دامەزراندنا پارتیێن سیاسی و کارنامێن وان ژبووی خزمەت و بەختەوەریا چڤاکی نە ، چونکی حزب سازیەکا جڤاکی نە . بۆ جڤاکێن ھێشتا رزگار نەبووی و وەڵاتێ وان لبن دەستێ داگیرکارا کۆ د قۆناغا شۆرەشگریێ و خۆ رزگاریێ دانە ، ئەرکێ وان گرانتر دبیت، چونکی لسەر وانە پلانێن موکوم و درێژخایەن دابرێژن بۆ ڤەوژاردنا رێکا ئازادی و رزگاریێ ب کێمترین زیان و دابینکرنا ئاشتی و ئاشتەوایی یا ناڤخۆیی و ئێکرێزیێ . ل دەمێ شۆڕەشێن چەکداری ژی پێتڤی یە سەرکێشێن شۆڕەشا د لێزان و دوور بین بن ل دارشتنا پلان و بەرنامێن شۆڕەشا و بزانن دێ چەوا شۆڕەشا ڕێڤەبەن و سەرەدەریێ ل گەل ڕەوشێ کەن، ھەر وەسا پەروەردەکرنا شۆڕەشگێرا لسەر بنەمایەکێ ساخلەم و پاراستنا بەرژەوەندێن گشتی ، ئەگەر نە ل جھێ شۆڕەش دەسکەفتا بدەست بینیت ، دێ بیتە ئەگەرێ وونداکرنا ئارمانجا و ئاراستەکرنا رێکا ئازادیێ بەرەڤ تۆنێلەکا تەنگ و تاری و پاشەرۆژەکا نە دیار ..! دەسکەفتێن ھەیی ژێ دێ لدەست دەن، چونکی ھەست و پابەندیێن نەتەوەیی و نشتیمانی ژلایێ گەلێ خۆ ناھێلن . ھەر وەکی پەکەکە ئەڤرۆ ئەڤ ئاراستەیە گرتی . ب تێر و تەسەلی ژبوو دیرۆکا دەستپێکیا پەکەکێ نازڤرین تنێ دێ درۆشمێن وان یێن بریقەدار وەکی کوردستانەکا مەزن و باوەری نەبوون ب وان سنوورێن دەستکرد یێن دناڤبەرا پارچێن کوردستانێ ھاتینە دانان و شۆرەشەکا سەرتاسەری و پارتیەکا نەتەوی و نشتیمانی و ....ھتد د ئەنجام دا پەکەکێ چ کر ..؟ ل باکۆرێ کوردستانێ وەڵات ل شۆڕەشێ و شۆڕەشگێرا ڤاڵا کر ، نەشیا ئێک بۆستا ئاخا کوردستانێ ڕزگار بکەن کۆ تێدا ڤەحەویێن ..! ژبەر ڕەفتارێن وان دوور ل مرۆڤایەیێ کۆم کۆمە ماڵباتێن کورد گۆند و باژارێن کوردستانێ بجھــ دھێلن و بەرەڤ باژارێن تورکیا دچن، زارۆیێن وان زمان و کلتۆرێ کوردی ژی ژبیر دەکەن ، کۆلینا خەندەقێن دناڤ کۆڵانێن باژێران پرۆسا ئاشتیێ تێکدان و وێرانکرنێ جھێ ئاڤەدانیێ گرت . درۆشمێ کوردستانەکا مەزن و سەربخۆ کرە ئازادیا گەلا و پەیڤا کوردستان ژی کرە تاوان ..! لجھێ نفشێ نھۆ فێری پەروەردەیا نەتەوی و نشتیمانی و مرۆڤایەتی بکەن، زارۆک و گەنجا دڕەڤینن و ل مافێن ژیانێ و خاندنێ بێ بەھر دکەن ..! چ رێزگرتن بەرامبەر وی ئاڵایێ تەڤایا خەلکێ کوردستانێ بلند و پیرۆز رادگریت و چەندین ئاڵایێن بێ ڕامان بلند کرینە و سڵاڤێ بۆ دکەن ، مینا گرۆپێن میلیشیایێن حەشدا شەعبی . باکۆر کریە گۆڕەپانەکا سەقامگیر و ئازاد بۆ لەشکر و دەولەتا تورکیا و بۆ کوردێن ھەلگرێن ھەستا نەتەوی کریە زیندانەکا تاری و بێ دەرگەھــ ...! بووینە ئەگەرێن گرتن و بێ سەرۆشوونکرنا ھزارەھان خورت و لاوا ... لرۆژ ئاڤایێ کوردستانێ ژی دەسھەڵاتەکا دکتاتۆریانە ھەر رۆژێ بناڤەکی لسەر خەلکی سەپاندی یە وب ناڤێ لەشکریا ب زۆری خورت و لاوێن کورد چەکدار دکەن و لسەر ئاخا نەکوردستانی ددەنە کوشتن . ب دارێ زۆریێ دەسھەلاتا خۆ د سەپینن و رێگریێ ل ھەمبەر پارت و کەسایەتیێن سیاسی یێن ھەلگرێن ھەست و پرۆژێن نەتەوی و نشتیمانی دگرن و زیندانی دکەن ، ئاشتەوایا جڤاکی ئێخستیە د مەترسیێ دا .
ھەر رۆژ سیستەمەکێ دەسھەلاتێ رادگەھینن جار کانتۆن و جار ئیدارا خۆجھی و جار فیدرالی .. بێ کۆ چ وەلات دانپێدانێ پێ بکەن . بووینە ئەگەرێ داگیرکرنا چەندین دەڤەرێن کوردستانی ژلایێ وەلاتێ تورکیا ، چ رێز و سۆز بۆ رێکەفتن و ئەنجامێن کۆمبوونێن لگەل لایەنێن دیتر یێن سیاسی نینە ، ل جھێ چەکدارێن وان پارێزەریا خەلک و وەلاتی بکەن ، بووینە بازرگانێن شەری و تێکدەرێن ئارامیێ و بجە ئینەرێن ئەجندایێن وەلاتێن ھەرێمی ، لسەر ئاستآ رێکخستنێ ژی چەندین رێکخستنێن سێبەر ئاڤاکرنە کۆ ھەمی لبن سێبەرا پەکەکێ رەفتارا دکەن و رێنمایی یان وەردگرن .
ل باشوورێ کوردستانێ ژی رەفتارێن وان یێن تێکدەرانە و دژایەتیا قەوارێ ھەرێما کوردستانێ و ئارامیا وەلاتیان ناھێنە ھژمارکرن ، ھەر دەمێ دەلیڤە بۆ ھەلکەفتبیت بەرێ لوولیێن چەکێ خۆ دایە خەلکێ ھەرێما کوردستانێ و پێشمەرگەھی و سازیێ، ئێمناھیێ ، ب سەدان گۆندێن کوردستانێ داگیرکرنە و رێگرن ل ھەمبەر ئاڤەدانیێ ، گەھشتیە وی ئاستێ خۆ ب خودان بزانن و خەلکێ خۆجھــ دکەنە بیانی و باجێ ل خەلکی وەردگرن ، ل ھەرێما کوردستانێ پەکەکە بوویە ئەگەرێ راکێشانا لەشکرێ وەلاتێ تورکیا و بومبە بارانکرنا گۆندێن کوردستانێ و چەندین وەلاتیێن سڤین بووینە قوربانی .
ئەوێن نەشیای گۆندەکێ باکوورێ کوردستانێ رزگار بکەن ھاتینە باشوورێ کوردستانێ دەوڵەت و ھەرێمێن ئاشووپی ئاڤا دکەن و لگەل وەلاتێن داگیرکار پیلانێن ژناڤبرنا قەوارێ ھەرێما کوردستانێ دادرێژن و کارمەندێن حکومەتێ و خەلکێ سڤیل تیرۆر دکەن . ھەوڵ ددەن شیرازێ جڤاکی یێ کوردستانێ تێکبدەن و ل دەرفەتەکێ دگەڕێن ل دەڤەرێن جودا جودا چەکدارێن خۆ لێ بجە بکەن و خۆ بکەنە حاکمێن وێ ، ھەر وەکی ل شنگالێ .
ب ڕەنگەکێ گشتی پەکەکە پارتیەکا بێ ستراتیژیەت و ئارمانجێن دەست نیشان کریە و یا دوورە ل بەنەمایێن نەتەوەیی و نشتیمانی ، گرۆپەکێ تیرۆرستی و بازرگانیا سیاسی و لەشکری یە ، لەوما نەشیایە ببیتە پارتیەکا جەماوەری و لسەر ئاستێ جیھانێ ژی ب تیرۆرست دھێتە دیتن .
ب درێژاھیا دیرۆکا خۆ ئێک دەسکەفت بۆ خەلکێ کوردستانێ نەبوویە و ھەمی گاڤێن وێ بۆ ژناڤبرنا دەسکەفتێن خەلکێ کوردستانێ نە ، بووینە لەشکرەکێ سێبەر بۆ وەلاتێن داگیرکارێن کوردستانێ .
چ دووربینی و پلان و ستراتیژی نینە و لگەل و بوویەرێن رۆژەڤێ رەفتارێ دکەن داکۆ دەسکەفتێن ماددی بدەست بینن و چ خەم بۆ لدەستدانا دەسکەفتێن پیرۆزێن خەلکێ کوردستانێ نینە و ئەو ژی نزانن کا چ دکەن ..!
ب کورت و کرمانجی پەکەکە رێکخستن و ھێزەکا چەکداری یە دژی ماف و ئارمانجێن خەلکێ کوردستانێ و بجە ئینانا پلان و ئەجندایێن وەلاتێن داگیرکارێن کوردستانێ ..!