بە پێی رووداوەکانی مێژوو، کوردستان دوو جار لەسەر دەستی دوژمنان پارچە کراوە.

پێی نەخشەی جیهانی، تا ئێستا ووڵاتێکی فەرمی نیە بە ناوی کوردستان، بەلکو خاکی نەتەوەیەکی زولم لێ کراو هەیە و دابەش کراوە بەسەر چوار ووڵاتی دەورەبەر و بونەتە بەشێک لە نەخشەی ئەم ووڵاتانە.

جگە لەوەی کە مێژوو و جوگرافیا شاهدی بۆ کورد و کوردستان دەدەن، خۆشمان وەکو کورد هەوڵمان داوە، کوردستان هەر بە یەک پارچە بناسێنین، لە رووی ئەدەبیات و هوشیاری تاک هەوڵ دراوە ناسنامەی کورد و کوردستانی بوون پارێزراو بێت، لە هەر پارچەیەکدا چەند شارو شاروچکەی کوردی هەن و نەخشەیان دیارە کە چۆنە و تا کوێ یە، پێکهاتەی کومەڵایەتی و ئاینی چۆنە ... هتد.

ئەو پارچەیەی کورد توانیویەتی شوێن پێی خۆی لێ قایم بکات، بەشی باشورە، کە ئێستا بە شێوەیەکی فەرمی و لە چوارچێوەی دەوڵەتی عیراقی فیدرال بە ناوی هەرێمی کوردستان ناسراوە.

ئەم هەرێمە لە شارە سەرەکیەکانی بەشی باشور پێک هاتووە، هەولێر، دهۆک، سلێمانی و کەرکوک، هەروەها نەخشەی ئەم هەرێمە دیار و ئاشکرایە.

وە توانراوە لە ماوەی ٣٠ ساڵی بوونی ئەم هەرێمە، قەوارەیەکی بەهێزی لێ بونیاد بنرێت، لە رووی حوکمرانی و ئاوەدانی و تا ئاستی سیاسەت و دیبلوماسیەتی نێو دەوڵەتی لەبەرچاو بێت.

جگە لەوەی ئەم هەرێمە بوەتە پەناگەیەک بۆ تەواوی ڕۆلەی کورد لە سەرانسەری کوردستانی گەورە.

لە چوارچێوەی بزاڤی رزگاریخوازی گەلی کوردیش قوربانیەکی زۆر لەم پارچەی کوردستان دراوە، لە پێناو پاراستنی ناسنامەی کوردایەتی و نەتەوایەتی.

شتێکی ئاسایی یە کە دوژمن هەر چی لەدەست بێت لە دژت بکات، چونکە دوژمنە، بەڵام کە لە ناوخۆ کۆمەڵێک سەر لێشێواو هەولی ئەوە بدەن کە لە ناو هەرێمی کوردستان و نەخشەی باشور هەرێمێک دروست بکەن، ئەوە مایەی لەسەر راوەستان و نیگەرانی یە.

ئایە دەبێ هۆکار چی بێت، بە تایبەت لەم ساتە وەختەدا؟

ئەمانە بۆ بەرژەوەندی کام لایەن لە دژی بەرژەوەندی و ئایندەی گەلی کورد دەوەستن و هەوڵی ئەم هەنگاوە مەترسیدارە دەدەن؟.

بە پێداچونەوە بۆ چەند قۆناغێک، بۆمان روون و ئاشکرا دەبێت کە ئەوەی ئەوان دەیانەوێ بیکەن، دوورە لە واقع و مەنتق، دوورە لە رووداوەکانی جیهان و ناوچەکە، دوورە لەوەی لەسەر ئاستی ناوچەکەش کە خودی دوژمنانی کوردیش قبولی بکەن، مەگەر خۆشیان دەزانن قابلی قبول نیە، بەڵام هەر هەرەشەی پێ دەکەن.

لێرەدا تەنها هۆکارە ناوخۆییەکان دەبنە هۆی ئەوەی کە بیر لەم جۆرە پیلانە بکرێتەوە و وەکو کارتی فشار بەکاربهێندرێت بۆ سەر حکومەتی هەرێمی کوردستان.

هۆکارە سەرکیە ناوخۆییەکەش بابەتی چاکسازی و پاکسازی یە، کە کابینەی نۆیەمی حکومەتی هەرێمی کوردستان کاری لەسەر دەکات.

لە بەرنامەی کاری پلانی چاکسازیش دا، باس لە رێکسختنەوەی موچە و داهاتە ناوخۆییەکان و داهاتی نەوت و خەرجی حکومەت بە گشتی کراوە، کە دەبێ سەر لە نوێ و بە پێی یاسایەکی توکمە رێکبخرێنەوە و ئەو داهاتەی لەو بابەتەدا بەەفیرۆ دەڕۆیشت بگەڕێتەوە بو خەزینەی حکومەتی هەرێم.

مەبەست لادانی هەرچی کاری نا شەرعی یە و خستنە سەر سکەیەکی عادل و داد پەروەرانە، کە مافی هەموو لایەن پارێزراو بێت.

کە واتا تەنها ئەو لایەنانە لە دژی بەرنامەی چاکسازی رادەوەستن کە خۆیان وەکو زەرەرمەند دەبیین، چونکە بە کۆمەلێک رێکاری نا شەرعی دەستیان بەسەر موچە و داهاتی نەوت و دەروازەکان و بازرگانی دا گرتووە، تا دەگاتە کاری قاچاخچیەتی.

ئەمە هەمووی لەسەر حسابی داهاتی گشتی هەرێمی کوردستان و قوتی خەڵکی هەرێمی کوردستان.

١٦ی ئوکتۆبەریش بەشێکی تری خیانەتی ئەم گروپە سەر لێشێواوەیە، بەڵام کە سەری نەگرت ئەوجا دەیانەوی بە پیلانێکی تر فشار بخەنە سەر حکومەتی هەرێم، ئەم جارەش دەیانەوێ بە بابەتی هەرێمی سلێمانی شارێکی تر رادەستی دوژمنان بکەن، لە لایەکی تریش خۆیان دەرباز بکەن لە بەرپرسیارەتی لە بەرامبەر ئەو خیانەتانەی کردویانە.

بێ گومان لەوەش بەدەر نین کە ئەوان ئەم کارە نابەجێیانەیان خزمەتی ئەجندای دەرەکی دەکەن، بەڵام لە هەمان کاتدا ئەم لایەنە دەرەکیانە، خودی خۆیان دووچاری کێشەی گەورە بوونە و بەرەو روخانن، لە نەخشەی داهاتووی ناوچەکەشدا جێگایان نابیتەوە.

هەر جارێک کە دەکەونە بەرامبەر بابەتێکی چاکسازی و راست کردنەوەی ئاراستەکان، بابەتی بە هەرێمی کردنی سلێمانی دووبارە دەکەنەوە، کە تەنها پیلانێکە بۆ خۆ بە دور خستن و خۆ شاردنەوە لە بەرپرسیارەتی و لێپرسینەوە، لە قورغ کردنی دەستهەڵات و داهاتی شارێکی کوردستانی و مافی کوردستانیان.

ئەوەی راست و حەقیقەتشە بگوترێت، هیچ کات سازش لەسەر کوردستان بوونی شارە کوردیەکان ناکرێت، بە هەموو پێوەرەکان سلێمانی شارێکی رەسەنی هەرێمی کوردستانە، هەڵگری مۆرکی کورد و کوردستانی بوونە و هەر واش دەمینێت.