نكۆڵی له‌وه‌ناكرێت كوردستان جیهانێكی بچكولانه‌ی پێكه‌وه‌ ژیان و برایه‌تیه‌، چونكه‌ له‌م به‌شه‌ جوگرافیه‌ی سه‌ر رووی زەوی به‌شێكی زۆری ئایدیا و نه‌ته‌وه‌ و ئاینزا و ئاین كۆبوونه‌ته‌وه‌ و به‌ ئاشیتی ده‌ژین، خۆشه‌ویستی كۆی كردوونه‌ته‌وه‌ و له‌ پێناو یه‌كبووندا ده‌مرن و ده‌ژین، ئه‌م مۆدیله‌ی پێكه‌وه‌ ژیان له‌هه‌رێمی كوردستان بێ وێنه‌ و ده‌گه‌مه‌نه‌، چونكه‌ لێره‌دا چه‌مكی ژیانكردن واتای خۆی هه‌یه‌.
مێژوو گه‌واهیده‌ری ئه‌وه‌یه‌ له‌خۆشی و ناخۆشیه‌كان یه‌ك ده‌نگی و ته‌بایی بوون له‌م هه‌رێمه‌ کوردستاندا چه‌ند به‌ تۆخی ڕەنگی داوه‌ته‌وه‌ واته‌ له‌كاته‌ سه‌ختیه‌كاندا چۆن پشت و په‌نای یه‌كتربووین و له‌ساته‌ دڵره‌فێنیه‌كاندا چۆن شادیمان به‌ش به‌شكردووه‌ لەم سونگەیەوە ئه‌نفال و راگواستن و كیمیاباران و راپه‌رین و ده‌سكه‌وتی ریفراندۆم .... هتد بەڵگەی حاشاهەڵنەگرن.
هاتنی پاپای ڤاتیكان وه‌ك مه‌رجعیه‌تی گه‌وره‌ی مه‌سیحیه‌كان بۆ عێراق و پاشان بۆ هەرێمی كوردستان ده‌لاله‌تێكی گه‌وره‌ی هه‌یه‌ كه‌ چۆن هه‌رێم به‌و ئیمكانیه‌ته‌ كه‌مه‌ توانیوویه‌تی كارسازی بكات بۆ پێكه‌وه‌ ژیان و ئاسایشی ئاین و مه‌زهه‌به‌كان، چونكه‌ ده‌زانین پاپا بیرۆكه‌ی پێكه‌وه‌ ژیانی به‌لاوه‌ پڕ گرینگترین شته‌ هه‌ر بۆیه‌ هاتنی بۆكوردستان و پێشكه‌شكردنی ئه‌و ووتاره‌ پێمانی ووت پێگه‌ی كوردستان ئه‌مری واقیعه‌ و جێگای خۆی گرتووه‌.
كوردستان به‌ سیسته‌مه‌ سیاسیه‌كه‌ی و جوگرافیاكه‌ی مێژوویه‌كی پرشنگدار ده‌نووسێته‌وه‌ كه‌نه‌وه‌كانی داهاتوو به‌ شانازیه‌وه‌ ده‌یگرێنه‌وه‌ كه‌ چۆن چۆنی ژیان له‌م نیشتیمانه‌ پڕ له‌هیوا و ئاشتی و خۆشه‌ویستی بۆ پێكه‌وه‌ژیانی هه‌مه‌جۆره‌ی موسڵمان و مه‌سیحی و كاكه‌یی و یەهودی و یه‌زیدی...تاد.
ئه‌م پێزانینه‌ی پاپا بۆ سه‌ركردایه‌تی كوردستان و به‌تایبه‌ت مەرجەعی باڵای کورد هێژا سه‌رۆك مه‌سعود بارزانی دیسان ئه‌وه‌مان پێده‌ڵێت مه‌رجه‌عیه‌تی كورد هه‌ر خۆیه‌تی و هه‌ر خۆشی شوناسی كورد و هه‌وێنی پێكه‌وه‌ ژیان، هه‌رخۆشی ره‌مزی مسۆگه‌ركردنی برایه‌تی یە، لەهەمانکاتدا لەمپەری ده‌ست درێژیه‌كانە.
له‌كۆتایدا ده‌بێت ئه‌وه‌ بلێین كوردستان له‌سه‌ر ئاستی نێوده‌وڵه‌تی پێگه‌ی به‌هێزتر دەبیت له‌ژێر رێنمایه‌كانی مەرجەعی باڵای کورد سەرۆک بارزانی.