دادپەروەریا جڤاکی و إنّا لله وإنّا إليهِ رَاجعُون
غیاس خالد زێباری
لدەمێ گەشتا نەورۆزێ دناڤ سرۆشتێ جوانێ کوردستانێ دا مینا هەر ساڵ من هەوڵ دا دەلیڤەکێ ببینم بۆ نڤیسینێ، لدەمێ نڤیسینا خالێن بنەمایێن رێبازا بارزانی ل خالا دادپەروەریا جڤاکێ کۆ ئێکە ل خالێن سەرەکی یێن بنەمایێن ڕێبازا بارزانی، ئەز نزانم چەوا ( إنّا لله وإنّا إليهِ رَاجعُون ) پشتی هەردوو پەیڤێن دادپەروەریا جڤاکی هاتنە نڤیسین یان کۆپیکرن ..!
ئەڤە بۆ من تشتەکێ سەیر و حیبەتی بوو ، لێ ڕامانەکا مەزن ددەت، لەوما من ئەو بابەت پاش ئێخست و ئەڤ روودانە کرە گۆتارەک، چونکێ دناڤ ئایینێ پیرۆزێ ئیسلامێ دا ( إنّا لله وإنّا إليهِ رَاجعُون ) لدەمێ گەهشتنا پەیاما مرنا کەسەکی یا لدەمێ پشکداریێ د بەهی و تازیان دا دهێتە گۆتن ، ئەڤەژی نیشانە کۆ ئەڤ ڕستە پاشگرا وی کەسی یان وان کەسانە یێن وەغەرا داویێ دکەن و دناڤ ڤێ جیهانێ و ڤی جڤاکی بار دکەن و نەمینن .
ئەڤ روودانە بۆ من ئاماژەیەک بۆ کۆ دادپەروەریا جڤاکی دناڤ جڤاکێ مەدا یان نەمایە یان ژی بەرەڤ مرن و نەمانێ دچیت ، دیارە سەرەرای ڕاگەهاندنا چەندین پرۆژێن چاکسازیێ و دادپەروەریێ ژلایێ سەرۆکێ هەرێمێ و کابینێن حکومەتا هەرێما کوردستانێ وەکی پێتڤی سەرنەگرتی و لدیف حەز و هیڤی و ئۆمێدێن خەلکی نەکەفتینە وارێ جهئینانێدا ، خەلکی باوەری پێ نەمایە و ب چاڤێ مریاتیێ بەرێ خۆ دنەنە زڤراندنا دادپەریا جڤاکی ل کوردستانێ و ( إنّا لله وإنّا إليهِ رَاجعُون ) لسەر خاندی یە ..!
ژلایەکێ دیتر ڤێ چەندە هەستەک بۆ من درست کر کۆ ڤەگەڕاندن و چەسپاندنا دادوەریێ ل هەرێما کوردستانێ ب یاسا و پرۆژێن چاکسازیێ وەکێ پێویست ڤەناگەڕێت، بەلکی ب ڤەگەڕاندنا دەسهەڵاتا کوردستانێ و خەلکێ کوردستانێ بۆ بنەمایێن رێبازا بارزانی دادپەروەریا جڤاکی دێ دابین و بەرچەستە بن، ئەو ڕێبازا بەری نێزیکی سەد و پێنجی سالا دناڤ وێ دەڤەرا دەسهەڵات د دەستان جهێ یاسا و دەستووری گرتی و دادپەروەریا جڤاکی داین کری .
هەرچەندە دەلیڤێن دابینکرنا دادپەروەریا جڤاکی ژبەر لاوازیا هشیاریا رەوشەنبیری و یاسایی و نەبونا ژێدەرێن بەرفرەهــ و رەوشا تایبەتا جڤاکێ کوردستانێ یا وی دەمی زۆر کێمتر بوون، لێ پێشەوایێن رێبازا بارزانی شیان بسەر وان ئاستەنگ و بەهانەیان زاڵ ببن و دادپەروەریێ دابین ، ئەڤەژی ژ ئەنجامێ دوربینی و دلسۆزی و خەمخۆریا وان بۆ بوو گەل و وەڵاتی و جوداهی نەکرنێ بوو دناڤبەرا پێکهاتێن جڤاکی دا ، پێشەوایێن رێبازا بارزانی ب ئێک چاڤ تاکێن جڤاکی و دەورو بەرێن خۆ ددیتنن ، نەدگۆ ئەڤە فلان کەسە یان کۆڕێ فلان کەسی یە، لدەف وان مرۆڤ هەمی وەکی ئێک بوون .
ئەڤرۆ سەرەرای بلندیا ئاستێ ڕەوشەنبیریا خەلکی و هەبوونا دەسهەڵاتێن یاسا دانانێ و دادوەریێ و زۆر بوونا ژێدەرێن یاسایی ، دەسهەڵاتا هەرێما کوردستانێ نەگەهشتیە ئاستێ پێشەوایێن رێبازا بارزانی یا بەری نێزیکی سەد و پێنجی ساڵان ، بتایبەت سەردەمێن شێخ عبد السلام بارزانیێ ئێکێ و شێخ محمدێ بارزانی و شێخ عبد السلامێ دوویێ و شێخ احمد بارزانی و بارزانیێ نەمر .
پێتڤی یە دەستهەڵاتداریا کوردستانێ ڤێ نهێنیا رێبازا بارزانی بخوینیت و بکەتە رێ نیشاندەر بۆ ڤەگەڕاندن و چەسپاندنا دادوەریێ دناڤ جڤاکێ کوردستانێ دا ، ب دیتنا من ئاستێ دادپەروەریا جڤاکی ل کوردستانێ نەمریە و نەگەهشتیە وی ئاستی کۆ بێ هیڤی و ئۆمێد ببینین و ( إنّا لله وإنّا إليهِ رَاجعُون ) لسەر بخوینین .
ئەگەر دەستهەڵاتا کوردستانێ ئیرادەکا بهێز بۆ چاکسازیا و دادپەروەریا جڤاکی هەبیت و خەلکێ کوردستانێ ژی چاکسازخواز و دادپەروەرا دگەل گەندەڵکار و دژبەرێن دادپەروەریێ و دادوەریا جڤاکی ژێک جودا بکەن، دەسهەڵاتداریا کوردستانێ و حکومەتا هەرێمێ و سازیێن دادوەری دێ شێن بسەر قەیرانا زاڵ بن و دادپەروەریا جڤاکی دابین و بەرجەستەکەن .
