لە لێدوانێكیدا فریاد رەواندزی وتەبێژی لیستی هاوپەیمانی كوردستانی ئەوەی راگەیاند، لێدوانەكانی ئەم دواییەی سەرۆك ئەنجوومەنی وەزیرانی فیدڕاڵ نوری مالیكی دەربارەی پێشمەرگە و سەركردایەتی كورد، لە هەندێ میدیای كوردیدا شێوێنراوەو هەندێ شتی نا دروستیشی بۆ ئیزافەكراوە، چونكە بەپێی لێدوانەكەی مالیكی ئەم قسانەی نەكردووە و پێشی وایە هەندێك لەو میدیایانە ناكۆكییەكانی نێوان بەغداو هەولێریان قوڵتر كردۆتەوە، رەواندزی ئەوەش دەڵێ كە مالیكی لەو قسانەی خۆیدا ئاماژە بەوە دەكات كە پەیوەندییەكی باشی لەگەڵ سەركردایەتی سیاسی و رۆشنبیران و رۆژنامەنووسانی هەرێمی كوردستان هەیە و گەلی كوردیش گەلێكی ئازایە و كوردی خۆش دەوێ و دەرگاشی كراوەیە بۆ دیالۆگ لەگەڵ سەركردایەتی سیاسی هەرێمی كوردستان، بۆ ئەوەی هەردوولا بگەنە چارەسەرێك بۆ ئەو گیروگرفتانەی كە هەن، بەڵام بەقسەی رەواندزی، مالیكی ئەوەش دەڵێ كە هەندێ لەسەركردەكان و پارتە سیاسییەكانی كوردستان شەقامی كوردییان لە دژی حكومەتی فیدڕاڵ هانداوە، كە ئەمەیش بووەتە هۆی خوڵقاندنی گیروگرفتی زیاتر لە نێوان هەردوولادا، من دەمەوێ بە رەواندزی رابگەیەنم كە لەو لێدوانەیدا دوو لێدوانی مالیكی تێكەڵ بەیەكتر كردووە، یەكێكیان لە دیدارێكیدا بووە لەگەڵ وەفدێكی شاری هەڵەبجە و ئەویتریان لە وەڵامی چەند پرسیارێكی میدیاكان بووە، كە دەقەكەی لە تۆڕی مەڵبەندی نیشتمانی بۆ راگەیاندن بڵاوكراوەتەوە.
لە لێدوانی یەكەمیدا مالیكی دەڵێ:(پەیوەندی قوڵ و بەرپرسیارێتییەكی هاوبەشمان هەیە بۆ خزمەتكردنی مرۆڤی كورد و، هیوادارین سەركردایەتی كوردی رێمان پێبدات بۆ ئەوەی ناوچەكە ئاوەدان بكەینەوە، ئێمە یەك گەلین، بەڵام لە دوو نەتەوەی كورد و عەرەب و چەند نەتەوەیەكی دیكەی وەك توركمان و ئاشووری و ئێزدی و شەبەك).
هەر لەو لێدوانەیدا مالیكی ئەمەش دەڵێ:(برای بەڕێزم مام جەلال كە سەرۆك كۆمارە رۆڵێكی باشی هەیە لە یەكخستنی ریزەكان و چارەسەركردنی ئەو گیروگرفتانەی كە لە پرۆسەی سیاسییدا روودەدەن، هەروا سەبارەت بە برامان مسعود بارزانی و كەسانی دیكەی وەك حەمەی حاجی محمود و برایانمان لە یەكگرتووی ئیسلامی و كۆمەڵی ئیسلامی).
بەڵێ ئەمەیە پوختەی قسەكانی مالیكی لەگەڵ وەفدی هەڵەبجە كە بە هیچ شێوەیەك ئاماژە بەوە نادات كە گەلی كورد گەلێكی ئازایە یان كوردی خۆش دەوێت، مالیكی لەو لێدوانەیدا وا پیشاندەدات كە گوایە سەركردایەتی كورد رێگرە لەبەردەم بەشداری حكومەتی فیدڕاڵ لە ئاوەدانكردنەوەی كوردستاندا، كە ئەویش هیچ ئەسڵ و ئەساسێكی بۆ نییە، چەند جار سەركردایەتی كورد داوای لە حكومەتی فیدڕاڵ كردووە، كە بودجەیەك بۆ ئاوەدانكردنەوەی هەڵەبجە تەرخان بكات، بەڵام ئەم داوایەی هەمیشە لەلایەن خودی مالیكیەوە پشتگوێ خراوە.
باشە كەس ئەوە ناپرسێ: لە كاتێكدا مالیكی ئامادە نییە بودجە بۆ ئەنجامدانی هەڵبژاردنی كوردستان تەرخان بكات، ئەی چۆن دەتوانێ بودجە بۆ ئاوەدانكردنەوەی هەڵەبجە دابنێ؟ خۆ تەرخانكردنی بودجەی هەڵبژاردن یەكێكە لە ئەركەكانی حكومەتی فیدڕاڵ، مادامەكی كۆمسیۆنی باڵای سەربەخۆی هەڵبژاردن بەخۆی سەرپەرشتی ئەو هەڵبژاردنە دەكات، كاتی خۆی مشتومڕێك لەسەر تەرخانكردنی ئەو بودجەیە لە ئارادابوو، كە ئایا حكومەتی هەرێم دابینی بكات یان حكومەتی فیدڕاڵ، ئەوكات هەرێم دەیگوت با كۆمسیۆنی یان دەستەی هەڵبژاردنی كوردستان ئەنجامی بدات، بەڵام حكومەتی فیدراڵ بەو شێوەیە وەڵامی هەرێمی دایەوە كە ئەگەر پرۆسەكە كوردستان ئەنجامی بدات دەبێ بەرگەی بودجەكەشی بكات، كەچی ئێستا كۆمسیۆنی باڵای سەربەخۆی هەڵبژاردن ئەنجامی دەدات و بودجەكەشی لە(17%)ەكەی بەركەوتی هەرێمی كوردستان كەم دەكرێتەوە..!!.
با فەرزكەین مالیكی ئامادەیە هەڵەبجە ئاوەدان بكاتەوە، باشە ئەی كەس لە خۆی ناپرسێ لە كاتێكدا مالیكی ئەو بایەخە نادات بە كوردی فەیلی بەغدا و كوردی كەركووك و كوردی موسڵ و كوردی خانەقین، كەچی مەرەقیەتی خزمەتی هەڵەبجە بكات؟ ئەی ئەگەر ئەوكارەی مالیكی بۆ مەلعەنەت نەبێ ئەی بۆ چییە؟ هەر كەسێك بە وردی سەیری ئەو ئاخاوتنەی مالیكی بكات بۆی دەردەكەوێ كە چۆن ئێزدی و شەبەك بە دوو نەتەوەی جیا لە كورد دادەنێ، ئایا ئەمە دەستێوەردان نییە لە كاروباری هەرێم، ئایا ئەمە پێچەوانەی دەستوور نییە؟ ئایا ئەمە گەمە نییە بە ئیرادەی گەلی كوردستان؟
خۆ ئەم ئاخاوتنەی مالیكی باشتر نییە لە ئاخاوتنە دووەمەكەی مەبەستیش لێرە ئەو كۆنگرە رۆژنامەنووسییەیە كە مالیكی لەگەڵ ژمارەیەك لە رۆژنامەنووسان سازی دابوو، ئێمە بەبێ دەستكاری و وەك نموونە دەقی وەڵامی ئەو پرسیارانە بڵاودەكەینەوە تا خوێنەر خۆی سەر پشك بێ، كە ئایا میدیای كوردی هیچ دەستكارییەكی لەو قسانەی مالیكی كردووە؟
1- لە وەڵامی پرسیارێك سەبارەت بە دۆخی پارێزگای مووسڵ كە (ظافر الجنابی) لە سایت(نقاش) كردبووی، مالیكی دەڵێ:
(بێ شك بارەكە زۆر ترسناكە و هەندێ هەڵسوكەوتی هێزی پێشمەرگەش كە رێگرن لەبەردەم كاری حكومەتی مەحەلی خۆی لە خۆیدا كودەتایەكە لەسەر شەرعییەت و هەڵبژاردن، چونكە حكومەتی مەحەلی هەڵبژێردراوە و لە ئەرك و دەسەڵاتیشدایە كار لە هەر بستێكی ئەو پارێزگایەدا بكات، هەڵوێستی ئێمە پشتگیری كردنە لە شەرعییەت و ئەنجامی هەڵبژاردن و كاریش بۆ دۆزینەوەی چارەسەرێكی ئارام دەكەین بۆ ئەو گیروگرفتانەی كە هەن، ئەویش بەمەبەستی كاراكردنی یاسا و نەهێشتنی گرژی، جارێكی دیكەی تەئكید لەوە دەكەمەوە كە بوونی هێزەكانی پێشمەرگە بەبێ رەزامەندی حكومەتی مەركەزی لە دەرەوەی سنووری هەرێم نایاساییە).
2- لە وەڵامی پرسیارێكی(فەرمان عەبدولڕەحمان) پەیامنێری رۆژنامەی (رۆژنامە) سەبارەت بە هەڵبژاردنی داهاتووی پەرلەمانی كوردستان و مەترسی قەوارە سیاسییەكانی بەشدار بوو لە كردەی ساختەكاری و ئەنجامدانی توندوتیژی، مالیكی دەڵێ:( بەپێی رێسا یاساییەكان ئەو هەڵبژاردنە لە ژێر سەرپەرشتی كۆمسیۆنی باڵای هەڵبژاردن و رێكخراوە عێراقی و نێودەوڵەتییەكانەوە ئەنجام دەدرێ، بەڵام پاراستنی ئەو هەڵبژاردنە ئەركی پۆلیس و ئاسایشی هەرێمە، بۆ ئەوەی كاری ساختەكاری ئەنجام نەدرێ پێویستە لەسەر قەوارە بەشداربووەكان پشت بە نوێنەرانی خۆیان ببەستن لە چاودێریكردنی هەڵبژاردن و ئاگاداركردنەوەی كۆمسیۆن و حكومەتی ناوەندی بەو كارانە تا بێنە چارەسەركردن.
3- لە وەڵامی پرسیارێكی (مهدی الصافی) كە ئیعلامییەكی سەربەخۆیە سەبارەت بە هەمواركردنی دەستوور و چارەسەركردنی خاڵە ناكۆكەكانی نێوان مەركەز و هەرێمدا، مالیكی دەڵێ:( ليژنەیەك بۆ هەمواركردنی دەستوور دانراوە، بەڵام روون نییە كە ئایا دەتوانێ ئەو دەستوورە هەموار بكاتەوە و سیاسەتی بەشكاری و كۆنی تەوافوق رەتبكاتەوە؟ چونكە ئەگەر هێزە سیاسییەكان خاوەن یەك ئیرادە و یەك دید نەبن سەبارەت بە شێوەی دەوڵەتی عێراق، ئەوا هیچ هەمواركردنێك ئەنجام نادرێ، هیوامان وایە گۆڕانكاری لە ئەنجوومەنی نوێنەرانی داهاتووودا بكرێ بۆ ئەوەی دوور لە فشاری بەرژەوەندی توێژ و تایفەو حزبێك بتوانین ئەو دەستوور هەمواربكەینەوە، من وا دەبینم دەسەڵات لە ئەسڵدا بۆ حكومەتی ناوەندییە و (استثناء)یش بۆ هەرێم و پارێزگاكانە، نەك وەك دەیبینین و پێداگیری لەسەر دەكرێ، دەسەڵاتی سەرۆكایەتی كۆمار و سەرۆكایەتی ئەنجوومەنی وەزیران بەشێوەی سیستەمەكە گرێدراوە، ئەگەر پەرلەمانی بێت ئەوا تەواوی دەسەڵاتەكە بۆ سەرۆك وەزیرانە، ئەگەر سەرۆكایەتیش بێ ئەوا دەسەڵاتەكە بۆ سەرۆك كۆمارە و تێكەڵكردنی ئەو دوو سیستەمەش وەك ئەوەی فەڕەنسا رەتدەكەینەوە، چونكە لەگەڵ واقیعی عێراقدا ناگونجێ).
4- لە وەڵامی پرسیارێكی(زیدان الربیعی) پەیامنێری رۆژنامەی (الخلیج الاماراتیة) و سەبارەت بە كەركووكویش، مالیكی دەڵێ: (بەپێی بۆچوونی لایەنەكان و هەروا گۆڕەپانی نیشتمانی و هەتا لەلای نەتەوەیەكگرتووەكانیشدا، چارەسەری كێشەی كەركووك لەوەدایە كە بارێكی تایبەتی پێ بدرێ و، ئێمەش پشتگیری لەو چارەسەرە دەكەین، چونكە ئەو چارەسەرە رێنادات بەرمیلە بارودەكە بتەقێتەوە و، رێگریشە لەبەردەم بەنێودەوڵەتیكردن و هەر دەستێوەردانێكی ئەقلیمی و نێودەوڵەتی لەو كێشەیەدا).
5- لە وەڵامی پرسیارێكی(علي احمد حسن الیاسی) پەیامنێری كەناڵی(الحرە) سەبارەت بە گرنگی ئەنجامدانی دیداری راستەوخۆ لەگەڵ خەڵكی كوردستان و ئاگاداربوون لەگیرگرفتەكانیان، مالیكی دەڵێ:( ئەمە بە تەئكیدەوە راستە، من پەیوەندییەكی بەردەوامم لەگەڵ هەندێ سەركردە و رۆشنبیر و رۆژنامەونووسان هەیە، چونكە ئەمانە میللەتی ئێمەن و دیكتاتۆرییەت چەند دەیەیەك غەدری لێكردوون، بۆیە مافی ئەوەیان هەیە كە جێی بایەخی ئێمەبن، ئەگەر هەندێ لە برا كوردەكان نەبووایە ئەم ئەركەم راستەوخۆ دەخستە سەر شانم، بەڵام بەراشكاوییەوە دەڵێم هەندێ لە پارت و سەركردایەتی سیاسی خەڵك دژ بە حكومەتی ناوەندی و سەرۆكەكەی و هەروا وەزیران هاندەدەن، كە ئەویش بەربەستێكە لەبەردەم كرانەوە، بەڵام پاش ئەركێكی زۆر هاووڵاتی كورد ئێستا تێگەیشتووە كە حكومەتی ناوەندی لەگەڵیدایە نەك دژ، دەرگەمان كراوەیە بۆ پتەوكردنی پەیوەندییەكان و نەهێشتنی ئەو كەربەی كە هەندێ لە میدیاكانی هەرێمی كوردستان، بەهۆی پاشینەی سیاسییانەوە، بڵاوی دەكەنەوە.
6- لە وەڵامی پرسیارێكی(صفاء الهادی) لە رۆژنامەی (الصباح) و سەبارەت بە پشتبەستن بە ئیستحقاقاتی هەڵبژاردن و فەشەلهێنانی دیموكراتییەتی تەوافوقیش، مالیك دەڵێ: من لاگیری پرەنسیپی ئەو دیموكراتییەتە دەكەم كە ماف دەداتە زۆرینەی لە پێكهێنانی حكومەتدا، دەستەواژەی دیموكراتییەتی تەوافوقیش شتێكی نامۆیە لە دیموكراتییەت و بەڵكو دژیشێتی، من پێم وایە سیستەمی سەرۆكایەتی باشترە لە سیستەمی پەرلەمانی ئەگەر ئەمەی دواییان بەپێی ئیستحقاقاتی هەڵبژاردنەوە بێت، ئەگەر هەڵبژاردنەكەش راستەوخۆ لەلایەن گەلەوە بێت ئەوا هەر زۆر باشترە.
پاش خوێندنەوەی هەردوو لێدوانەكەی مالیكی كە لە دوو سەرچاوەی باوەڕپێكراوەوە وەرگیراون، رۆژنامەی(البیان) ی حزبی دەعوە و سایتی مەڵبەندی نیشتمانی بۆ راگەیاندن كە سەر بە ئەمینداریەتی گشتی ئەنجوومەنی وەزیرانی فیدڕاڵە، پرسیاری ئێمە ئەوەیە:
كێ ناكۆكییەكانی نێوان بەغدا و هەولێری قوڵتركردۆتەوە، میدیای كوردی یان لێدوانەكانی خودی مالیكی؟
ئەوەی لە میدیا كوردییەكان بڵاوكراونەتەوە لەگەڵ ئەو دوو سەرچاوەیەی كە ئاماژەمان پێكردن رێكن، تەنها ئەو هەواڵە نەبێ كە گوایە مالیكی گوتوویەتی بەمەبەستی چارەسەركردنی كێشەكانی نێوان هەرێم و بەغدا چاوەڕانی ئەنجامی هەڵبژاردنی داهاتووی پەرلەمانی كوردستانە، كە بە بۆچوونی ئەو میدیانە مەبەستی مالیكی د. بەرهەم ساڵحە، بەمەیش مالیكی بەپێی قسەیەكی د. مەحمود عوسمان دەیەوێ درزێك بخاتە نێو پارتی و یەكێتییەوە، لە راستیدا من زۆر بە دوای ئەو لێدوانەی مالیكی گەڕام بەڵام نەمدۆزیەوە، تەنیا وەكو هەواڵ نەك دەق بڵاوكراوەتەوە بەبێ ئەوەی ئاماژە بەسەرچاوەكەی بكرێ، كە ئەمەیش وامان لێدەكات زۆر پشتی پێ نەبەستین، و بۆ ئاگاداریش ئەم هەواڵە یەكەم جار لە سایتێكی عەرەبی نەك كوردی بڵاوكرایەوە...!