دەمێ چەند ساڵایە پەیڤا بن دیوار بوویە ناسناڤێ وان مۆچەخۆرێن کوردستانێ ئەوێن ب نەیاسایی مۆچە بۆ هاتیە دابینکرن ، یان ئەوێن دامەزراندی و چ ئەرکا بجهــ نەئینن ، یان ژی خولام و رەزڤان و ....هتد یێن بەرپرسا نە .

ژمارەکا زۆر ژی یا خەلکێ کوردستان زێدەتر ل مۆچەیەکی هەیە چ بناڤێ خۆ یێن دروستی ب یان ئاشۆپی ، ئەڤەژی دچنە چارچۆڤێ بندیواریێ دا ، ئەگەر خراپتر ژی نەبن .

نهۆ حکومەتا هەرێما کوردستانێ ل چارچۆڤێ یاسایا چاکسازیێ هێد هێدی ڤان دووسیا هەڵددەتەڤە و بدەهان هزار مۆچەخۆرێن ب دیوار ئاشکرا کرینە و مۆچێن وان هاتینە بڕین ،

ئەڤە جهێ دخۆشیەکا مەزنە و خەلک چاڤەرێ یە گاڤێن بلەزتر و مەزنترە ، ئەڤە نیشانێ هندێ یە سەرۆکێ حکومەتێ زۆرێ رژدە لسەر ئەنجامدانا چاکسازیێن بنەڕەتی و بهێزکرنا کوردستانێ ژلایێ کارگێری و ئابۆری .

ئەڤرۆ خەلکێ کوردستانێ چاڤەرێ ڤان ڕەنگە چاکسازیا و دادوەریێ و بهێزکرنا ئابۆری یە ، چونکی هەبوونا نەدادوەریێ و ڤان مۆچەخۆرێن بن دیوار و نەهەژی و بێ ناڤ و نیشانێن کارگێری زیانەکا هەرە مەزن گەهاندی یە ئابۆرێ کوردستانێ نەخاسمە دڤێ قەیرانا ژلایێ حکومەتا عیراقێ لسەر هاتیە سەپاندن ،

ژلایەکێ دیتر هەبوونا ڤان مۆچە خۆرێن بن دیوار و خوڵام و بەردەست و باغەڤانێن خەلکەکێ بەرپرس و خودان پێگەهێن جڤاکی پابەندیا خەلکەکێ نشتیمان پەروەر و نەتەوی و خودان خزمەت و خەبات و قوربانی ب وەڵاتی و نەتەوەی لاواز کریە ،

چونکی هندەک مۆچەخۆرێن بن دیوار و مۆچە دز ل وان رێزدارتر و پێشتر بوون ، چونکی رەنگێ مۆچێ هندەک ژوان ل کەسێن ل خزمەت و خەباتێ بەردەوام زێدەر بن و چێدبیت بەری وان ژی عەردێن ئاکنجیبوونێ ل جهێن باشتر وەرگرت بن ...!
ژبلی هەستکرنا خەلکی بڤێ نەدادوەریا جڤاکی .

دڤێ رەوشا نهۆ کوردستان تێدا دەرباز دبیت پێتڤی ب راکێشانا سۆزانا خەلکی هەیە بۆ حکومەتا هەرێمێ و سازیێن دیتر یێن دەسهەڵاتداریا هەرێمێ ، ئەو ژی درێکا بسازیکرنا حکومەتێ و چاکسازیێن بنەڕەتی هەیە ،

دەمێ هاتی حکومەتا هەرێما کوردستانێ بن سێبەرا یاسایا چاکسازیێ و دەرکرنا بریار و راسپاردێن دیتر ژی هەمی بن دیوارا بدروستی بن دیوارا ڤەکەت ، ئانکۆ دیواری بسەرا بهەرفینیت و سەر ژنوی ل بناغێ دیواری ب سەردیوارا ئاڤا بکەتەڤە و رێکێ نەدەت بن دیوار پشکداریێ دڤێ ئاڤاکرنەڤا نویدا بکەن ، چونکی جهێ باوەریێ نینە و دێ مینا دیوارێ سەربەفرێ لێکەن ..!

ئانکۆ ب سیستەمەکێ نوی و پێشکەفتی لیستێن مۆچەخۆرا رێکبێخن و بن دیوار و دووبارە نەمینن و پشتەڤانێن وان ژی بهێنە سزادان .

بڤی ئاوایی حکومەتا هەرێمێ و سازیێن دیتر دێ بنە حکومەت و سازیێن نشتیمانی و پابەندیا خەلکێ کوردستانێ و هەستا وان یا نەتەوی و نشتیمانی دێ گەهیتە کۆپیتکێ و خەلک دێ هەست ب بەرپرسیاریەتیێ کەت .

چاکسازی و دادوەریا بڤی ئاوەیی دێ کاریگەریێن ئەرێنی لسەر ئێکرێزیا سیاسی ژی کەن و پشتەڤانیا نیڤ دەولەتی ژی دێ زێدەر بیت .

برەنگەکێ گشتی پشتی ڤان گاڤێن حکومەتا هەرێما کوردستانێ یێن چاکسازیا و ئاشکراکرن و بڕینا مۆچێن بدەهان خەلکەکێ بن دیوار و نەهەژی خەلکێ کوردستانێ دلخۆش کریە و باوەریا خەلکێ بسەرۆکێ حکومەتێ رێزدار مەسروور بارزانی و کابینا وی زێدەر بوویە و خەلکێ گەشبینە کۆ جەنابێ وی یێ رژدە لسەر ئەنجامدانا چاکسازیێن بنەڕەتی و خزمەتکرن و بەختەوەرکرنا خەلکی و بهێزکرنا هەرێما کوردستانێ .

ژلایەکێ دیتر ڤان گاڤێن ئەرێنی و وێرەکانە باوەری بۆ خەلکی درۆست کریە کۆ ئیدی دادوەری دێ چەسپیت و سەردیوار و بن وەکهەڤ نابن .