ئەڤرۆ راگەهاندن بوویە مەزنترین و کاریگەرترین چەکێ سەردەم بۆ بەڕەڤانیکرنێ و هێرشبرنێ و هەڵوەشاندنا پلانێن نەیارا و شکاندنا سەنگەرێن داگیرکارا.
زۆر وەڵات ل جیهانێ هەنە ژلایێ لەشکری د لاوازن و شیانێن شەرکرنا دوژمنێ خۆ نینە ژبەر کێمیا ژمارا سەربازا یان نەبۆنا چەکێ پێشکەفتی و سەردەم ، لێ شیان و شەهرەزایا وان یێن راگەهاندنێ و تەکنەلۆژیایێ سەنگەرێن بەڕەڤایکرنێ موکوم کرینە و گەل و وەڵاتێ خۆ پاراستیە ، وەڵات ژی هەنە شیانێن لەشکری دزۆرن و خودان چەکێن پێشکەفتینە لێ نەشێن خۆ لبەر گرانیا چەکێ راگەهاندنێ بگرن ، دەما ئەم دبێژین ڕاگەهاندن سۆشیال میدیا ژی پشکەک ل راگەهاندنێ هژمار دکەین .
بۆ پارت و رێکخستنان ژی راگەهاندن و رەوشەنبیری چەکەکێ مەزن و کاریگەرە بۆ گەهاندنا پەیام و پلان و کارنامە و ستراتیژیەتا وێ رێکخستنێ بۆ جەماوەری و لدۆر کۆمبوونا خەلکی ل حزبێ ، ئەڤە مەرەما هەر رێکخستەکا سیاسی یە داکۆ پێ بگەهیتە دەستهەڵاتێ درێکا هەلبژاردنان .
پارتی دیموکراتی کوردستان خودان چەندین کەناڵێن راگەهاندنێ یە و ئەڤە کەنالە هارکارێن مەزنن بو فاکتەرێن دیتر یێن پارتی بۆ مانەڤێ وەکی جەماوەرترین پارتیا کوردستانی مینا دیرۆکەکا پڕی سەروەری و خەبات و قوربانی و ناڤێ بارزانی نەمر و کاریزمایا سەرۆک مەسعود بارزانی و خۆڕاگری بەرامبەر پیلانێن دوژمن و نەیارێن دەرڤە و ناڤخۆ و پێگەهاندنا سەرکردێن مەزن و شارەزا ، ئەڤە ژی سەروەریەکا هەری مەزنە بۆ پارتی .
لێ پێتڤی بوو هەتا نهۆ ئەڤ کەنالێن راگەهاندنێ و سۆشیال میدیایێ یێن پارتی باشتر هاتبانە رێکخستن و پشتەاڤانی لێکرن ژلایێ مادی بتایبەت سۆشیال میدیا کۆ نهۆ رۆل و کارگەریا وێ ل کەنالێن راگەهاندنێ زێدەترە ژبەرکۆ بلەزتر دگەهیتە خەلکی و دناڤ دەستێن پڕانیا خەکی دایە .
ب بەرژەوەند دبینم کۆنگرێ چاردێ یێ پارتی بگرنکی لەر راگەهاندنێ و سۆشیال میدیایێ راوەستیت و بریارێ لسەر پلان بەرنامەکێ رێکخستی بدەت بۆ باشتر ئەکتیڤکرنێ و پشتەڤانی لێکرنێ ژلایێ مادی و مەعنەوی ، چونکی هەتا نهۆ سۆشیال مدیایا پارتی یا خۆ بەخشە و چ ئۆرگانێن تایبەت نینە رێنمایی یا بگەهینتێ ، دبیت ئەڤ چەندەببیتە ئەگەرێ بەڵاڤکرنا هندەک بابەتان کۆ دبەرژەوەنا پارتی و سیاسەتا وێدا نەبن ، لەوما گرنگە بەشێ سۆشیال میدیایێ دناڤ مەکتەبێن راگەهاندنا پارتی دا بەشەکێ سەرەکی و کارا بیت و هەتا دگەهیتە ئۆرگانێن خوارێ .
لێ بەری ڤێ چەندنێ فەرە کادر و راگەهاندکار و چالاکڤانێن پارتی ب سیاسەت و بەرنامێن پارتی باشتر بهێنە چەکداکرن و هشیارکرن داکۆ پەیامێن درست د بەرژەوەندا پارتی دا بەڵاڤ بکەن .
چونکی ئەز دبنم خەمساریەک دڤێ چەندی دا هەیە و ئاستێ هشیاریا ژمارەکا کادر و چالاکڤان و ئەندامێن پارتی د ئاستێ پێتڤی دا نیە و نگرنگیێ ژی بڤێ چەندێ نەدەن ، هندەک کەنالێن راگەهاندنا پارتی ژی ئەگەر خەمخۆریا کادرێ وێ نەبیت بۆ پارتی و رێبازا بارزانی ، چونکی ژمارەکا راگەهاندکارێن پارتی ب خۆبەشانە کاردکەن ، ژبەر لاوازیا پشتەڤانیا ماد دێ لکار کەڤن و هەست ب فەڕامۆشکرنێ دکەن ، لەوما گرنگە سازیێن راگەهاندنا پارتی باشتر بهێنە پشتەڤانیکرن ژلایێ مادی .
ئەرکێ کۆنگرێ یە ڤێ پرسێ چارە بکەت داکۆ راگەهاندن و سۆشیال میدیایا پارتی ب ئێک پەیام و ئێک گۆتار ببیتە چەکۆچەکێ گران بۆ بەرسڤدانا نەیارێن پارتی و هەڵوەشاندنا پیلانێن وان کۆ ئەڤرۆ ئەو کار لسەر دکەن .