رێبازا بارزانی وەکی رێبازەکا ئاشتیخوازی و مرۆڤایەتی ژ پێخەمەت ئازادی و رزگاریا کورد و کوردستانێ و چەسپاندنا دادوەریێ و پاراستنا ژینگەھێ و ساخلەمیا جڤاکێ کوردستانێ ب درێژاھیا زێدەتر ل ١٠٠ سالایە تێکۆشینێ و خەباتێ دکەت و قوربانیێن بێ ھژمار داینە .
بنەمایێن ڤێ رێبازا پیرۆز بووینە جھێ دلتەنگی و دلگرانیا رژێم و جڤاکێن دەورو بەر ، ئەگەر پسیار بکەین ئەرێ چاوا و بۆچی ئەڤ رێبازە بەرفرەە و دوومدار بوو .؟ بەرسڤ ب کۆت و کرمانجی دێ ئەو بیت ، ئەڤ رێبازە پەناگەھـ پشتەڤانا ھەژار و زۆڵم لێکریا بوویە و خەلک لبن سێبەرا زوڵم و زۆرداریێ ، پەنا برە بن سێبەرا دادوەری و وەک ھەڤی و ئازادیێ و ماف پارێزیێ ، ئەو ژی رێبازا بارزانی بوویە ، ھەر لسەردەمێ شێخ عبد اللە باپیرێ مەزن و پاشان شێخ عبد السلامێ ئێکێ و شێخ محمدی و شێخ عبد السلامێ دوویێ و شێخ احمدی و نەمر مەلا مستەفای بارزانی و نھۆ ژی سەرۆک مەسعوود بارزانی .
ھەر لدەسپێکا سەرھەلدانا رێبازا بارزانی ، لدیف دەم و کاودانان، نەیارێن گەلێ کورد و ڤێ رێبازێ برەنگەکێ تیرۆرستی و لدیف سەردەمی بەرھنگاریا ڤێ رێبازا پیرۆز کریە ..!
لێ ژبەرکۆ رێبازەکا مافخواز و دادوەر و راست و رەوا بوویە لسەر وان ھەمی گەف و پیلان و ھەولێن تیرۆرستی بسەر کەفتیە و ھەتا نھۆ ژی ل سەرکەفتنا یا بەردەوامە .
راستە ھەولا نەسەرکەفتیا رژێما گۆر ب گۆڕا عیراقێ بۆ تیرۆرکرنا بارزانی نەمر لرۆژەکا وەکی ئەڤرۆ بەری ٤٩ سالا ٢٩/٩/١٩٧١ ل دەڤەرا حاجی ئۆمەران ، ئێک ل وان پیلانێن رژێما عیراقێ دژی بارزانی نەمر و بزاڤا رزگاریخوازیا کوردستانی پشتی سەرکەفتنێن شۆرەشا مەزنا ئیلۆنێ ب سەرپەرشتی و پشکدارایا راستەخۆ یا بارزانی نەمر .
لێ د بنەڕەت دا پیلانەکا مەزن و دارشتی بوو دژی رێبەر و سەرکردێ ڕەوتەکا چاکسازخواز و دیموکراتخواز و ئاشتیخواز و مرۆڤ پەروە ، نەک تنێ رێبەر و سەرکردێ بزاڤا رزگاریخوازیا کوردستانی ، ئەو ڕەوتێ جڤاکێن گرتی و کەڤنەپەرست و پاشکەفتی و شوفینی ، دگۆڕیت بۆ جڤاکێن ڤەکری و دیموکراتخواز و ساخلەم ، کۆ رێبازا بارزانی یە .
ھەوڵا تیرۆرکرنا بارزانی نەمر ، ھەوڵا تیرۆرکرنا ئاشتی و ئازادیێ و دیموکراسیەتێ و دادوەریێ و دەنگێ ئازاد بۆ نەک تنێ لسەر ئاستێ کوردستانێ بەلکی لسەر ئاستێ عیراقێ و دەڤەرێ .
چونکی رێبازا بارزانی پێشەنگا دیموکراسیەتێ و مافخوازیێ و فڕە ئایینیێ و وەک ھەڤیێ بوو ل دەڤەرێ ، لدەمەکێ ئەڤ درۆشمە ھەلگرتن و کرنە بنەمایێن کار و خەباتا خۆ کۆ نھۆ پشتی بوورینا سەرد سالا خەلکەکێ ڤان درۆشما بلند دکەت و بۆخۆ دکەتە شانازی ..! ئەڤە ئیلھامەکە ل ئیلھامێن رێبازا بارزانی کۆ بۆ چەندین سالێن داھاتی پێشبینیا دکەت و ستراتیژیەتێ دادرێژیت .
لەوما ھەردەم رێبازا بارزانی و پەیرەوکارێن وێ بەری ھەر کەسەکی نیشان و ئارمانجا دوژمن و داگیرکار و کەڤنە پەرستا بوویە .
دەربازبوونا بارزانی نەمر ب سلامەتی ل وێ ھەولا تیرۆرستی ئیلھامەکا دیترا خودایی یە . شێوازێ دارشتنا وێ ژی کۆ درێکا بناڤ مامۆستایێن ئایینی بوو ، ڕامانەکا دیتر ھەبوو ، ئەو ژی رێزگرتنا بارزنی نەمر بوو بۆ مرۆڤێن ئایینی و پێگیریا وی ب ئایینێ پیرۆزێ ئیسلامێ ، لەوما رژێما بەعسا عیراقێ ل وی دەمێ بن پەردا مەلا و زانایێن ئیسلامێ ھەولا تیرۆرکرنا بارزانی نەمر دا .
نھۆ ژی پەیرەوکارێن رێبازا بارزانی پێشەنگێن بەرھنگاریا تیرۆرێ و تیرۆرستانە ، بەلگە ژی لسەر ڤێ چەندێ سەرکەفتنا پێشمەرگەھێن کوردستانێ بسەر مەزنترین رێکخستنا تیرۆرستیا جیھانی ( داعش ) ب سەرپەرشتی و پیشکداریا سەرۆک مەسعوود بارزانی .