تێگەها تۆتالیتاری ( الشمولیە) دناڤبەرا هەردوو جەنگێن جیهانی ئێکێ و دوویێ دا پەیدا بوویە، وەک زاراڤەک سیاسی هاتیە ناس کرن و وەک ئایدیەک هاتیە پەیرەو کرن، نەخاسمە د سەدێ بیستێ دا.
تۆتالیتاری ئاماژەیە بو دەستهەلات و حوکمرانیەک تاک رەوی، خوە سەپاندن، دەست بسەر داگرتن، مایتێکرن د بوارێن ژیانێ دا هەتا دەگەهیتە ئازادیا تاک.
ب لێکدانەڤێن جودا تێگەها تۆتالیتاری هاتیە تێکهەل کرن دگەل هن هزرو تێگەهێن دیتر، وەکو مارکسی و سوسیالیزمی، دیارترین نمونە ئێکەتیا سۆڤیەت یا بەرێ و هەتا دگەهیتە هن حکومەتێن عەرەبی یێن دبن سێبەرا شمولیەتێ را حوکمرانی کرین.
ل دویماهیکێ هاتیە تێکهەل کرن دگەل بنەمایێن ئاینی و وەکو ئایدیایەک زێدەتر بەرف توند رەویێ وەکو داعش.
دگەل قوناغێن پێشکەفتنێ و هوشیاریا جڤاکی و پەیدا بوونا هزر و تێگەهێن دن کو زێدەتر د گونجای بوون دگەل قوناغێن پێشکەفتنێ، وە پاش ئەو هەموو کارەساتێن مروڤایەتیێ بخوڤە دیتی ل ئەنجامێ هەبوونا دەستهەلاتێن تۆتالیتاری، هێدی هێدی ئەف دەستهەلاتە بەرەف هەلوەشیانێ چوون و خوەدی تێگەهێ بەرف بوهژتن و نەمانێ ڤە چوو.
ئیرو ل روژهەلاتا ناڤین، دەمەکە رەوشەک نوی هزری و سیاسی پەیدا بوویە، ل ئایندە دێ بیتە ئەگەرا پەیدا بوونا گوهرینێ د نەخشێ سیاسی دا ل دەڤەرێ، کو کورد دێ پشکەک بن ل ڤێ پروژەی و کورد شیاینە ل باشورێ کوردستانێ ببن خودان پێگەهەک و قەوارەکا سیاسی یا بهێز کو ل ئەنجامێ خەباتەکا نەتەوەیی هاتیە بدەست ڤە ئینان، ئەف پێگەهە وەکو بناغەکی یە بو بدەست ڤە ئینانا ئارمانجێن نەتەوەیی و مافێن سروشتی وەکو نەتەوە و مافێ دەولەت بوونێ.
بۆ گەهشتنێ ب ڤێ ئارمانجێ، کوردان پێدڤی ب خو کوم کرنێ هەیە، پێدڤی ب هاریکاری و پشتەڤانیا تەڤایا لایەنێن سیاسی یا هەر چوار پارچێن کوردستانێ هەیە، پەیدا کرنا کو دەنگیێ کارەک فەرە د ڤێ قوناغێ دا، نەخاسمە دوژمنێن گەلێ کورد ل هەموو ئالییان پیلانا ل دژی قەوارا هەرێما کوردستانێ دگێرن.
پ ک ک وەکو بناڤ بزاڤەک سیاسی ل باکورێ کوردستانێ ل سالا ١٩٨٧ هاتیە پێک ئانین، لەبن دروشمێ دامەزراندنا دەولەتا کوردی دەست ب خەباتا چەکداری و سیاسی کریە، لێ دگەل هندێ خودان هزرو ئایدیایەک زەلال نەبویە، کوتارا سیاسی زێدەتر ئاشوب بویە، هەلوێست توند بوینە ل هەمبەر پارت و بزاڤێن پارچێن دیتر، ب تێکهەل کرنا هزرێن مارکسی و سوسیالیزمی و تۆتالیتاری سەردەری دگەل پرسان کریە و تا نها ل سەرهەمان هەلوێست با بەردەوامە، نەخاسمە هزرا تۆتالیتاری بسەردا یا زال و دیارە، کو بەردەوام بزاڤێن خوە سەپاندنێ داینە هەمبەر ب پارتێن سیاسی، یان دەڤەرێن ئاکنجی بوونێ ل سەرانسەرێ کوردستانێ.
ئەف هەلوێستێ دویر ل خەباتا راستەقینە، پ ک ک دوجاری رخنەیێن مەزن کەیە و بویە مایێ بێزاریێ دناف تەخێن جڤاکی و سیاسی دا ل یەرانسەرێ کورۆستانێ.
ئەوا ئەم لێ پشت راستین، ئەگەر سەروکانیەک هشک بوو، ئیدی دەراڤێن وێ ژی هشک دبن.
یا فەرە ئەم پرسیارەکێ بکەین و بێژین..
- ئەرێ پاش هشک بوونا سەروکانیا هزری یا تۆتالیتاری، چما پ ک ک نەکارینە خوە نوی بکەنەڤە و دگەل قوناغێن پێشکەفتنێ خوە بگونجینن و بەردەوامیێ ب خەباتا نەتەوەیی بدەت؟.
- ئەرێ ل ئەنجامێ ئەو خەباتا پ ک ک ، تا نها چ دەستکەفت و ئەنجام بو هەبوینە، نەخاسمە ل قەوارا خەباتا وانا کو باکورێ کوردستانێ یە؟.
گومان تێدا نیە کو بەرسف دێ ب رەنگەکێ نەرینی بیت و خودی پ ک ک دێ کەڤیتە بەر گومانەکا مەزن ل دلسوزیا وانا بو خەباتا نەتەوەیی یا گەلێ کورد؟!.
ئیرو پ ک ک دویر ل قەوارا خەباتا خوەو، ل سەر ئاخا باشورێ کوردستانێ دڤێت خوە بکەت خودان دەستهەلات و دخازیت ب هەمان هزرا تۆتالیتاری حوکمرانیێ بکەت!.
ئەڤە نەک چالاکی نە د چارچوڤێ خەباتا نەتەوەیی دا، بەلکو بزاڤەکە بو لاواز کرنا پێگەها هەرێما کوردستان و دەستێوەردانە ل کاروبارێن حکومەتا هەرێما کوردستانێ، کو ئەف هەلوێستە دویرە ل بەرژەوەندیێن نەتەوەیی یێن گەلێ کورد، نەخاسمە د ڤان کاودانێن نازک و ئالوز دا کو هەرێما کوردستانێ ب تایبەت و دەڤەر ب گشتی تێدا دەرباز دبیت.
گومان تێدا نیە، ئەف هەلوێستێ پ ک ک هەروە نینە، بەلکو دەستەکێ دەرەکی ل پشت هەیە، ئیرو پ ک ک وەکو ئامرازەک د دەستێ وانا دایە و ل دژی هەرێما کوردستانێ تێتە بکارئینان.
باشورێ کوردستانێ نە دەڤەرا چالاکیێن پ ک ک یە و نە هیچ وەختەکی پ ک ک دکاریت ببیتە خودان دەستهەلات تێدا، دڤێت پ ک ک ل باکورێ کوردستانێ بەردەوامیێ ب خەباتا خوە بدەن، بکارن ئاخا کوردستانی رزگاربک ن و ببن خودان قەوارەک سیاسی و ئیداری و ببن پشکەک ل بناغێ ئایندێ کوردستانێ.
لێ ئەوا روون و دیارە پ ک ک ل باکورێ کوردستان و روژئاڤا و نها ژی ل باشور، دووچاری ئیفلاسەکا هزری و سیاسی و جەماوەری بوویە، ل جیاتی خوە نوی کرنەڤە و بەردەوامی دانێ ب خەباتا کوردایەتیێ، خوە بەرزە کریە و کەتیە دەستێ دوژمنێن گەلی کورد و خزمەتا ئەجندێن وانا دکەن.
جیهانا ئیرو، جیهانا خەباتێن راستەقینەیە، جیهانا دیموکراسی و ئازادیا گەلانە، جیهانەک نوی و بەرەف ئایندەک نوی تر هەنگاڤ دنێت، نەک مانەڤە ل بن سێبەرا هزرێن وەخت بسەرڤە چوی و نەگونجای دگەل قوناغا ئیرو.
مانەڤا پ ک ک لسەر ڤێ هزرێ و ڤان کارێن دویر ل ئارمانج و ئێک رێزیا گەلێ کورد، پ ک ک دئێخیتە بەرامبەر بەرپرسیارەتیەکا مەزن، کو ل ئایندە دێ باجا وێ گەلەک یا مەزن بیت و خودی پ ک ک دێ دووچاری هەلوەشیان و ژنافچونێ بیت.