ھەردەمێ بزاڤا رزگارخوازیا کوردستانی چڕایەک بۆ ئازادی و رزگاریێ ل بن دەستێ داگیرکاریێ و بەختەوەریا جڤاکێ کوردستانێ ھەلکربیت، دۆژمن و داگیرکارا ھەول داینە ڤی چڕایەی ڤەمرینن و شەفەقێ نەدەتەڤ سەرتاسەرێ کوردستانێ، ئەگەر شیان ھەبن درێکا لەشکری را بوویە و ئەگەر نەر درێکا پیلانێن نیڤ دەولەتی و ھەرێمی بوویە، ئەگەر بڤان ھەردوو رێکا ژی را دەسفەت نەببت درێکا کوردێن کرێگرتی و خۆفرۆش بوویە .
وەک خیانەتکرن ل کۆمارا کوردستان ل مەھاد ل دووماھیا سالا ١٩٤٦ ، یان رێکەفتنا خیانەتکارای نیڤ دەولەتی دژی مەزنترین دەسکەفتێ شۆرەشا مەزنا ئیلۆنێ ل سالا ١٩٧٥ و پیلانا سالا ١٩٨٨ و چەندین گاڤێن دووبەرەکیکرنا سەرکردێن کوردستانی و کرینا ھندەک ژوان ب سەروەت و سامانی و ھندەک ژی ب پێدانا پلە و پۆستا ھەر ل سالێن شێستان دا ھەتا نھۆ .
ئەڤێ چەندێ پێشینەیەکا زۆر کەڤنتر ژی ھەیە ھەر لسەردەمێ میرگەھێن کوردی .
راستە وەکی قەبارە پیلان و رێکەفتنێن نیڤ دەولەتی و ھەرێمایەتی ل گەل خیانەت و خۆفرۆشێن چەند بناڤ سەرکردە و پلەدارا ناھێتەکرن، لێ وەکی کاریگەری، خیانەتا ناڤخۆیی کاریگەرتر و بەردەوامیترە .
ئەگەر رێکەفتنا خیانەتکاریا نیڤ دەولەتی دژی بزاڤا رزگاریخوازیا کوردستانی و شۆرەشا مەزنا ئیلۆنێ ب رێبەریا پارتی دیموکراتی کوردستان و بارزانی نەمر یا ( ٦ ) ێ ئادارا سالا ١٩٧٥ ل گەل خیانەتا وی گرۆپێ خیانەتکاری یێن دناڤ بزاڤا رزگاریخوازیا کوردستانی بکەین ل سالێن شێستان و ھەشتێیان ل سەردێ بووری بکەین شۆنوار و کاریگەریێن خیانەتا ناڤخۆیی بەرچاڤتر و زێدەترن، راستە خیانەتا سالا ١٩٧٥ ژلایێ چەند وەلاتێن ھەرێمی ب چاڤدێریا زلھێزترین وەلاتێ جیھانێ بوو ، لێ نەشیا دەنگ و ھێزا شۆرەش و بزاڤا رزگاریخوازیا کوردستانێ کڕ و بێ دەنگ بکەت و پشتی ساڵەکێ شۆرەشا کوردستانی ب رەنگ و شێوازەکێ سەدەمانەتر و ووڕەیەکا بلندتر و خۆرترا جەماوەری دەست ب چالاکی و بەرنامێن خۆ کرەڤە و پشتی دەمەکێ دیتر شۆنوارێن وێ خیانەتێ نەمان، گەھشتە وی ئاستی چاڤدێرێن وێ خیانەتێ ب رەنگەکێ نەڕاستەوخۆ دانپێدانێ ب خەلەتیا خۆ بکەت و ببیتە پشتەڤانێ بزاڤا رزگاریخوازیا کوردستانی بۆ بدەستڤەئینانا ماف و ئارمانجێن گەلێ کورد و شۆرەشێ، ئانکۆ رێکەفتن و خیانەتکاریێن سیاسی ئەگەر د نیڤەدەولەتی ژی بن ، گۆڕانکاری و بەرۆڤاژیکرنا وان مەحال نیە ..! چونکی سیاسەت پاراستنا بەرژەوەندا یە ھەر وەکی ئەڤرۆ ل کوردستانێ دھێتە دیتن و شۆنوارێن وان خیانەتکاریێن نیڤ دەولەتی نەماینە .
لێ خیانەتا نڤخۆیی بەرۆڤاژی وێ چەندێ یە ، کاریگەریەکا زێدەتر ل شۆرەشێ و بزاڤا رزگاریخوازی و دەسکەفتێن نشتیمانی ھەیە ، چونکی بۆ ھەتا ھەتا بێ باوەری دناڤبەرا سەرکردایەیتا شۆرەشێ و شۆرەشگێرا لگەل باندا خیانەتکار و خۆفرۆش دێ مینیت، ژلایەکێ دیتر خیانەتا ناڤخۆیی بێ باوەریێ دناڤ مللەتی دا درۆست دکەت ، ئەگەر چەند نفشێن دیتر ژی بھێن ، ھەر وەکی ھەتا نھۆ خەلکی ب چاڤەکێ کێم و کرێت بەرێ خۆ ددەتە نەڤی و نەڤی چرکێن وان خیانەتکارێن سەردەمێن میرگەھێن کوردی ، و دبیتە ئەگەرێ گۆڕینا شیرازێ جڤاکی و سەرھەلدانا ھەڤرکیێن نەسرۆشتی و درێژ خایەن دناڤبەرا دوو لایەنیان دا ، ھەر وەکی ل ھەرێما کوردستانێ ھەی .
رێککەفتن و ھەڤپەیمانیا گرۆپەکێ دەسھەلاتدار دناڤ ئێکەتیا نشتیمانی بۆ رادەستکرنا زێدەتر ل نیڤەکا ئاخا کوردستانێ وەک کەرکووکێ و دەڤەرێن کوردستانی یێن دەرڤەی ئیدارا ھەرێما کوردستانێ ب حکومەتا ناڤەندی یا عیراقێ و لەشکرکێشیا حەشدا شەعبی و میلیشیایێن وەلاتێن ھەرێمی بۆ ژناڤبرنا قەوارێ ھەرێما کوردستانێ ل ١٦ ئکتۆبەرا سالا ٢٠١٧ خیانەتەکا مەزنا نشتیمانی بوو و ئەو برین و دووبەرەکیێن ژ ئەنجامێ وێ دناڤبەرا ھێزێن کوردستانی یێن وەلاتپارێز و باندا خیانەتکار و دناڤبەرا جڤاکێ کوردستانێ دا ب گشتی دروست بووی ب دەھان ساڵێن دیتر ناھێنە سارێژکرن و زیانەکا ھەرە مەزن گەھاندە پرسیا سیاسی یا کوردستانی و ئاشتەوایی و پێکڤە ژیانا کوردستانیا ، لێ ئەو پیلان و ئابلۆقێن سیاسی و ئابووری یێن ل وی دەمی بۆ ھەرێما کوردستانێ دارشتی و سەپاندی ، ب چەند کۆمبوون و سەرەدانێن سەرۆکێ ھەرێمێ و سەرۆکێ حکومەتێ ھندەک ھاتینە چارەکرن و ھندەک ژی بەەرڤ چارەکرنێ و ڕەنگە پشتی دەمەکێ کورت ئەو گەماروویێن ئابووری و پیلانێن سیاسی دژی کوردستانێ بھێنە ژبیرکرن و ئەو وەڵات و ھێز و لایەنێن سیاسی یێن پشکەک ل وێ خیانەتێ ببنە دوست و پشتەڤانێن ھەرێما کوردستانێ ، لێ شۆنوار و کاریگەریا خیانەتا ١٦ ێ ئکتۆبەرێ ھێشتا د ناخێ خەلکی دا یا زیندی و سالانە دھێتەڤ نۆژەنکرن .
دڤێرەدا دیار دبیت کۆ خیانەتا نشتیمانی یا ناڤخۆیی ل پیلان و خیانەتا سیاسی یا دەرەکی مەترسیدارتر و کاریگەرترە و پێتڤی یە ب یاسایێ سنوورەک بۆ بھێتە دانان و سزایەکێ تۆند ژی بۆ بھێتە دانان و حکومەتا ھەرێما کوردستانێ بتایبەت ھەردوو وەزارەتێن ئەوقاف و کار و بارێن جڤاکی و سازیێن جڤاکێ سڤیل و راگەھاندنێ پلانەکا درێژخانەین دابرێژن بۆ ئاشتەوایا جڤاکی و نەھێلانا شۆنوارێن خیانەتا ناڤخۆیی و ئێکرێزیا ئالیێن سیاسی یێن کوردستانێ بۆ دابینکرنا پاشەرۆژەکا گەش و ئازاد بۆ خەلکێ کوردستانێ کۆ ھەژی ڤێ چەندێ و بۆ ڤێ چەندێ چەندین قوربانی داینە .