ل دەسپێکا هەبوونا مرۆڤایه‌تیێ و پەیدابوونا جڤاکان ، دادپەروەری پێتڤیەکا فەر و بەردەوام بوویە ، چونکی ب دادپەروەریێ مرۆڤایەتی و جڤاک گەشێ دکەن ، چونکی دادپەروەری ئارامیێ و برایەتیێ دابین دکەن .
ئارامی و برایەتی ژی ، بزاڤێن ئابووری و سیاسی و ئاڤەدانی بەردەوام پێشڤە دبەن .
لێ ژبەر بەرژەوەندێن بەرتەسکێن کەسی هەمی کەس و سەرکردە نەشێن دادپەروەریێ دابین بکەن ، ب تایبەت لناڤ جڤاکێن بێ دەولەتێن سەربخۆ ، لەوما جڤاکا پێتڤی ب دەسهەڵاتەکا تایبەت و سەربخۆ یا دادوەری هەیە .
لێ لسەردەستێ شێخێن بارزان شێخ عبد السلام و شێخ احمد بارزانی به‌ریا پتر ژ چه‌رخه‌كێ دروست لسه‌ر داد په‌روه‌ریا جڤاكی ل دەڤەرا بارزان پەیدابوویە و هاتیه‌ چه‌سپاندن لسەر هەمی تاکێن جڤاکێ بێ جوداهی ، و ل وی ده‌می هه‌تا ئه‌ڤرۆ دادپەروەری وەکی بەندەکا سەرەکیا ده‌ستووریا جڤاكی بوویە دناڤ جڤاکێ بارزان و بوویە فاکتەرێ ئاڤاكرنا ژیانه‌كا ساخله‌ما جڤاكی و بەختەوەریێ، هەر ل وی دەمی هەتا نهۆ ل بارزان ژیانا خەلکێ دەڤەرێ وەکی یاسایەکا دادوەرانە هاتیە رێکخستن ، نە تنێ بۆ مرۆڤان بەلکی بۆ تەڤایا گیاندارا و ژینگەهێ ژی وەکی دەستوورەکی یە و نابیت سەرپێچی لێ بهێتە کرن .
پتر ژ چه‌رخه‌كی یه‌ دەڤەرا بارزان نموونێ ژینگه‌هـ پارێزیێ و ژینگه‌هـ دووستیێ و دادپەروەریێ بوویە ، جودا ل دەڤەرێن دیتر یێن کوردستانێ و عیراقێ و دەڤەرێ ،
ئەڤێ چەندێ ژی چەند ئەگەرێن خۆ هەبوونە :ـ
١ ــ بجهئینانا وان بریار و ڕاسپاردا وەکی یاسا و دەستوور لسەر هەمی تاک و گۆندان بێ جوداهی .
٢ ــ دەرنەچوونا خەلکی ل بریار و رێنمایی یێن شێخی .
ئەڤەژی بۆ دادپەروەریا شێحێن بارزان ڤەدگەرێت و هەتا کۆ بوویە فه‌رهه‌نگەکا تایبەت یا مرۆڤایەتیێ ل ده‌ڤه‌را بارزان .
ئەڤ دادوەریا بارزان بوویە فاکتەرێ پاراستنا ژینگه‌هـێ و گیانداران ، داروبار و كه‌سكاتی و ئاژه‌ڵێن و باڵندە بووینە دوستێن مرۆڤا و پشكه‌كا گرنگ ل ژیانا خەلکێ ده‌ڤه‌رێ ، هەر لسه‌ر ده‌مێ دامەزراندنا تەکیا بارزان ، هەتا نهۆ .
كۆشتنا په‌ز كیڤیا و باڵندا و بڕینا داروبارا هاتیە قەدەغەکرنا و ب تاوان هاتینە هژمارکرن، و سزایێن گران بوو هاتینە دان .
ل بارزان داد په‌روه‌ریا جڤاكی هاتیه‌ چاندن و به‌ڵاڤكرن و چۆ جوداهی ناڤبه‌را ئافره‌ت و زه‌ڵامان دا نه‌هاتیه‌ كرن و چۆ جارا رێك نه‌دایه‌ دیاره‌ده‌یا ژن ب ژنیێ و بچوك ــ مه‌زن ل ده‌ڤه‌رێ بهێته‌ ئه‌نجامدان ژبه‌ركۆ وه‌سا هاتیه‌ ناسین كۆ دووره‌ ژ بنه‌مایێن دادپه‌روهریێ.
ئافره‌تا كورد ب گشتی و یا بارزان ب تایبه‌تی پشتی ئه‌نفاڵا ره‌شا 1983 ێ ب گشتی بۆنه‌ قوربانیده‌رێن سه‌ركی و ب رێڤه‌برنا ژیانه‌كا گران ژبه‌ركۆ هه‌ڤژین و كه‌س و كارێن وان هاتنه‌ گرتن ئه‌و نه‌چاربوون كارێ ئافره‌ت و زه‌ڵاما بكه‌ن شیان وێ داد په‌روه‌ریا هاتیه‌ دارشتن لسه‌ر ده‌ستێ شێخێن بارزان وه‌ك خۆ بپارێزین و هه‌تا نوكه‌ ئافره‌تا بارزان بۆیه‌ نموویه‌كا مه‌زن و دیار ل ناڤ جڤاكێ كوردستانێ كۆ هه‌ڵگرا هه‌موو بنه‌مایێن داد په‌روه‌ریا جڤاكیه‌ .