دامەزراندنا دەولەتا کوردستانی خەونا هەرە دێرینا خەلکێ کوردستانێ یە و بۆ ڤێ مەبەستێ زێدەتر ل سەد ساڵایە خەباتێ بۆ دکەت و قوربانیا ژی ددەت و لدیف بنەمایێن ئایینی و یاسا و جارنامێن نیڤ دەولەتی ژی سەرخۆبوون مافەکێ ڕەوا و سرۆشتی یێ هەر مللەتەکی یە .
نەتەوا کورد ژی ڕەنگە مەزنترین نەتەوێ بێ دەولەت بیت لسەر ئاستێ جیهانێ، مخابن ب درێژاهیا دیرۆکێ ڕەوش و کاودانێن سیاسی و بەرژەوەندێن وەڵاتێن زلهێز گەلێ کورد بڤێ خەونێ شاد نەکریە، پشتی دەربازبوونا 26 ساڵا بسەر نیمچە ئازادیا باشوورێ کوردستانێ ل ئدارا ساڵا 1991 ێ و 14 ساڵان بسەر ژناڤبرنا رژێما دکتاتۆریا بەعسا عیراقێ ل سالا 2003 ێ یێ و ئاڤاکرنەڤا وێ لسەر بنەمایێ دیموکراسی و فیدرالی و چەسپاندنا پشکەکا زۆرا مافێن گەلێ کورد ل دەستوورێ هەردەمیێ عیراقێ ،
ڤان حکومەتێن عیراقێ ژی جارەکا دی مافێن رەوا و دەستووریێن خەلکێ کوردستانێ بنپێکرن و بەرۆڤاژی دەستوورێ هەردەمی سەرەدەری ل گەل خەلکێ کوردستانێ وەک مللەت و هەرێما کوردستانێ وەکی قەوارەیەکێ یاسایی و دەستووری کر ، ژ وان بنپێکرنا بجهـ نەئینانا ماددێ 140 یێ دەستوورێ عیراقێ کۆ پاشەرۆژا زۆر دەڤەرێن کوردستانی یێن دەرڤەی ئیدارا هەرێماکوردستانێ پێڤەدگرێدایینە ، هەر وەسا درۆستکرنا ئاستەنگا لهەمبەر پێشڤەچوونا کوردستانێ ژلایێ ئابووری و دارایی ب بڕینا بۆدجە و مۆچێ هەرێمێ.

ئەڤان ڕەفتار و سەرەدەریێن دەولەتا عیراقێ لهەر هەرێمێ ، خەلکێ هەرێمێ بێ هیڤی و ئۆمێد کر لەوما ب سەرپەرشتیا جەنابێ سەرۆک مەسعوود بارزانی و پارتی دیموکراتی کوردستان و پارتیێن کوردستانی بریارا ئەنجامدانا ڕاپرسیێ هاتە دان و بسەرکەفتنەکا مەزن لرۆژا 25 ێ ئیلۆنێ هاتە ئەنجامدان و خەلکێ کوردستانێ ب بەلێ بۆ سەرخۆبوونا کوردستانێ بریارەکا دیرۆکی و چارەنڤیسساز دا .
ئەگەر لێنێرینەکا دیرۆکی لڤی مافێ ڕەوا و سرۆشتیێ گەلێ کورد بدەین دێ بینین کۆ هەردەم پارتی دیموکراتی کوردستان و سەرکردایەتیا وێ هەردەم دەستپێشخەر و پێشەنگێن بدەستڤەئینانا ڤی مافەی بوونە و قوربانیێن بێ سنوور ژی بۆ دانە ، لێ بۆ بدەستڤەئینانا ڤی مافەی ب پلان و بەرنامەی و قۆناغ قۆناغ بوویە کۆ دگەل ڕەوش و سەرمان بگۆنجیت ، ئەڤەژی سیاسەتەکا سەرکەفتی بوویە .
چونکی ب گاڤەکێ ، کەس ناچیتە سەرێ چیایەکی ، لەوما بزاڤا رزگاریخوازیا کوردی بسەرۆکایەتیا پارتی ل مافێن ڕەوشەنبیری و کلتۆری دەستێکریە هەتا گەهشتە ئۆتۆنۆمیێ ڕاستەقینە و هەوڵا سەرخۆبوونێ .
ئەڤە نیشانە کۆ بەرنامە و ستراتیژیەتا پارتی بۆ بدەستڤەئینانا مافێن خەلکێ کوردستانێ یە و ب وێرەکی و دلسۆزی بەڕەڤانیێ لێ دکەت، ئانکۆ سەرخۆبوونا کوردستانێ ئارمانجا پارتی بوویە ل دامەزراندنێ هەتا نهۆ .
لەوما سەرۆک مەسعوود بارزانی و پارتی لسەر ڤان بیر و باوەران، دەستپێشخەر و پێشەنگێن ڕاپرسیا سەرخۆبوونا کوردستانێ بوون و هەڤڕکیا هێز و وەڵات و لایەنێن مەزن یێن دژبەرێن ڕاپرسێ کر و ب پشتەڤانیا پڕانیا خەلکێ کوردستانێ ئیرادا ریفراندۆمچیا بسەر ئیرادە و پیلانێن دۆژمنا سەرکەفت .
راستە ژبەر نەبوونا پشتەڤانیا نیڤدەولەتی و وەڵاتێن زلهێز و هەرێمی و سەرهەلدانەڤا گرۆپەکێ خایانەتکارێن ناڤخۆیی ل هەرێما کوردستانێ ل 16 ێ ئکتۆبەرا هەمان ساڵ ، ئارمانجا ڕاپرسیێ بجهــ نەهات ، لێ ئەڤ بریارا دیرۆکی و نشتیمانییا خەلکێ کوردستانێ دێ هەر مینیت بریار و بەڵگەنامەکا دیرۆکی و کارپێکەر و دانپێدانکری لسەر ئاستێ نەتەوی و هەرێمی و ب چ کەس و لایەنان ناهێتە هەڵوەشاندن .
خائین و دژبەرێن ڕاپرسیێ ئەوێن بووینە پشکەک ل هێزێن داگیرکار پشتی ڕاپرسیێ هەمی شیان و پیلانێن خۆ تەرخانکری بۆ ژناڤبرنا قەوارێ هەرێما کوردستانێ ، ژلایێ لەشکری بسەرپەرشتی و رێنمایی یێن سەرۆک مەسعوود بارزانی و پێشمەرگەهی هاتنە شکەستن و شەرمزارکرن و ژلایێ سیاسی ژی ب سیاسەت و دبلۆماسیەت و کاریزمایا سەرۆک نێچیرڤان بارزانی هاتنە ژناڤبرن و هەرێما کوردستانێ و قەوارێ وێ ل مەزنترین پیلان و قەیران دەرباز کر .
ئەڤ هەمی بەرخودان و خۆڕاگریا پارتی و سەرۆک بارزانی بۆ پێشڤەبرنا دۆزا سیاسیا کوردستانێ و گەهشتن ب ئارمانجا دۆماهیێ دبێژنە دووست و دۆژمنا هەردەمێ دەولەتا کوردستانی دهێتە دامەزراندن دێ لسەر ئەنجامێن ڕاپرسیا سەرخۆبوونا 25 ێ ئیلۆنا ساڵا 2017 ێ بیت و سەرۆک بارزانی ژی دێ دامەزرێنەر بیت .