیبەنەوە، ئەوا جورئەتی سیاسیمان دەكوژن، كە یەكێكە لە كۆڵەگەكانی ڕێبازی بارزانی.
با بێینەوە سەر مەبەسەتە سەرەكییەكەی ئەم وتارە. هاوڕێ و هەڤاڵێكی دڵسۆزم هەیە كە زوو بە زوو پێم دەڵێت « داوود ئۆغلۆ عاقڵە، چونكە بە توركەكانی وت با هەوڵ بدەین دۆستەكانمان بناسین». ئەم هاوڕێیەم كادرێكی باڵا بەرزی پارتی و ئینسانێكی زۆر موتەوازیعە. بە زمانێكی تر، ئەم هەڤاڵەم پێم دەڵێت «ئێمە نابێت بكەوینە ئەو تەڵەیەوە كەنەیاران و ناحەزانی كوردستان بۆیان ناوینەتەوە، بەڵكو پێویستە لەسەر ئەجیندای بەرژەوەندی خەڵكی كوردستان ئیش بكەین».
دوژمنەكانی پارتی، دوژمنی بەرژەوەندییە ستراتیژیەكانی خەڵكی كوردستانن. رێبازی بارزانیش یەكەمین پارێزەری ئەو بەرژەوەندییانەیە. هەر بۆیەش ئەوەی كە پارتی نابێت گوێی پێ بدات، ئەو جۆرە پارازیتانەیە كە بە نیازن بە فیتی هەندێك دامودەزگای موخابەراتی دەرەكی و، هەندێك هەلپەرستی ناو خۆمان، موهیمە سەرەكیەكەمان لە بیر بەرنەوە و بمانخەنە مستەوای شەڕە جنێوی سەر جادە. ئەمانەی كە خەریكی جێبەجێكردنی ئەو ئەجیندا دەرەكیەن نەحیزبی حاكمن، نە هیچیش لە هونەری بەڕێوەبردنی وڵات و ئیدارەی كۆمەڵایەتی (واتە حكومەت) دەزانن.
لە راستیدا پێویستە ئێمە مەشغوڵی موهیمە جدییەكەی خۆمان بین و لێگەڕێین مێژوو لەسەرمان بنووسێتەوەو بڕیارمان لەسەر بدات. مێژووش بە قاچاخچی و سیخوڕ نانووسرێتەوە. ئەوە كاری خەڵكی بە ویژدان و، ئاكادیمی و ئینسان دۆستە.