هەبوونا یاسایا چ ئەو یاسایێن خودایی ئەوێن درێکا پەیامبەرا دهێنەخار یان ئەو یاسایێن ژلایێ شاهرەزایا لدیف سرۆشت و پێتڤی یا دهێنە دارشتن بۆ رێکخستنا جڤاکی و دابینکرنا دادوەریێ نە .
لەوما جڤاکێن زیندی و هشیار هەردەم پشتەڤانێن بجهــ ئینانا یاسایانە ، هەر جڤاکەکێ پشتەڤانیا دەسهەڵاتێ و سازیێن دادوەری نەبیت جڤاکەکێ مری یە و دێ بەرەڤ هەڵوەشاندنێ و وێرانکرنێ چیت .

حزبێن سیاسی ژی سازیەکا جڤاکی نە و ئەرکێ وان یێ سەرەکی رێکخستنا جڤاکی یە ب باشترین شێوە و پشتەڤانیکرنا سازیێن دادوەری یە و ئاڤاکرنا دەسهەڵاتەکا دادوەرانەیە بۆ بەختەوەرکرنا جڤاکی و چەسپاندنا دادوەریێ ، کەسێن سیاسی ژی ب ئەرکێ سەرکردایەتی و رێڤەبرنا وان حزبا رادبن . لەوما پێتڤی یە سەرۆک و سەرکردێن حزبێن سیاسی بەری هەر کەسەکی داکۆکیێ ل سەروەریکرنا یاسایێ بکەن و ببنە پێشەنگ بۆ خەلکەکێ دیتر ژی ، بتایبەت ئەگەر ئەو حزب پشکەک بیت ل دەسهەڵاتێ .

سەروەریا یاسایێ و دادوەریا جڤاکی پشکەکا سەرەکیا پرۆژە و پلانا هەمی پارتیێن سیاسی یە بۆ جەماوەری ل پرۆپاکندێن هەلبژاردنان و جڤاکێن زێندی ژی پشتەڤانیا وێ پارت و رێکخستنا سیاسی دکەن ئەوێن سەروەریا یاسایێ دپارێزن و کار بۆ دادوەریێ دکەن .

مخابن هێشتا پشکەکا هندەک حزبێن سیاسی و سەرکردێن وان ل هەرێما کوردستانێ ، ئەوێن د ناڤەرۆک د پلان و پرۆژێن خودا پڕوپاکندێن داکۆکیکرنێ ل سەروەریا یاسایێ دکەن لێ د پراکتیک دا دژی بریارێن سازیێن دادوەریێ و یاسایێن وەڵاتی نە و راگەهاندنا خۆ و سۆشیال میدیایێن خۆ ئازراندینە بۆ شێواندنا دەسهەڵاتا دادوەریا کوردستانێ و نەشرینکرنا دەسهەڵاتا هەرێما کوردستانێ ژپێخەمەت بەزرکرنا ڕاستیا لپێش چاڤێن خەلکی و د وێ باوەریێ دانە بڤان پیلان و سەرەداریا دێ سرنجا خەلکی ڕاکێشن و ل هەلبژاردنێن داهاتی شکەستێن خۆ یێن بەرێ کەنە سەرکەفتن ..!

نەخاسمە ئەوێن خۆ ب سەرکردە دینن و دەستێن وان ب چەندین تاوانێن نشتیمانی و خیانەتکاری و مرۆڤایەتی د خوینێرا سۆر بووی .
بناڤێ پشتەڤانیا رەئیا ئازاد پشتەڤانیا وان تاوانباران دکەن ئەوێن ب بەڵگە پیلانێن مەترسی بۆ تێکدانا ئاسایشا جڤاکی دارشتی و درێکا سازیێن دادوەریێ را بریارا سزادانا وان دەرکەفتی .

ئەڤ هەڵویست و سەرەدەریێن وان حزب و کەسایەتیێن سیاسی ئەوێن بەڕەڤانیێ ل تاوانباران دکەن ، هەڵویست و ڕەفتارێن سیاسی نە و دژایەتیەکا راستەوخۆ یە ل حکومەتا هەرێما کوردستانێ و پارتیا دەستهەڵاتدار .
ئەگەر ئەڤ حزب و کەسایەتیە د خەما خەلکی دا بن و داکۆکیکارێن سەروەریکرنا یاسایێ بن، پێتڤی بوو درێکێن یاسایی را بەرەڤانی ل وان تاوانبارا کربا نەک بەرەڤ مەزنکرنا کەسیێ چووبان درێکا راگەهاندنێ و سۆشیا میدیایێ بۆ بەرژەوەندێن سیاسی .

دڤێرەدا پسیارەک دهێتە پێش ، ئەرێ ئەگەر ئەڤ سیاسیێن پشتەڤانیا تاوانباراێن تێکدەرێن ئاسایشا جڤاکی بکەن ، دەستهەڵاتدارێن وەڵاتی بن ، ڕەوشا وەڵاتی و دەستهەڵاتا دادوەریێ دێ بەرەڤ چ ئاقار چیت و د ڕەوش دا بیت ..؟ !

ژلایەکێ دیتر ئەگەر تاوانبار رۆژنامەڤان و چالاکڤان بن ، پێتڤی یە بەری خەلکەکێ ئاسایی، ئاسایشا جڤاکی بپارێزن ، چونکی کەسانێن هشیار و رەوشەنبیرن .
ئەگەر خەلک یێ زیندی بیت، هەردەم دێ پشتەڤانیا دەسهەڵاتا دادوەریێ و سەروەریا یاسایێ بیت و ب سیاسی و پارتیێن نەزیندی بسهردا ناچیت و پێتڤی یە سازیێن دادوەریێ ژی ب دادوەرانە و ب بەڵگەهــ سەرەدەریێ لگەل رووسیێن تاوانان کەت و بۆ رئیا گشتی بەرچاڤ کەت .

ئەز باوەرم کۆ دەسهەڵاتا دادوەریا کوردستانێ بێ بەڵگێن یاسایی بریار لسەر ڤێ دووسیێ نەدایە و برپڕانیا خەلکێ مە یێ هشتیارە و ئەڤ پرۆپاکندێن هندەک کەس و ئالیێن سیاسی نەشێن رەئیا جادێ ڕابکێشن و راستی بۆ خەلکی و هەمی ئالیا دیار بیت .
ئەگەر یاسا و سزادان ژی دناڤ جڤاکی دا نەبن ، وەڵات دێ بیتە ئێخسیرێ یاسایێن دارستانا ..