سلێمانیێ باژارێ هەڵمەت و قوربانی ، پایتەختێ رەوشەنبیری و مەڵبەندەکێ مەزنێ هزری و تۆڕەیی و نەتەوایەتی ، ئەو دەڤەرا ب قوربانیێن خۆ لسەر هەڵویستێن نەتەوایەتی بوویە سومبۆلا بەرخودان و خۆڕاگریێ . مینا ئەنفالێن گەرمیان و کیمیا بارانا هەلەبجە و زیندانیکرن و سێدارەدانا وەڵات پەروەرا .

سلێمانی بنگەهێ دیموکراسیەت و ئازادیا دید و بۆچوونا و شارستانیەتێ ، هەژی دەسهەڵاتداریەکا هەژی رەوشت و رەوشەنبیری و کوردایەتی و قوربانیدانێن وان بن ، دەمێ دبێژین سلێمانی ئانکۆ سنوورێ وێ و هەڵەبجە و گەرمیان و ڕاپەرین .
هەژی دەسهەڵاتداریەکێ نە کۆ د خزمەتا ئارامی و سەقامگیری و پێشڤەچوون و ئاڤەدانی و ئابووریێن وێ بن ،
هەژی دەسهەڵاتداریەکێ نە ، کۆ پێگەهێ وێ یێ ئابووری و سیاسی و جڤاکی بکەنە ستۆنەکا هەرە بهێز و موکۆم بۆ بهێزکرنا قەوارێ هەرێما کوردستانێ و بلندکرنا هەستا نەتەوی و نشتیمانی و سیاسەت و دبلۆماسیەتا کوردستانێ .

سلێمانی هەژی دەسهەڵاتداریەکا دادوەر و سەروەرکارا یاسایێ و چاکسازخواز و دژبەریا دزی و گەندەلیێ یە ، کۆ ببینە نمۆنە بۆ پڕانیا باژێر و باژێرکێن کوردستانێ و دەڤەرێ ب گشتی .

سلێمانی نە هەژی هندێ یە دەسهەڵاتا وێ بکەڤینە د دەستێ کۆمەڵە خەلکەکێ خۆ پەرست و مافیا و وەڵات فرۆش و گەندەڵ و تێکدەرێن ئێمناهی و سەقامگیریێ و دەلیل و جێبجێکارێن پیلانێن هێزێن داگیرکار .
سلێمانی نە هەژی هندێ یە تیرۆرا هزری و ڕاگەهاندنەکا گۆبلسی لسەر زاڵ ببیت و دەسهەڵاتدارێن وان ببنە بازرگانێن وەڵات فرۆشیێ و فاکتەرێن برسیکرنا خەلکی ،
سلێمانی نە هەژی هندێ یە هێز و گرۆپەکێ تیرۆرستیێ دەرڤەی هەرێما کوردستانێ ، بناڤێ خەلکێ وی وێرانکرنێ بکەن و ئاڤاهیێن حکومی و بارەگایێن حزبی و قورئانا پیرۆز بسۆژن و سەلاجە و بتلێن غازێ بدزن ...!

سلێمانی نە هەژی هندێ یە خەلکەکێ بێ گۆنەهــ بدەستێن دیلڤەڵانکێن دوژمن و داگیرکار بهێتە کوشتن و بریندارکرن ، بۆ خەلکێ وێ هژمار بکەن ..! یان بکەنە فاکتەرێن تێکدانا شیرازێ جڤاکێ کوردستانێ .
سلێمانی نە هەژی هندێ یە ، مینا باژارێ حەلەبێ وێران بکەن، یان مینا شنگالێ یەکینەیێن بێ باوەرێن کوردینی یێ و نەتەوایەتیێ ، هەوڵا کۆدەتایەکا لەشکری لسەر بهێتەکرن بۆ دەسهەڵاتداری لێکرنێ .

گریا مرۆڤی بۆ سلێمانیێ دهێت ، دەمی دبینیت بهێزا چەکی و هێزا هێزێن ئێمناهیێ و هێزا دارایێ ، دەسهەڵاتەکا دوور ل رەوشتێ خەلکێ سلێمانیێ دەور و بەر و بێ ئیرادا وان دەسهەڵاتا خۆ لسەر سەپاندی یە .

ئەز باوەرم خەلکێ سلێمانیێ یێ ڕەوشەنبیر و هزر مەند و نەتەوە پەروەر و قوربانی دەر لڤان و پیلان و کۆدەتایا بهێزتر و ب بیر و باوەرترە ، چەوا ب پیلانێن بەرێ یێن سەردەمێ ئنگلیزی و پاشان رژێمێن ئێک لدیف ئێکێن عیراقێ رادەست نەبوو ، بەرامبەر ڤێ پیلانێ ژی دێ بێ دەنگیێ شکێنیت و سەرکەڤیت کۆ بۆ پیلانێن داهاتی ژی ببنە پەند و عیبرەت و بیتە فاکتەرەکێ هەرە بهێز بۆ بهێزکرنا قەوارێ هەرێما کوردستانێ و پێشڤەبرنا دووزا سیاسی یا کوردستانێ .
رۆندکێن گریا مە یا ئەڤرۆ بۆ رەوشا سلێمانیێ ، دێ کەنە رۆندکێن کەنی و گرنژینێ .