پشتی چەندین سەرکەفتن و داستانێن مەزن یێن بزاڤا رزگاریخوازیا کوردستانی و شۆڕەشا مەزنا ئیلۆنێ بسەرپەرشتیا پارتی دیموکراتی کوردستان و ب رێبەریا نەمر مەلا مستەفایێ بارزانی بەرامبەر رژێمێن شۆفینی و دکتاتۆریێن عیراقێ بتایبەتی رژێما بەعسا سەدامی دناڤبەرا ساڵێن ( 1961 ـــ 1970 ) ، دڤان ساڵێن شۆرەشا چەکداری رژێمێن عیراقێ هەمی هەوڵ و شیانێن خۆ یێن چەکداری و سیاسی تەرخانکرن ژبووی ڤەمراندنا مەشخەڵێ شۆرەشا ئیلۆنێ ، ئەو شۆڕەشا پشتی رژێمێن عیراقێ دەرگەهێن دیالۆگ و دانۆستاندنا لسەر گرتی ب نەچاری بریارا چەکداریێ دای ، رژێمێن عیراقێ یێن ب شیانێن خۆ یێن چەکداری و رێژا زۆرا لەشکرێ خۆ و پشتەڤانیا وەڵاتێن هەرێمی تۆشی غرۆریێ بووی و د وێ باوەریێ دا بوون کۆ دێ شێن ب هێزا ئاگر و ئاسنی شۆرەشا ئیلۆنێ و بزاڤا رزاگریخوازیا کوردی ژناڤبەن .

لێ ئیرادە و باوەریا شۆرەشگێرێن کورد و خەلکێ کوردستانێ ب شۆرەشێ و مافێن گەلێ خۆ یێن رەوا و سەرکردایەتیا لێزان و پلان دارشتی ل هێز و شیانێن لەشکری و مادی یێن رژێمێا عیراقا داگیرکار بهێزتر بوون، لەوما ڤێ رژێما ستەمکار و شۆفینیا عیراقێ ب نەچاری و لاوازیا خۆ دەرگەهێن دیالۆگ و دانووستاندنێ ڤەکرن ، سەرکردایەتیا شۆرەشێ ژی دیالۆگ و دانووستاندن قەبۆلکرن ژبەکر ژبەرکۆ لسەر بنەما و باوەریبوون ب ئاشتیێ و مرۆڤ پەروەریێ هاتیە دامەزراندن ئەو ژی بنەمایێن رێبازا پیرۆزا بارزانی نە ، ئەڤە ژی دانپێدانا وان بوو ب شکەستن لاوازیا خۆ و بەرامبەرا شۆرەشا مەزنا ئیلۆنێ و خەلکێ شۆرەشگێر و وەڵاتپارێزێ باشوورێ کوردستانێ .
بەرهەمێ دانووستاندنێن دناڤبەرا سەرکردایەتیا بزاڤا رزگاریخوایا کوردی ب رێبەریا نەمر مستەفا بارزانی و رژێما عیراقێ رێکەفتنا دیرۆکیا ( 11 ) ئادارا سالا (1970) ێ یێ بوو کۆ داپێدانەکا فەرمی و نیڤ دەولەتی ب مافێن رەوا یێن خەلکێ کوردستانێ هاتە کرن د چارچۆڤێ عیراقەکا دیموکراسی و کوردستانەکا خۆدان ئۆتۆنۆمیەکێ ڕاستەقینە ، ئەڤەژی دەسکەفت و سەروەریەکا هەرە مەزن بوو بۆ خەلکێ کوردستانێ لسەر دەستێ پارتی و بارزانی ، ژبلی ڤێ چەندێ د دەمێ دانۆستاندنان دا ئاڤەدانی و سەقامگیریا کوردستانێ هێزا جەماوەریا شۆرەشێ زێدەتر کر و کاریگەریەکا ئەرێنی لسەر رەوشا ئابۆری و پەیوەندیێن دبلۆماسی ژی کر .

مخابن رژێما عیراقێ وەکی هەر جار ئاشتی و دانووستاندنی وەکی دەلیڤەیەک بۆ خۆ رێکخستنەڤێ و بهێزکرنەڤێ و دارشتنا پیلانا بکار ئینا .

پیلانەک جودا ل پیلانێن بەرێ ، ل پیلانا بریارا رەدکرنا ئاشتیێ و دانۆستاندنا و هێرشێن لەشکری پەنا برە بەر پیلانەکا نیڤ دەولەتی و دەست بەردان ل پشکەکا ئاخ و ئاڤا عیراقێ بۆ وەڵاتێن دیتر و سامانێ عیراقێ بەرامبەر پشتەڤانینەکرنا دۆزا سیاسی و شۆرەشا کوردی ، کۆ رێکەفتنا خیانەتکاریا جەزائیر دناڤبەرا عیراق و ئیرانێ ب ناڤبەندیا هواری بۆمدین ( محمد ابراهیم بۆخرۆبە ) سەرۆکێ وی دەمی یێ جەزائیر و ب چاڤدێریا وەڵاتێ ئێکگرتی یێن ئەمریکا .

راستە ڤێ رێکەفتنا خیانەتکاریا جەزائیر دربەکا گران و خەنجەرەکا ژەهراوی ب نەپەنی ل پشتا شۆرەشا کوردی و هیڤی و ئارمانجێن نشتیمانی یێن خەلکێ کوردستانێ دان و زیانەکا مەزن گەهاندە خەلکی ، لێ خرڤەبوون و کۆمبوونا ڤان وەڵاتێن مەزن دژی پلان و بەرنامە و سیاسەت و ستراتیژیەتا شۆرەشا ئیلۆنا مەزن و بزاڤا رزگاریخوازیا کوردستانی ب رێبەری و سەرۆکاتیا پارتی و بارزانێ نەمر ، دانپێدانەکا فەرمی و نیڤ دەولەتی یە ب رەوایەتیا ماف و ئارمانجێن نەتەوی و نشتیمانی یێن خەلکێ کوردستانێ و پێشڤەچوون و بهێزبوونا دۆزا سیاسی یا کوردستانێ .

راستە ئەڤ رێکەفتنا خیانەتکاریا نیڤدەولەتی بوویە ئاستەنگێن مەزن و گران بەرامبەر شۆرەشا کوردی و بزاڤا رزگاریخوازیا کوردستانی ل باشوور ، لێ نەشیا مەشخەڵێ شۆرەشێ ڤەمرینیت و باوەریا خەلکێ کوردستانێ ب مافێن خۆ یێن ڕەوا و پارتی و سەرکردایەتیا خۆ لدەست بدەت، چونکی لدەمەکێ کۆرت دا ب گەرم و گۆرتر و سەردەمانەتر و رێکخستیتر ئەڤ مەشخەڵە بناڤێ شۆرەشا گوڵانێ گەشتر و برسقەدارتر بوو .