لە ڕوونكردنەوەیەكیدا بۆ دەسپێكی كتێبەكەی خۆی كە لە ژێر ناوونیشانی((ئیرادەی هێز)) بوو؛ سەبارەت بە نیهلیستیەت (نیچە) دەڵێت((ئەمە بۆ خۆی بارودۆخێكی قەیراناویيە، مرۆڤ تێیدا بەرەو جێیەكی نادیار غلۆر دەبێتەوە، دواجار لە دەرەوەی چەقی بەهای باڵا خۆی دەبینێتەوە.))
(هایدگەر) هاوشێوەی وتەزاكەی (نیچە) بۆچوونێكی هەیە، بە لای ئەمیشەوە (نیهلیستیەت) واتا لە ناو وەهمەكانی (گۆڕانكاری)دا بزربوون و گومڕابوون، یان خرف بوونێك لە ناو گێژاوی ئەو هەواڵانەی كە بریتین لە كۆمەڵێك واتە واتی درۆزنانەی ڕۆژانە كە ((لە وتارێكی ترمدا ناوم لێ نابوون -فەیكەهەواڵ..))
لە هەناوی ئەو كەسە لووتبەرزانەی هەمیشە بە مەعریفەی سادەو ڕووكەشەوە دەنازێن؛ كۆمەڵێك وەهمی كەڵەكەبوو هەن، ئەمانە هەر هەموویان؛ لە بەرانبەر ڕەقیی و توندی و بەستەڵەكیی ناو هەناوی(بوون)ێكدان كە كۆمپرۆمایزو نەرمی و ژیاندۆستی تێیدا فەرامۆشە..
بە لای (نیچە)وە هەر داڕمانێك لە (بەهای باڵا)دا، بە واتای نیهلیستیەت...
گرفتی بونیادیی لەو كاتەوە دەست پێدەكات كە لە ساتەوەختی قەیرانێكدا كەسانێك بێن و بە ناوی (بێلایەنی و ڕووناكبیری)ەوە خۆیان بخەنە ناو شەپۆلی (ناڕەزایی خەڵك)ەوە و خۆیان لێ ببێتە(فریشتە یان فریادڕەس)، دەرئەنجام هەر ئەم خۆ بە قەدیس زانانەن دەبنە كێچ و ئەسپێی سەر ئەو پێستە بریندارەی جەستەی كۆمەڵگە، هەر خۆیانن دەبنە خوێنخۆری ئازارەكان، هەر ئەوانیشن قەبارەی موعاناتەكان قەبەتر دەكەنەوە..
پێشتر كۆمەڵگەی كوردستانیی لە شۆڕشەكانیدا لە پێناوی ڕزگاریی یەكجارەكیدا تێدەكۆشان، تێكۆشانێك تا لە بندەستێتی داگیركارانی خاك و نیشتمان قوتاریان بكات، ئا بەو شێوەیە بە گیانبەخشینی پێشمەرگەكانی كوردستانەوە (بەهای باڵا)یان دەخوڵقان..
بە دەر لەو گیانبەخشینانە، گەر هەر جووڵانەوەیەكی بەڕەڵڵا، بە بیانووی نەگونجانی (بەهای باڵا) لەگەڵ ڕۆحی ئێستای سەردەمدا سەرهەڵبدا، یان هەر هەوڵێك بۆ گۆڕانكاری لە سیستم و بونیادی كۆمەڵگەی كوردستانیی هەبێت كە ئامانج تێیدا لادان بێت لە بەهای باڵا، یان جووڵاندنەوەی هەر پەنجەیەك بە مەبەستی سڕینەوەی چەمكی بەهای باڵا لە ئارادا هەبێت ((بەر لە گەیشتن بە خەونە لە مێژینەییەكەی شۆڕشەكانی كورد كە سەربەخۆیی و دەوڵەتداریی بوونە))
ئەو جووڵانەوەیە یان ئەو هەوڵە تێكڕایی كوردستانمان لێ دەكاتە مۆڵگەی نیهلیستیەت و زۆنێكی خۆڵەمێشی، لەو جۆرە مۆڵگانەدا هیچ كەسێك حیساب بۆ دەزگا و دامەزراوە مەدەنیەكانی كۆمەڵگەكەی ناكات، لە ژێر گوشاری نیهلیستیەتەوە بەرەڵڵایی و بێسەروبەری دروست دەبێت.
هەندێك لە زانایان ئەم دۆخە بە دۆخی (هۆبز)ی ناو دەهێنن، ئیتر ڕەوشەكە وا دەشێوێ، خودی ئەو جەماوەرەی بە وەدەرنانی (بەهای باڵا)وە فریو دەدرێن، لە ئەنجامدا حوكمی ئاسنینی یاسایان پێ ئەهوەنتر دەبێ لە ئازادییەكی بێسەروبەر و بەرەڵڵایانە((ساڵانێكە لەگەڵ زۆر لەو كەسایەتیانەی لە بەهاری عەرەبیدا ئەكتیڤ بوون برادەرم، ئێستا لە ئەوروپا دەژین و مافی پەناهەندەییان پێ دراوە و لەم بۆچوونەمدا هاوڕامن..))
بە لای هایدگەرەوە ئەگەر (بوون) نەبووبێتە (بەهای باڵا)، (ژیان) ژەنگی نیهلیستیەت لە خۆ دەگرێت، چەند ساڵێكە لە كوردستان بكەرە باڵاكانی ئانارشیزمیەت، بە فرتو فێڵەوە پاڵ بە خەڵكی سادەوە دەنێن تا ملی (بەهای باڵا) بشكێنن، ڕاستەوخۆ لە ڕاگەیاندنەكانی ئەم بكەرانەوە لە پێناوی نهلیستیەتدا وتەبێژ و چالاكوان و هەڵسوڕاویان كێلە قەبر بۆ بەهای باڵا دەچەقێنن، لە لایەن گرووپ و ڕێكخراوی توندڕەوانەی سیاسییەوە((كە لە بنەڕەتەوە بۆ جڵەوگیربوونی پۆست و دەسەڵات گرتنەدەست دروست بوون...)) هەوڵی تیرۆر كردنی بەهای باڵا دەدەن..
هەرچەندە حاڵی حازر بەهۆی فرە ڕەنگی و فرە دەنگی لە بۆچوون و بیركردنەوەكاندا ئەم نیهلیستیەتە بە دوا ترۆپكی خۆی نەگەیشتووە، بەڵام گەر نیچەییانە لێی بڕوانین: دەشێت بەم حاڵەی ئێستاوە لە كوردستاندا نیهلیستیەت پێشبینیكراو بێت، دەشێت چاوەڕوانی دەركەوتنی ماكی داڕزانی بەهاكان بین، ئاكام هەموو ئەو هزرە میتافیزیكیانەی كە هەر یەكەیان بە شێوەیەك لە شێوەكان ناوەندەكانی ڕاگەیاندن و سۆشیال میدیا دەجووڵێنن، بەشێك لە كۆمەڵگە فڕێ دەدەنە بەردەم واژەی نیهلیستیەتەوە..
نیهلیستیەت ئەو پەڕە سپییەیە كە دەخرێتە پێش چاوی خەڵك و ئینجا لەبەر ئەوەی بە ماسكی میتافیزیكەوە چاوەكان دەبەستێتەوە، ئیتر سەرتاپای لاپەڕەكان بە خەتخەتۆكەی هەڕەمەكیانە بە خەڵكی پڕدەكاتەوە، تەنیا ئومێدێك بۆ دوورخستنەوەی كۆمەڵگەی كوردی لەم نیهلیستیەتە، بریتیە لە زیندووكردنەوەی چێژ و چەشەی ژیاندۆستانەی ناو زەینی تاكەكانی كۆمەڵگە، ئەو چێژ و چەشەیە لە ناو ڕۆحی ئەو خانەوادانەی بۆ بەهای باڵای نیشتمانپارێزیی قوربانیدەر بوون و قوربانیدان وەك خەسڵەتێك بووەتە بەشێك لە جیناتی نەوەكانی پاشە خۆیشیان، ئەمەش بۆ خۆی ئومێدێكە..
كاتی خۆی لە كۆمەڵگەی خۆرئاواییدا، بیرمەندێكی وەك (ڤاتیمۆ) دركی بە هەڕەشە و مەترسیەكی زەقی وەها كردبوو..
ئەویش پێی وا بوو كە هەر كاتێك كۆمەڵگە لە چوارچێوەی بەدیهاتنی (خواستی ڕاستەقینەیان بۆ ئازادی) وەلابنرێن و تەنیا بە دەوری (ڕۆحی ڕەهای هیگڵیەت) بخولێنەوە، ئیتر لێدوان لەسەر مەرگی هونەر و وێژە و سیاسەت دێتە ئاراوە..
ئایا لە ناو كۆمەڵگەی ئێمەدا، شتێك هەیە پێی بوترێت مەرگی هونەر، یان مەرگی شیعر و ژانرەكانیی تری ئەدەب، یان مەرگی سیاسەت..؟؟؟!!
لە وەڵامی ئەم پرسیارەدا دەشێ بڵێین: بەڵێ زەینیەت و دەستی هاندەرانێك هەن و لە هەوڵی بەردەوامیشدان هەتا وەكو تاكەكانی كۆمەڵگەی كوردستانی وا ڕابهێنن تەنیا و تەنیا تەماشای پاشماوە و جێكەوتەی میتافیزیك بكەن، دواجار واقیعبینانە ئاسۆ و پانتایی بەرهەمی هونەری و وێژەیی و سیاسیی نەبینن، ئێستا پارە و توانا و پلانی ورد هەن تا لەو شێوە ژانرانە دەرخواردی تاكەكانی ناو كۆمەڵ بدرێت كە تەنیا چێژەكەیان لە زەینی كینەلەدڵداندایە.
دەربڕینی (ڕق) دەقاودەق هاوشێوەی ئەو واقیعە كۆمەڵایەتیە ڕۆژانەیەیە كە لە (كۆنەست)دا دەشێوێنرێت..
ژانری كینەلەدڵان بە پێی خەسڵەت و شێوازی نووسینیان، بە ڕادەیەكی كەم تا زۆر لەگەڵ پەیامی ئەو شۆڕشانەی خوڵقێنەری (بەهای باڵا)ن دژكار و ناجۆرن، گەر ژەهری ئەم ژانرە پاشماوەیەك لە بنەچە و دەلالەتی ئایدیۆلۆژی و فیكریشی لێ بەرهەم بهێنرێت، دواجار بە تۆباوییانەوە واقیعەكە ڕاڤە دەكاتەوە، هەر كاتێك فۆرم و ناوەڕۆكی ژانرەكان بە كەشوهەوای ئەو ڕووداوانەی كە لە فەوزادا پێكهێنەری سنوورێكی ئەنتۆلۆژی و مێژوویی دۆگمان تێكەڵ بكرێن، سنوورەكەش بریتی بێت لە بە ئەنقەست ئاڵۆزكردنی گێڕانەوەی ڕووداوە مێژوویی و ــ كەلتوورییەكان یان شێواندنی ئەو شێواز و ناوەڕۆكانەی پێوەیانەوە تایبەتمەندن، لەم كاتەدا مەرگی هونەر و وێژە و سیاسەت لە كۆمەڵگەدا حەتمی دەبێت، ئێستا زۆربەی ژانرەكان بە پەیامێكی تۆباوی یان دێزاویی بارگاوین، بە شێوەیەك چیتر لە ناو زەین و ڕۆحی تاكەكاندا، هونەرو وێژە و سیاسەت دیاردەیەكی جۆرایەتی فرەڕەنگ نین، ئیستاتیكا و ئومێد تێیاندا سڕدراوەتەوە، ئێستا خیتابێكی سەرپێیی و گشتیكراو دەیەوێت هەمووان بە یەك جۆر جووڵەوە بجووڵێنێتەوە..
ئەوەی ئێستا لە واقیعدا دەگوزەرێت، بریتیە لە تێكشكاندنەكانی ئاخافتن، تەنانەت یادەوەری كەسایەتیەكان بە تایپی مەرگدۆستیی دەسكاری دەكرێنەوە(بە نموونەی نزیكیش دیداری تەمەنی سەركردەیەك كە خۆی هێشتا لەسەرە مەرگدا بوو كەچی بە ئارەزووی كەسانی قینلەدڵ یادەكانی دەسكاری كران و بڵاوكرانەوە).
ئێستا لە هەموو كات زیاتر وزەیەكی داهێنەرانە پێویستە، تا ئەدیبان و هونەرمەندان و ئەو كەسانەشی كە شتێك لە زانستی سیاسەت شارەزان، لەم خڵت و خۆڵە پاكژی بكەنەوە و، بە شێوەیەكی واقیعیانە هێڵەكانی بكێشنەوە..
پێشتر لە كوردستان هەرگیز ئەدەب و هونەر خۆیان بەو سیمایەوە پیشان نەداوە كە میتافیزیك پێیانی دەبەخشی، ئێستاش لە هەموو كات زیاتر پێویستمان بە كردەی هەڵكۆڵین و تێڕامانە، (هایدگەر) جەختی لەسەر كردەیەكی هاوشێوەی ئەمەی دەیڵێم كردۆتەوە، لەم بارەیەوە هونەرمەندان و ئەدیبان دەتوانن نووسین و بڵاوكردنەوەی بەرهەمەكانی ئەمڕۆی ناوەندەكانی هونەر و ئەدەب هایدگەریانە تەكریس بكەنەوە، بە شێوەیەكی وا كە چیتر پێویست بەوە نەكات بەو تۆباویەتەی لە بن ڕستە پێدراوەكانی سۆشیال میدیا شاردراونەتەوە هەڵوێستێكی سۆفیانەی تێڕامانكاری پەتی وەربگرن..
لە پێناوی ئەوەی ژانرەكان لە نیهلیستیەتدا نەمێننەوە، باشتر وایە وتە و كرداری ئەفرێنەرانە بۆ یادەوەری ژیاندۆستی بگێڕدرێتەوە، هەواڵ و ڕیپۆرتاژە سیاسیەكانی كەناڵە ئاسمانیەكان بۆ ڕەخنەی بونیادگەر و گێڕانەوەی حەقیقەتی ئەو تێكۆشانە بگۆڕدرێن كە ڕۆژانێك لە پێناوی مان و ژیانی سەربەرزانەدا، بەهای باڵایان بۆ نەتەوەی كورد دەخوڵقان..