رێکخراوێن جەماوەری و پیشەیی پشکەکا مەزن و کاریگەرا هەر جڤاکەکی نە، لەوما پشتەڤانیا وان بۆ هەر حزب و رێکخستنەکێ فاکتەرێ گەهشتنا وێ یە بۆ دەسهەڵاتێ یە .
ژبەر پێتڤیبوون ب هەبوونا ڤان رێکخراوا و کاریگەریا وان، پارتی دیموکراتی کوردستان پشتی دەمەکێ کێم لدامەزراندنا خۆ ل کۆنگرێ سیێ بریارا دامەزرانا ڤان رێکخراوا دایە و هەردەم پاڵپشت و هاریکارا وان بوویە بۆ بجهــ ئینانا ئارمانج و ئاڕەزۆیێن خۆ و رێکخستنا وان دناڤ ئێکەتیێن تایبەت دا ، مینا ئێکەتیا ئافرەتان ، ئێکەتیا قوتابیان و ئێکەتیا لاوان .

دەمێ شێست و هەشت ساڵایە پارتی دیموکراتی کوردستان خۆ لڤان رێکخراوا کریە خودان و بەردەوام پشەڤانیا مادی و مەعنەوی لێ دکەن و بەرەڤ ئاراستەیێن پیشەبوون و نشتیمانیێ دبەت ، لبەرامبەر ڤێ چەندێ ئەڤ رێکخراوە بووینە رێکخستنەکا جەماوەریا بهێز بۆ پارتی دیموکراتی کوردستان و پێگەهاندنا کادر و سەرکردێن زیرەک و شاڕەزا .
لسەر دەمێن شۆرەشێن چەکداری و رێکخستنێن نهێنی ژی رۆلێ ڤان رێکخراوا زۆرێ ئەکتیڤ و بەرچاڤ و کاریگەر یوویە و زۆر ل ئەندام و کادرێن وان هاتینە شەهید و بریندار و زیندانیکرن .

ئەگەر هزرا خۆ ل سەرکردێن پارتی و وان کادرا بکەین ئەوێن ب نوونەرایەتیا پارتی ووینە دناڤ سازیێن دیتر دا دێ بینین کۆ پڕانیا وان دناڤ ڤان رێکخراوا هاتینە پەروەردەکرن و پێگەهاندن ، و کادرێن سەرکەفتی و رەوشەنبیر و دلسۆز و دەستپاکن ، لەوما پێتڤی یە رۆلێ ڤان رێکخراوا بەردەوام بهێتە لەرچاڤگرتن و بۆ ڤێ قۆناغێ و قۆناغێن داهاتی پشتەڤانی و هاریکاریا وان یا ەردەوام بیت و کۆنگرێ چاردێ یێ پارتی زێدەتر مفای ل شیان و ئەزمۆنێن وان وەربگریت و دەرگەهێن بەرپرسیاریێ زێدەتر بۆ ڤالاتر بکەت، چونکی شیانێن وان یێن هزری و داهێنانێ و رێڤەبرنەکا ساخلەم و جەماوەری د زۆرن .

هەر پارتیەکا سیاسی ئەگەر پشتەڤانیا رێکخراوێن جەماوەری و پیشەیی هەبیت، پشتەڤانیا جەماوەری بۆ دابین دبیت، چونکی ئەڤ رێکخراوە ل چین و تۆێژێن جڤاکی پێک دهێن و دگەل ئێش و ئازار و داخازیێن وان دژین، ئەو دشێن پێتڤیێن وان دەست نیشان بکەن و رێکێن چارەسەریێ بۆ دەسهەڵاتێ و جهێن تایبەت دیار بکەن، ژلایەکێ دیتر ئەڤ رێکخراوە دشێن لگەل سەردەمێ بگۆنجن و سیاسەت و پلان و بەرنامێن سیاسی بگەهینە دناڤ هەمی ماڵان دا ، چونکی ڤان رێکخراوا پیشەدارێن خودان جەماوەری دناڤدا هەنە، وەکی وەرزشڤان و هۆنەرمەند و ....هتد کۆ بشێن کاریگەریێ لسەر جڤاکی بکەن ، دێ ڤێ کاریگەریا جەماوەری ئێخنە د خزمەتا وێ پارتیا پشتەڤانیا وان دکەن .

لسەر ئاستێ جیهانێ ژی ئەڤ چەندە یا هەمی پارتیێن سیاسی یان بەربژێرێن سەرۆکاتیێ پەنایێ دبەنە بەر کەسانێن هۆنەرمەند و وەرزشڤان و راگەهاندکرێن ناڤدار .
لسەر ئاستێ ئۆرگانێن خوارێ ژی یێن ڤان رێکخراوا ژلایێ مادی باشتر بهێنە پشتەڤانیکرن و رێکخستن و پەروەردەکرن و پێگەهاندن لسەر نەتەوایەتیێ و نشتیمانیێ و بنەمایێن رێبازا بارزانی ، دیسان فێری جڤاکناسیێ و ووتاربێژیێ و راگەهاندن و سۆشیال میدیایەکا ئەرێنی و کاریگەر بکەن .
وەکی دیار ڤان سالێن داویێ پشتەڤانیا ڤان رێکخراوا ژلایێ مادی وەکی پێتڤی نینە و کاریگەریەکا نەرێنی لسەر کار و چالاکیێن وان کریە .
ئەز باوەرم رێکخراوێن جەماوەری یێن پارتی دیموکراتی کوردستانێ ب چاڤەکێ مەزن بەرێ خۆ ددەنە کۆنگرێ چاردێ و چاڤەرێنە ئەڤ کۆنگرە ببیتە ئەگەرێ چارەکرنا پرس و ئاریشێن وان و دابینکرنا پشتەڤانیەکا زێدەتر .