ئەڤە دەمەکێ درێژە پرسا گەندەلیێ ل ھەرێما کوردستانێ بوویە پرسەکا گەرم و گۆر و بەردەوام دناڤ خەلکێ کوردستانێ ، گەھشتیە وی ئاستی تۆ نەشێی بەحسێ چاکسازیێ و دادوەریێ دناڤ خەلکیدا بکەی، بێژە ھەر کەسەکی دێ چێبیت دێ بتە کەتە کەنی ..!
ئەگەر بێژیە کەسەکێ نەساخ تۆ بۆ نەشێی حەبەکێ بخۆی ، ماڵاتە خەلکێ شەفەڵا دخۆت ..! نھۆ ل شەفەڵ خازنێ ژی دەرباز بوویە، بوویە یێن چیا و زەڤیا دخۆن ...! ئانکۆ گەندەڵی و نەدادوەری گەھشتیە کۆپیتکێ و
ژبەر نەسەرگرتنا چەندین پرۆژێن چاکسازیێ یێن ژلایێ سەرۆکێ ھەرێمێ و سەرۆکێ حکومەتێ خەلک ئێکجار زۆر بێ ئۆمێد بوویە .
ئەڤ ناڤێن دووبارە و سێ بارە و چەندین بارە دناڤ لیستێن مۆچەخۆرێن کوردستانێ باشترین نمۆنێن زقبوونا گەندەلیەکا رێکخستینە ل ھەرێما کوردستانێ .
جھێ دلخۆشیێ ئەوە کابینا نەھێ یا حکومەتا ھەرێما کوردستانێ بسەرۆکاتیا مەسروور بارزانی دەست ب پراکتیکرنا پرۆژە و بەرنامێ خۆ یێ چاکسازیێ کریە و بڕینا مۆچێ بدەھان ھزار مۆچەخۆرێن وەھمی و بن دیوار و نەھەژی ئۆمێد بۆ خەلکی درۆست کریە کۆ حکومەتا ھەرێما کوردستانێ ڤێ جارێ یا رژدە لسەر ئەنجامدانا چاکسازیێن بنەڕەتی و دانپێدانەکا ب ھەبوونا گەندەلیێ .
نەخاسمە دڤان کاودانێن دژوارێن ئابووری یێن ھەرێما کوردستانێ تێدا دەرباز دبیت، راستە بۆ دەربازبوون لڤێ قەیرانێ باشترین رێک چاکسازی نە چونکی ساڵانە ب مەلیونان دوولار دێ بۆ حکومەتێ زڤریت، کۆ بشێت دگەل داھاتێن دیتر مۆچێن فەرمانبەرا دابین بکەت و پرۆژێن خزمەتگۆزاریێن پێتڤی ئەنجام بدەت .
ھەرچەندە سەرەرای ڤێ قەیرانا ئابووری یا لسەر ھاتیە سەپاندن ڤێ کابینا حکومەتێ شیایە پیرۆژێن گرنگ و ستراتیژی ئەنجام بدەت و ھەول دبەردەوامن بۆ بھێزکرنا ژێرخانا ئابووری و زێدەکرنا داھاتی کۆ نیشانێ دلسۆزی و خەمخۆریێ و پلان دارشتیێ نە .
لێ ھەبوونا ڤێ گەندەڵیا ل ھەرێما کوردستانێ ھەی نیشانێ بسازینەبوونا دام و دەزگەھێن ھەرێمێ یە، ئەگەر نە چەوا لسەردەمێ تەکنەلۆژیەکا زیرەک بدەھان مۆچەخۆرێن بن دیوار و وەھمی و چەند بارەکی دێ ھەبن، براستێ جھێ حیبەتیێ یە ...!
راستە پرۆژێن چاکسازی زۆر دگرنگ و پێتڤی نە ، لێ یا گرنگتر بسازیکرنا حکومەتێ و دام و دەزگەھێن ھەرێمێ یە لدیف یاسایێ .
بسازیکرنا سازیێن دەسھەڵاتێ و رێڤەبرنێ ب یاسا باشترین پرۆژێ بەردەوامیێ چاکسازیێ یە و ئەرک دێ ھێنە بجە ئینان و سەرپێچیکار ژی دێ ھێنە سزادان .
سازیکرن ئانکۆ سەروەریا دەسھەڵاتێ ل ھەر باندوورەکا سیاسی و کەسایەتی و بھێزکرنا دەسھەڵاتا دادوەریێ، مخابن ھێشتا ئەڤ چەندە ل ھەرێما کوردستانێ کێم دھێتە دیتن، ھێشتا دەسھەڵاتا لایەنێن سیاسی یا لسەر ژێدەرێن ئابووری و سازیێن لەشکری و ئێمناھی یا زاڵە ، ھەتا ئەڤ سازی و ژێدەرە لبن ھەژموونا لایەنێن سیاسی نەھێنە رزگارکرن حکومەتا ھەرێمێ و سازیێن دیتر یێن دەسھەڵاتێ نابنە حکومەت و سازیێن نشتیمانی .
راستە حزبێن سیاسی کار بۆ دەسھەڵاتداریێ دکەن کۆ مافەکێ سرۆشتی یە لێ نابیت راستەوخۆ سەرپەرشتیا سازیێن رێڤەبرنێ بکەن ، بەلکی درێکا پرۆژە و کارنامێن خۆ دێ سۆزا خەلکی راکێشن ژبووی وەرگرتنا باوەریا خەلکی ل ھەلبژاردنێن ئازاد و دیموکراسی و ب رێکا پەرلەمانی دێ کەنە پرۆژە و یاسا و حکومەت دێ ب ئەرکێ بجھئینانێ رابیت .
دەنگدەر ئانکۆ ئەو خەلکێ باوەری دایێ دێ چاڤدێریێ لێ کەت و بۆ ھەلبژاردنێن داھاتی دێ ھەلسەنگینیت .
دڤی چارچۆڤەی ژی دا گاڤێن کابینا نەھێ یا حکومەتا ھەرێما کوردستانێ د دیار و بەرچاڤن ، چونکی بەرەڤ سازیبوونا دەسھەڵاتێ دچیت ، وەک پێکئینانا ھێزەکا تایبەت بۆ چاڤدێریا دەروازێن سنووری و ئلکترۆنیکرنا لیستێن مۆچەخۆرنا .
راستە رەوش و ناکۆکیێن سیاسی ئاستەنگێن دژوار و مەزنن ل ھەمبەر گاڤێن حکومەتێ بۆ چاکسازیا و ب سازیکرنێ لێ ھێزا مللەتی لوان ئاستەنگا بھێزترە ، بەڵام پێتڤی یە لەزێ ل بجھئینانا یاسایا چاکسازیا بکەت و ھەوڵ بدەت یاسایێن بەرفرەھتر و پێشکەفتیترپێشکێشی پەرلەمانی بکەن بۆ بەرھنگاریا گەندەڵیێ و بسازیکرنا دام و دەزگەھێن ھەرێما کوردستانێ کۆ د خزمەتا خەلکی و پرۆسا ئاڤەدانیێ و پێشڤەچوونا ھەرێمێ دان .
حکومەت ب ھەمی سازیێن خۆڤە ببنە یێن نشتیمانی و لبن و ھەر حزب و لایەنەکێ لھەمبەر ببیتە ئاستەنگ ب بەڵگە و راشکاوی بۆ رەئیا گشتی و جادا کوردستانی ئاشکرا بکەن داکۆ خەلک خزمەتکا و چاکسازخواز ل گەندەلکار و دژبەرێن چاکسازی و بسازیکرنا وەڵاتی ژێک جودا بکەت .
چونکی ڤێ چەندێ پەیوەندیەکا راستەوخۆ ب ژین و ژیار و پاشەرۆژا کورد و کوردستانیاڤە ھەیە و سازیکرن دێ بیتە مەزنترین پیرۆژێ چاکسازی و پشتەڤانیا جەماوەری ژی دێ ھەبیت ، لێ پێتڤیە خەلکێ مەژی یێ ھشیار بیت و بەرژەوەندێن گشتی نەکەتە قوربانی بەرژەوەندێن حزبی .