دووسبەی یادی 15 ساڵەی هەفتەنامەی گوڵان ە ئەو كاتەی گوڵان دەرچوو لەم كوردستانە یەك رۆژنامەو گۆڤاری بەناو ئەهلی و ئازادیش نەبوو، گوڵان ئەم چەخماخەی لێدا،لە ماوەی دوو ساڵ و نیوی رابردووشیدا چەخماخەیەكی تری لێدا، ئەو چەخماخەیە بووە مۆرك و میتۆدێك بۆ گوڵان و دواتریش زۆر رۆژنامەو گۆڤاری تر بە باشیان زانی پەیڕەوی لەو میتۆدە بكەن. میتۆدێك بۆ شێوازی راپۆرت نووسین، میتۆدێك نە رەفزكردنەوەی پێشوەختەیە، نە پیا هەڵگوتنە، میتۆدێك تەنها پشت بە داتاو زانیاری دەبەستێ، بێ ئەوەی یەك وتاری وەرگێڕدراومان هەبێ كە سەرچاوەكەی لە گۆڤارێك یا رۆژنامەیەكی بڵاوكراوەوە هاتبێ، میتۆدێك بڕوامان بە گفتوگۆی زانستیانەو هێمنانە هەیە،بۆ گەیشتن بە حەقیقەت بێ ئەوەی بوختان بۆ كەس یا بۆ هیچ لایەنێك دروست بكەین. ئاخر ئیتر نابێ راستییەكان با تاڵیش بن لە خەڵكی بشارینەوە.
گوڵان بە ئەركی نیشتمانی خۆی دەزانی ئەو كاتەی سووپای تورك سنووری هەرێمی كوردستانی دەبەزاند، ئێمە لە ئەستەنبۆڵ گەورە رۆشنبیرانی توركمان دەدواند و پشتگیری ئەوانمان مسۆگەردەكردو راستەوخۆ خافیر سۆلانامان دەدواند و هەواڵی سنووربەزاندنی سووپای توركمان پێدەگەیاند و ئەویش نیگەرانی و ناڕەزایی خۆی دەردەبڕی بەرامبەر هەر ئاڵۆزییەك كە بۆ هەرێمی كوردستان دروست ببێ و لە گوڵان بڵاوماندەكردەوە..
ئەمڕۆ كاری رۆژنامەنووسیی تەنها گواستنەوەی هەواڵ نییە، چ جای ئەوەی ئەو هەواڵە زۆر جاریش بێسەروبەر بێ، چ جای ئەوەی ئەو هەواڵە دژی بەرژەوەندییە نیشتمانییەكانیشمان بێت. بۆیە گوڵان لەجیاتی بڵاوكردنەوەی هەواڵی رووت، هەمیشە بەدوای رەهەندەكانی هەواڵەكان چووین، هەمیشە پێشینەو ئایندەی رووداوەكانمان گفتوگۆكردووە، هەر ئەوەش كاری پڕۆفیشناڵانەیە.
گوڵان سەربڵندە بەوەی كە یەكەم بڵاوكراوەی كوردی بووە گەورە رۆشنفكرو نووسەرانی توركی دواندووەو نەخشەی نوێی بۆ میدیای كوردی كێشاوەو دواتر لێرەو لەوێ بڵاوكراوەی تر بە باشیان زانیوە لاسایی بكەنەوە، ئەرشیفی گوڵان و تەواوی بڵاوكراوە كوردییەكانیش لەبەردەستمانن بۆ سەلماندنی ئەو راستییانە.
ئێمە لەگەڵ خودی ستافی نووسەران و داڕێژەرانی راپۆرتی بەیكەر ?هاملتۆن دیمانەی تایبەتیمان دەكرد، پەنامان بۆ هیچ سەرچاوەیەكی بڵاوكراوەی رۆژئاواییش نەدەبرد. قونسولی ئەمریكا لە عەنكاوە زۆر مەبەستی بوو سەردانی گوڵان بكات، ئیتر دوای پەیوەندیكردنیان و دیاریكردنی كات هاتن بۆ لامان، ئەوانیش وتیان بەلامانەوە سەیرە كە ئێوە چۆن دەتوانن ئەو گەورە سیاسەتمەدار و پسپۆرانەی ئەمریكاو بەریتانیا بدوێنن، لەكاتێكدا وەك ئەوان دەیانوت ئەم كەسانە مانشێتی سەرەكی رۆژنامە بەناویانگەكانی ئەمریكان.
بەڵام ئایا ئەمە قۆناخی كۆتاییە و دەبێت ئیتر دەستەوەستان بین؟ ئەی مەگەر ژیان و شارستانێتی رۆژ لە دوای رۆژ زیاتر لە خزمەتی مرۆڤایەتی نەبن .داهێنان كۆتایی نایە،وەك فیكتۆر هۆگۆ و لینین دەڵێن ژیان سەوزەو تیۆر خۆڵەمێشییە، واتا هەموو تیۆرەكان تەنها بۆ سەردەمێك زیندوون و دواتر دەمرن، بەڵام ژیان هەمیشە سەوزو بەردەوامە،بۆیە داهێنانیش هەمیشە بەردەوامە، گوڵان تا رادەیەك لە ماوەی ئەو دووساڵ و نیوەی رابردوویدا هەوڵیداوە مەعریفە ببەخشێ، بەڵام دڵنیاتان دەكەمەوە خواستی ئێمە ئەوەندە نەبووە، لە دەستپێكی ساڵی نوێدا كە پێ دەنێینە ساڵی 16 مین، گرنگی زیاتر بە بەخشینی مەعریفە دەدەین، با هەر (506)گۆڤارو (281) رۆژنامەو(49) بڵاوكراوەی جۆراو جۆر لە كوردستان دەربچن، گرنگ ئەوەیە ژمارەی گۆڤارو رۆژنامە باشەكان ناگەنە پەنجەی دەستێك، ئاخر داهێنان و مەعریفە بەخشین كاری ئاسایی نین .
گوڵان هەوڵدەدات لە (6) مانگی داهاتوویدا،گرنگی زیاتر بە مەعریفە بدات، دەبێت ئەو رچەیەش بشكێنین وەك چۆن لەگەڵ دروستبوونیدا توانی زەمینەی رۆژنامەگەریی ئازاد بهێنێتەدی، توانی خوێنەری كورد لەسەر راو رای جیاواز ئاشنا بكات، ئاوەها كاتی ئەوە هاتووە دیالۆگ بە مەعریفەوە بۆ پرسە گەرمەكان و سیاسەتی نیشتمانیمان بكەینە كاڵای پڕ بە باڵای گوڵان.
لێرەوە دەبێ لە ناخەوە رێزی زۆر و سوپاسی گەرمی برای خۆشەویستم كاك سەرۆ قادر بكەم كە دامەزرێنەرو داڕێژەری رەوت و ئاراستەی گوڵان بوو، توانی رچەی كۆن لە بواری رۆژنامەگەری كوردیی بشكێنێت و بناغەیەكی پتەوی دامەزراند، كە ئەگەر ئەو بناغەیە نەبوایەو ئەگەر ئێستاش پشتگیری كاك سەرۆ قادر كە هەمیشە وەك هاوكار نەك بەرپرس مامەڵەمان لەگەڵ دەكات و هاوكاریمان دەكات، هەروەها ئەگەر چەند برایەكی خۆشەویست و حەق خواز و پەرۆشی رۆژنامەگەری كوردیی وەك برایانی خۆشەویستم كاك كاروان ئاكرەیی وكاك فەیسەڵ دەباغ و سەركردایەتی سیاسی كوردستان نەبوونایە، رەنگە گوڵان نەیتوانیبایە ئەو میتۆدە نوێیە دابنێت و بە ئاراستەیەكی دیكە بڕۆیشتایە.ئەمە مێژووە نابێ ماندوو بوونی ئەوان ون بكرێت .