شترنج کۆ ب زمانێ چیرۆک و سەرھاتیێن کوردەواری دبێژنێ سەرترنجانێ ، ئێکە ژ یاریێن ھزری و لەشکری . دکەڤندا ئەڤ یاریە پێشەنگا یاریێن پاشا و سەرکردە و سیاسەتمەدارا بوویە ، ناپلیۆن پۆناپرت ئەو سەرکردێ مەزنێ جیھانی پلانا شەرا لسەر کەڤالێ شەرترنجێ دادرشت، یاریا سەرەکی یا ھێلەری ، شرشل ، گیڤارا، کاسترۆ و ئۆباما بوویە ، ژلایێ تۆڕەڤانێن مەزنێن جیھانی مینا شکسپێر و مارگیس یاریەکا سەرەکی بوویە .
زۆر شارستانی و وەڵات ھەڤڕکیێ لسەر داھێنانا وێ دکەن و ھەر ئێک خۆ ب خودان دزانیت، دناڤ پڕانیا وەڵات ئایین و جڤاکان دا بەڵاڤبوویە ، ھژمارەکا میر و خەلیفێن ئیسلامێ ژی حەژێکەر و یاریزانێن یاریا شترنجێ بوونە بتایبەت لسەردەمێ ھارۆن الرشید ، ئەڤ چەندە د چیرۆکێن دەڤۆکی یێن کوردەواری ژی دا ھاتیە .
بارزان نەمر ژی وەکی سەرکردێ گەلێ کورد و بزاڤا رزگاریخوازیا کوردستانی یاریزان و حەژێکەرێن ڤێ یاریا ھزری و ھەستیار بووریە ، ئەو یاریا کەسێن ھەستیار و ھشیار و خودان پلان و دووربین تێدا سەردکەڤن .
بارزانی نەمر وەکی سەرکردەکێ شۆرەشگێر ، گۆرەپانا سیاسی و لەشکری یا ناڤخۆ ودەور و بەر مینا پلانا سەرترنجانێ دخاند و شرۆڤە دکر ، ھەردەم لدەستپێکێ پلانا رێکا سەرکەفتنێ و کش مەلیک دادرشت و دەست نیشان دکر ، ھەردەم د پلانێن بەرھنگاریا لەشکر و ھێرشێن لایەنێ بەرامبەر ب ھزرمەندی و دووربینی دادرشت ، دزانی د چ چارگۆشە و کوژیاندا دێ رێکا ھێرشکرنێ ڤاڤێریت و چەوا سەرباز دێ رێکا فیلی ڤالاکەن و خۆشکەن کۆ بشێت رێکا خۆ بشەقینیت و لڤی کۆژیەی گەھیتە کوژیێ دیتر دربا خۆ وەشینیت و ب سلامەتی زڤریت ، یان چاوا دوژمنی بخافلینیت کۆ ھەسب ب بێ دەنگی چەپ و چیرا بکەت و بگەھیتە دناڤ دیوانخانا مەلیکێ دوژمنی و دربا ل سەرکردێن وان بدەت .

بارزانی نەمر شیا چارگۆشەیا سەرترنجێ بکەنە بازنەیەکا دائێخستی بۆ ھەڤرکا و وەزیرێ وی بێ منەتی شیر و مەتالا لدەور و بەر بوەشینیت و کەت و بڕ بکەت ، کەلھێن سەرترنجێ ژی بکەت پارێزەر و پەناگەھێن لەشکرێ خۆ و رێگریکرنێ ل نێزیکربوونا لەشگرێن دوژمنا .
د ھەمی یاریان دا سەرەرای گۆرینا یاریزانێن بەرامبەر بارزانی نەمر شیا سەرکەفتنێ بدەست بینت و پلانێن وان بھەڵوەشینیت , شیا شایێ بەرامبەر گەماوو و دوورپێچت بکەت و کۆ مرنا خۆ رابگەھینن .
ئەڤ سەرکەفتنێن بارزانی نەمر دبێ زیان و ماندیبوون و کش مەلیکی نەبوون ، لێ ھەردەم ب پلانێن ( ئەی ، بی و سی ) شیا رێکێن دەربازکرنا مەلیکی ل کشکرنێ دەرباز بکەت و بگەھینتە کنارێن ئارام و پاراستی ، ئەگەر پێتڤی با وەزیر دا خۆ کەنە قوربانی ژبووی بەردەوامیا یاریێ ھەتا سەرکەفتنێ .

گۆرەپانا سیاسی یا عیراقێ و ھەڤرکیێن سیاسی و لەشکری یێن دگەل کوردستانێ مینا چارگۆشەیا یاریا سەرترنجێ بوویە، بارزانی نەمر یاریزانێ سەرەکی بوویە بۆ پاراستنا مەلکێ خۆ کۆ کوردستانە ، بارزانی دڤان یاریان دا شیا ڤی پادشایی ( کوردستان ) ێ ب ماندیبوون و قوربانیەکا زۆر بپارێزیت و ئازادیێ و بەختەوەریێ بۆ وی و دەور و بەرێن وی کۆ خەلکێ کوردستانێ یە دابین بکەت و کش مەلیک و مات بەھرا یاریزانێن تیما بەرامبەر بیت کۆ رژێمێن ئێک لدیف ئێکێن عیراقێ نە .
دڤێرەدا ئاشکرا دبیت کۆ بارزانی نەمر ل دەسپێکێ ھەتا داویێ خودان پلان و ستراتیژیەکا دووربین و رێکخستی بوویە ، ھەستیاری و ھشیاریا وی بۆ رێکخستنا ناڤمالا خۆ و چەسپاندنا دادوەریێ و خاندنەکا دروست بۆ لایەنێن بەرامبەر فاکتەرێن سەرکەفتنێ و گەھشتنا ئارمانجا بوویە