بەری بیست و دوو ساڵا کەناڵێ ئاسمانیێ کوردستان تی ڤی کۆ نهۆ دەزگەهێ سەتەلایتا کوردستانێ یە ژلایێ پارتی دیموکراتی کوردستان وەکی ئێکەم کەناڵێ ئاسمانیێ کوردستانی لسەر ئاخا پیرۆزا کوردستانا ئازاد دا هاتە دامەرزاندن ،
دامەزراندنا وێ ل وی دەمی شۆڕەشەکا راگەهاندنا کوردستانی بۆ بوو ناساندنا دووزا سیاسی و نەتەوی یا کوردستانی ب جیهانێ ، ژبلی ڤێ چەندێ کار و بەرنامە و ستراتیژیەت و پەیامێن وێ یێن پیشەیی و راستگۆیانە و کوردستانیە هەردەم جهێ باڵکێشیا بینەرا و خەلکێ کوردستانێ بوویە .
دێ شێین بێژین کوردستان تیڤی نوونەرایەتیا پرسا سیاسی و نەتەوی یا گەلێ کورد و کوردستانیا دکەت دناڤ مەدیا جهانی ، راستە نهۆ چەندین کەناڵێن دیتر هاتینە دامەزراندن و گەلەک ژوان ژلایێ تەکنەلوژی و شیانێن مادی ل کوردستان تیڤی بهێزترن لێ زۆربەیا وان لسەر ئێک ستراتیژیەت و سیاسەت و زمانێ گەهاندنێ نەماینە ، ئانکۆ گۆڕانکاری بسەردا دهێن ، هندەک ژوان ژلایێ زمانی نیشانێن حیبەتیێ لسەر هەنە ...! کۆ پاراستن و پێشڤەبرنا زمانی ئەرکەکێ سەرەکیێ سازیێن راگەهاندنا نەتەوی و نشتیمانی نە،
ژلایەکێ دیتر کوردستان تیڤی قوتابخانەیەکا مەزنا پێگەهاندنا راگەهاندکار و رۆنامەڤان بوویە بۆ کەناڵ و سازیێن پشتی وێ هاتینە دامەزراندن .
جهێ دلخۆشیێ ئەوە کوردستان تیڤی ئەڤە دەمێ بیست و دوو ساڵایە بەردەوام د خزمەتێ دایە بێ کۆ گۆڕانکاری ل سیاسەت و ستراتیژیەتا وێ بهێتە گۆڕین ، چ ژلایێ گەهاندنا پەیامێ ب ڕاست و دروستی و بێ لایەنی ، یان ژلایێ زمانەڤانی کۆ شیایە رەسەناهیا زمانی و پەیڤێ ب پارێزیت و مینا هندەک کەناڵا نەکەفتیە د هەڤرکیێن زمانەڤانی و شێوازێ پەیڤسازیێ ، کۆ زیانێ دگەهینە زمان و دیالیکتێن کوردستانی .

هەر بینەرەکێ کوردستان تیڤی ل هەر جهەکی هەبیت، یان ل هەر نەتەوەیەکی بیت ئەگەر کوردی زان بیت دێ زانیت کۆ ئەڤ کەناڵە کەناڵەکە ل کووراتا نەتەوە و وەڵاتێ خودا هەلکەفتیە و کەناڵەکە خزمەتا پرس و بەرژەوەندێن گشتی دکەت و هەردەم فاکتەرێ ئاشتەوایی یێ و چارەسەریا پرس و ئاریشێن ناڤخۆیی و دەرڤە بوویە .
کەنالەکە هەردەم حەز و ڤیانا وەڵاتی و باوەری بخۆبوون ئیکستیە دناڤ بینەر و گوهداران دا ، دڤان بیست و دوو ساڵان دا کوردستان تیڤی ماڵا هەمی پێکهات و ئۆل و ئەتنێن کوردستانێ بوویە ، جهێ هەمیان دناڤ ڤێ رەشمالا مەزن دا هەیە و بەرەڤانی ماف و ئارمانجێن هەمیا کریە ، کوردستان تیڤی کەناڵەکە ب پراکتیک لدیڤ ناڤێ خۆیە (کوردستانی ) .
کوردستان تیڤی هەلگرا هەمان پەیاما ( کوردستان یان نەمان ) پارتی دیموکراتی کوردستانە ل شۆڕەشا مەزنا ئیلوونێ ب شێوازەکێ دیتر . ئەو پەیاما رێبازا بارزانی بەری زێدەتر ل سەد ساڵا هەلگرتی و رووخسازێ وێ لدیڤ ڕەوش و کاودانان دهێتە گۆرین و ئێک ناڤەرووک هەیە ،
پەیا کوردستان تیڤی یا دوینێ و ئەڤرۆ و سوباهی دێ هەر ئەو بیت کۆ خەبات و قوربانیدان و خۆراگری و راست گۆیی یە ژپێخەمە بهێزکرن و پاراستنا دەسکەفتێن ئەڤرۆ و بەرەڤ بدەست ڤەئینانا ئارمانجێن مەزنەر .