لدەم ژمێرێن داویێ یێن پێشکێشکرنا قەوارە و هەڤپەیمانیان بۆ هەلبژاردنێن پێشوەخت یێن جڤاتا نونەرێن عیراقا فیدارل، ( ئێکەتیا نشتیمانی کوردستان و بزاڤا گۆڕان ) هەڤپەیمانیە بناڤێ هەڤپەیمانیا کوردستانی پێکئینایە و رێکەفتن هاتیەکرن یەکگرتوویا ئیسلامی و کۆمەڵا دادگەری ) ی ژی ل هندەک دەڤەرا پشتەڤانیا کاندیدێن وان بکەن ، ئەڤە ل دەمەکی دایە کۆ
خەلکێ کوردستانێ چاڤەرێ بوو هەمی هێز و ئالیێن کوردستانی بۆ ڤان هەلبژاردنان ب ئێک لیست وەکی هەڤپەیمانیەکا کوردستانی پشکداری کربا ، چونکی عیراق د رەوشەکا نوو دایە نەخاسمە بەرامبەر هەرێما کوردستانێ، چونکی ژمارەکا هێزێن چەکدار و میلیشیایێن عیراقی ئەوێن سەر ب حزب و گرۆپێن توندڕەو یێن مەزهەبی گەفێن بەردەوام ل هەرێما کوردستانێ دکەن و گەهشتیە ئاستێ هەوڵدانا تێکدانا ڕەوشا ئاراما کوردستانێ ب مۆشەک و دروونا ، ژبلی گەفێن سیاسی و ئابووری .
ئەڤ گەف و هەوێن توندڕەوێن عیراقی دژی هەرێما کوردستانێ ژئەنجامێ دووبەرەکی و نەئێکرێزیا ئالیێن سیاسی یێن کوردستانێ و نەبوونا ئێک گۆتاریا سیاسی یە ، لەوما ئێکرێزیا کوردستانێ باشترین گاڤ و پلانە بۆ بەرهنگاری و زاڵبوونێ بەرامبەر وان گەف و پیلانان .

راستە پێکئینانا هەڤپەیمانیا و رێککەفتنا پارتیا لسەر بەرنامە و پرۆژەکی بۆ بدەست ڤەئینانا ژمارەکا زێدەتر یا کورسیێن پەرلەمانی ب دەنگێن خەلکی ، ل ئەڤ هەڤپەیمانیە و رێککەفتنە پشتی سەرکەفتنا پارتی دیموکراتی کوردستان لسەر ڤان پارتیا دهێت ل هەلبژاردنێن بەری نهۆ یێن جڤاتا نوونەرێن عیراقێ و پەرلەمانێ کوردستانێ ، ژلایەکێ دیتر ڤێ چەندێ نیشانێ کودەتایەکا سپی دژی پارتی لێ دیار دبیت ، چونکی ئەڤ هەرچار پارتیە ژلایێ هزری و ئایدیولۆژی ژێک جودانە و د هندەک بوواران دا هەڤدژی ئێکن بتایبەت دگەل پارتیێن ئیسلامی ، ئەڤ چەندە دێ بیتە ئەگەرێ دابەشبوونا جەماوەرێ وان پارتیا و ل کۆنترۆل دەرکەفتنێ و زیان گەهیتە پارتیێن بچیک دناڤ وێ هەڤپەیمایێ و رێکەفتنێ و پلانا وان وەکی وان دڤێت سەرناکەڤیت ، ئەگەر دەستێوەردان و فێلکرن د هەلژاردنان دا نەبیت و گەڤ ل دەنگدەرێن مۆچەخۆر و هێزێن لەشکری و ئەمنی نەهێتە کرن .
چونکی پڕانیا ڤان پارتیا ل هەلژاردنێن بووری باوەریا خەلکی لدەست دایە و بەردەوام دەنگدەرێن وان کێم بوونە ، ل پرسێن نەتەوی و نشتیمانی و ئەنجامدانا چاکسازیا ژی دیسان ڤان پارتیا هەڵویستەکێ ئەرێنی نەبوویە کۆ ئەڤرۆ پرس و مژارا گەرما جادا کوردستانی یە .

پارتی دیموکراتی کوردستان ژی وەکی مەزنترین و پڕ جەماوەرترین پارتیا عیراقی و کوردستانی و دەستهەڵاتدارترین پارتی ل کوردستانێ و هەلگر و داکۆکیکارا پرۆژێن نەتەوی و نشتیمانی و چاکسازی دکەڤیتە بن ئەزمۆن و هەڤڕکیەکا دژوار دا ، راستە ئەڤ هەلبژاردنە بۆ عیراقێ نە ، لێ زەنگەکە بۆ پارتی کۆ هەڤڕکێن وێ ئەگەر سەرکەفتن بۆ هەلبژاردنێن داهاتی یێن کوردستانێ ژی دێ هەمان رێک و رێکار گرن و ئەگەر بشێن دێ پارتی ل دەستهەڵاتێ دۆر کەن ، لەوما پێتڤی یە پارتی دیموکراتی کوردستان پامادەکاریێن باش بکەت بۆ لدەست نەدانا سەنگا خۆ یا جەماوەری و پێتڤی یە جەماوەرێ وێ ژی ڤێ هەڤپەیمانیێ و رێککەفتنێ بمەترسی لسەر پاشەرۆژا پارتیا خۆ ببینیت و پشکداریەکا بەرچاڤ و ب گەرم و گۆڕی بچنە سەر سندوقێن دەنگدانێ .
سەرکردایەتیا پارتی ژی کۆ دەسهەڵاتدارا کوردستانێ یە پێتڤی یە ب ئەنجامدانا چاکسازیێن بلەز و بنەڕەتی و چارەسەرکرنا پرسا مۆچێ فەرمانبەر و مۆچە خۆران ڤێ کۆدەتایا وان بهەڵوەشینیت و ئەنجامێن وێ بۆ جادا کوردستانی رابگەهینیت و هەر لایەنەکێ دژی چاکسازیا و زێدەکرنا داهاتێ حکومەتێ و کۆنترۆلکرنا دەروازێن سنووری بیت ب بەڵگە لسەر ڕاگەهاندنێ دیار بکەت ، ژلایەکێ دیتر دەست نیشانکرنا کاندیدێن پارتی بۆ هەلبژاردنێن عیراقێ یان یێن کوردستانێ پێتڤی یە لسەر بنەمایێ شیانا و دلسۆزیێ و رەزامەندیا خەلکی بیت ، ل خزم حزمانێ و بنەمالانێ و عەشیرەتگەریێ دوور بکەڤیت ، هەر وەسا بۆ گۆڕانکاریێن دناڤ حکومەتێ دا دهێنە کرن .

ئەز دبینم ئەڤ هەڤپەیمانی و رێکەفتنە ئامادەکاری نە بۆ پیلان و کۆدەتایەکا سپی دژی پارتی دیموکراتی کوردستان ژلایێ وان پارتیا ئەوێن بەری نهۆ د پیلان و کۆدەتایێن دژی پارتی سەرنەکەفتی و دووماهی فڕا وانە ، لێ دێ شکەستن و شەرمزاریەکا دیتر لسەر پیلان و خیانەتکاریێن خۆ زێدەکەن .