پشتی بریارا دادگەھکرنا ھژمارەکا سیخور و تێکدەرێن ئێمناھیا کوردستانێ ژلایێ دادگەھێ دەرچووی ، ھندەک لایەنێن سیاسی و سازیێن راگەھاندنێ و کەسێن رۆژنامەڤان و چالاکڤان ، گۆتار و پەیام دژی ڤێ بریارا دادگەھێ بەڵاڤکرن و ئەڤ تاوانبارە ب کەسێن رۆژنامەڤان و چالاکڤان دانە نیاسین و گرتن و بریارا گرتنا وان ژی ب سیاسی ددیت و ھژمار دکر ، بێ رەحمانە و دوور ل رەوشتێ مرۆڤایەتی و ھەستکرن ب بەرپرسیارا نشتیمانی حکومەتا ھەرێما کوردستانێ و دەسھەڵات دادوەری تاوانبار کرن ، گەھشتە وی ئاستی ھەوڵێن مایتێکرنێ ل دەستھەڵاتا دادوەریا کوردستانێ بکەن و بێ رێزی و بۆختانێن مەزن ئاراستەی ڤێ سازیا پیرۆز و سەربخۆ کرن ، بێ چ زانیاریێن درۆست لسەر ڤان تاوانبارا و ئەگەر و چاوانیا دادگەھکرنا وان بزانن ..! بەلکی ھژمارەکا خەلکی ل تۆڕێن جڤاکی و سازیێن راگەھاندنێ کەفتنە بن پڕوپاکندێن ھندەک کەس و لایەنێن سیاسی ئەوێن چاڤ ب ھشیاری و زیرەکی و دلسۆزیا سازیێن ئێمناھیا کوردستانێ رانەبن ، ئەو ھێزێن ھەرێما کوردستانێ و خەلکێ کوردستانێ ل چەندین ھەوڵ و پیلانێن مەترسیدار بۆ تێکدانا ئێمناھی و سەقامگیریا کوردستانێ ھەڵوەشاندی، ئەو ھەوڵ و پیلانێن مەزن و رێکخستی یێن ژلایێ دۆژمن و نەیارێن کوردستانێ بەردەوام دھێنەکرن و دارشتن ، ھشیاری و بلیمەتیا ھێزێن ئێمناھیا کوردستانێ ئەگەر ل سازیێن پاراستن و ئێمناھیا وەڵاتێن مەزن و زلھێز زێدەتر نەبیت کێمتر نیە .

دویر ل ھەر جوداھیێن سیاسی و ئایینی و نەتەوی و ئەتنی ئەرکێ ھەر وەڵاتیەکی یە لدیڤ شیانێن خۆ پارێزەرێ ئێمناھی و ئاسایشا وەڵاتی بیت و ب ئاشکرا کرن و سزادانا سیخور و تێدەرا دلخۆش ببیت و دەستخۆشیێ ل ھێزێن ئێمناھیێ بکەت ، چونکی ب تێکدانا ئێمناھی و سەقامگیریا وەڵاتی ، ھەمی سێکتەرێن ژیانێ دێ کەڤنە د مەترسیێ دا و ژین و ژیارا وەڵاتیان دێ راوەستیت .
مخابن لجھێ دەستخۆشیێ ل ھێزێن پاراستنا ئێمناھیا کوردستانێ بھێتەکرن لسەر ئاشکراکرن و دادگەھکرنا ڤێ باندا سیخور و تێکدەرێن ئێمناھیا ھەرێما کوردستانێ ئەوێن بناڤێ چالاکڤان و رۆژنامەڤانێن بەھدینان دھاتنە نیاسین، ھەندەک کەس و لایەنێن سیاسی ژبووی راکێشانا سۆزا خەلکی و خۆ دیارکرن وەکی پشتەڤانێن ئازادیا دید و بۆچوونا و رۆژنامەڤانیێ ، ھەوەکا بەرفرەە یا نە ڕەوا ل راگەھاندنێ و سۆشیال میدیایێ دەستپێکر و خەلکەکێ نە ھشیار و بێ زانیاری ژی سەما ژبەر زرنایا وان کر ، بێ کۆ شێوازێ دەھوەتا وان بزانن .
دڤێرەدا دیار دبیت یان وان کەس و لایەنان چاڤ ب بڤێ زیرەکی و ھشیاری و خەمخۆریا ھێزێن پاراستنا ئێمناھیا کوردستانێ رانابن ، یان ژی دڤێت رەوش و ئارامیا خەلکێ کوردستان تێک بدەن ، یان ژی پشکەکن لڤێ پیلانا سیخوری و تێکدەر و ل پاشەرۆژا خۆ د ترسن .
ئەگەر نە چ گرتن و ئاشکراکرن و دادگەھکرنا سیخور و تێکدەرا چ زیانێ دگەھینتە وان ..!
لدەمەکی دا کۆ سازیێن پاراستنا ئێمناھیا کوردستانێ ئەڤرۆ زێدەتر ل ھەر دەمەکی پێتڤی ب پشتەڤانیا خەلکی و لایەنێن سیاسی ھەیە چونکی پیلانێن ھەرێمی دژی قەوارێ ھەرێما کوردستانێ بەردەوام دھێنە دارشتن و تێکدانا ئاسایش و سەقامگیرا کوردستانێ د رێکا سیخور و کارێن تیرۆرستی پشکەکا وێ پیلانێ نە .
دبێژینە وان کەس و لایەنان پشتی بەڵاڤبوونا دانپێدانێن وان سیخور و تێکدەرا بۆ رەئیا گشتی دێ چەوا دوویێن خۆ سپی کەنەڤە ..؟ ئەگەر ئەو کەس و لایەن داخازا لێبۆرینی ل حکومەتا ھەرێما کوردستانێ و دەستھەڵاتا دادوەریا کوردستانێ نەکەن بلا داخازا لێبۆرینی ل خەلکێ کوردستانێ بکەن ، چونکی ئەو ھەوا بەرفرەھا وان یا پشتەڤانیا تێکدەرا گاڤەکا مەزن بوو تێکدانا ژین و ژیار و بەختەوەریا خەلکێ کوردستانێ .
لدوماھیێ دبێژینە وان ئەگەر ژبەر جوداھیێن سیاسی ژلایێ وە دەستخۆشیکرن ل ھێزێن پاراستنا کوردستانێ لسەر ڤان چالاکیێن مەزن یا گران بیت ، پشتەڤانینەکرنا سیخور و تێکدەرا یا بساناھی یە .