پیلانگێری ناوخۆیی و تێكدانی یەكڕیزی نەتەوەیی، كێشەی هەر گەورەی میللەتی كورد بووە بە درێژایی مێژوو.
داعش هات لە چوارچێوەی پیلانێكی داگیركاری و كاولكاری هه‌ڕه‌شه‌ى مه‌رگى له‌گەڵ خۆ هێنا بۆ میللەتی كورد، ئەم خاكە بە خوێنی هەزاران ڕۆڵەی ئەم نشتیمانە پارێزگاری لێ كرا.
كەچی لەم ڕۆژانە بێ بەرپرسیاریەتانە گروپێك یاری بە ئازارەكانی میللەتێك دەكات، خوێنی هەزاران شەهید هەرزان فرۆش دەكات، خەریكی ڕادەستكردنی داعشن بە سەفقەیەكی نهێنی سیاسی كە خستونیەتە ژێر دەیان نیشانەی پرسیار .
ڕادەستكردنی ۱۷٦ تۆمەتباری تیرۆر لە سلێمانیەوە بە ئیدارەی کەرکووک و سەرۆک عەشیرەتە عەرەبەکانی سنوورەکە، وەك كلتورێك لە دەیان كلتوری نوخبەیەكی سیاسی دیاریكراودا هەوڵێكی مەبەستدار و زەمینەسازكردنە بۆ خولقاندنی بارودۆخێكی نا ئاسایی .
لە كوردستان و عێراقیشدا هیچ یاسا و ڕێكەوتنێكی سیاسی و ئەمنی نیە كە دەسەڵات بدات بە حزبێكی سیاسی كە بێ گەڕانەوە بۆ یاسا مامەڵە بە زیندانكراوان بكات. لە هەمان كاتیشدا لە هیچ سیستمێكی سیاسی دیموكراسی ڕێگە بەوە نەدراوە كە لایەنێك كە ئەركی جێ بەجێ كردنی بڕیارە، زیادەڕۆیی لە دەسەڵاتەكانی بكات و لە جێ ی دەسەڵاتی دادوەری یەوە بڕیار بدات و بەبێ هیچ پاساوێك مافی یەكلایكردنەوەی كەیسە یاساییەكان بۆخۆی بگەڕێنێتەوە.
بەپێ ی ڕاگەیاندراوێكی وەزارەتی ناوخۆی هەرێمی كوردستان، لەم پرسەدا دەسەڵاتدارانی سلێمانی بۆ بڕیاردان لەسەر ئەم كەیسە نە گەراونەتەوە بۆ حكومەتی هەڕێمی كوردستان، نە حكومەت و نە لایەنی پەیوەنداریش چ زانیاریێكیان لەسەر ئەم تۆمەتبارانە هەیە.
بۆیە بەخشینی ڕەوایەتی یاسایی و سیاسیی بەم كەیسە تەنها هەقیقەتی ئەوەمان بۆ ڕوون دەكاتەوە، كە گروپێكی دیاری حزبێكی سیاسی لە كوردستان لە كاتێكدا كە ئەركی پاراستنی ئاسایشی نەتەوەییان خستۆتە ئەستۆی خۆیان، كەچی خۆیان مەترسی و هەڕەشەن لەسەر ئاسایشی نەتەوەییمان، لە كاتێكدا كە لە پڕێكدا بوون بە روخساریی سیاسەتکردنێکی نوێ كەچی دەیانەوێ لە سەرووی یاسا و دەسەڵاتە دادوەرییەكانی هەرێم بن. بڕیار و دەسەڵاتەكانیان بخەنە ئەمری واقع و فەرزی بكەن. پرسی سەرەکییان دروست كردنی ھەیمەنەیە بە زەبری هێز و فشار لە گۆرەپانی سیاسیدا، جگە لەوەی لە یەكلایكردنەوەی پرسە نەتەوەییەكان و ئاراستەكردنی هاوكێشە سیاسیەكان تەواو ئەزموونێكی شکست خواردوویان هەیە ، ڕۆڵێکی سیاسیی تەواو ترسناکیش دەگێڕن.
ئەم مۆدێلە حوكمڕانیە، هی ڕەوتێكە و زیاتر حاڵەتێكی زاتیشە، كە ئەستەمە هەنگاوێكی پێكەوەهەڵكردنێكی ئازادانە و راستگۆیانە بنێن بۆ پێكه‌وه‌ هه‌نگاونان و پێكه‌وه‌ به‌ره‌و پێش بردنی ئەزموونی حوكمڕانی لە هەرێمی كوردستان.....ئەمە نە سیاسەتە نە حوكمڕانی، بەڵكو تەنها تۆماركردنی لاپەرەیەكی ترە لە مێژووێكی ڕەش.