ئەو بەهەشتا بۆتە نەبیت ، بهێلە خەلک تێدا یێ بەختەوەر بیت
غیاس خالد زێباری
ئەڤە لسەر وان کەسان دهێت ئەوێن د ژیانەکا نەخۆش و بەر تەنگدا کۆ تێدا بێ ئۆمێد بووین ، و خۆ ل خەلکەکی ناپارێزن و دڤێت ژیانا خەلکەکێ دی ژی وەک یا خۆ لێ بکەت ..!
ئەڤە نە ڕامانا هندێ یە کۆ تمامیا جڤاکێ کوردی بڤی ڕەنگی نە ، بەلکی ڕێژەیەکا زۆر زۆرا کێمە ، ئەز باوەرم ل زۆربەی جڤاکێن دیتر ژی خودان ئەڤ ڕەوشت و سەرەدەری هەنە .
پشتی سەرهەلدان و بەرفرهـبوونا ڤایرۆسا کۆرۆنایێ ل پڕانیا وەڵاتێن جیهانی و بوویە پەتایەکا جیهانی و مەترسی لسەر مرۆڤایەتیێ درۆست کریە و هەتا نهۆ ڤاکسین و چارەسەری بۆ نەهاتیە دیتن ..!
باشترین چارەسەری خۆ پاراستن و دەرنەکەفتن و تێکەلی نەکرن و ژێک ڤاڤارتنا کەسێن گۆمان لێکریە ل خەلکی .
ب مخابنیڤە ئەڤ ڤایرۆسە گەهشتیە هەرێما کوردستانێ و ژمارەکا خەلکی تۆشبوونە ، لێ جهێ دلخۆشیێ ئەوە حکومەتا هەرێما کورستانێ و سازیێن ساخلەمیێ هەر زوو پاراستنا بەرژەوەند و ساخلەمیا خەلکی لپێش هەمی بەرژەوەندا دانا و رێکارێن تۆند گرتنە بەر و بریار و رێنمایی یێن گرنگ دەرکرن و خەلکەکێ زۆرێ گۆمان لێکری بتایبەت ئەوێن ل وەڵاتێن دیتر دزڤرن هاتنە ژێک ڤاڤارتن ( گڕەنتینکرن ) ،
ئەڤ ڕێکار و بریارێن حکومەتێ بوونە فاکتەرێن تەشەنە نەکرنا ڤێ پەتایێ ل هەرێما کوردستانێ و بەڕاوورد لگەل وەڵاتێن مەزن و خودان سیستەمێن پێشکەفتی یێن ساخلەمی ڕەوشا کوردتانێ زۆر باشترە و ناهێتە بەڕاوورد کرن .
چونکی ل هندەک وەڵاتان رۆژانە بسەدان کەن یێن دمرن .
ئەڤە ژی سەرکەفتنەکا مەزنە بۆ هەرێما کوردستانێ و سیستەمێ وێ یێ ساخلەمی ، لێ رۆلێ خەلکێ کوردستانێ ژی ناهێتە ژبیر کرن کۆ بڕەنگەکێ باش و بەرفرەهــ بڕیار و ڕاسپاردێن حکومەتێ بجهــ ئینان .
لێ هندەک جاران ل تۆڕێن جڤاکی بەحس دهێتە کرن کۆ بریارا ژێک ڤاڤارتنا خەلکەکێ گۆمان لێکری و لدەرڤەر وەڵاتێ دزڤرن ب تمامی لسەر بەرپرسان یان کەسێن خودان پێگەهێن جڤاکی وەکی پێتڤی ناهێتە بجهــ ئینان ...!
بەراهیێ دەست خۆشیێ دەسهلاتداریا هەرێما کوردستانێ و سازیێن ساخلەمی دکەین کۆ بەرۆڤاژی هندەک وەڵاتێن جیهاتی بۆ بەرهنگاربوونا ڤایرۆسا کۆرۆنایێ بەرژەوەندێن خەلکێ کوردستانێ لبەرژەوەندێن حکومەتێ و سەرمایەداران فەرتر و بلندتر کر ،
لێ پێتڤی یە خەمساری و جوداهی دناڤبەرا خەلکێ گۆمان لێکری نەهێتە کرن و قەبۆلکرن ، چونکی خەمساریا دڤێ ڕەوشێ دا دێ کارتێکرنێن نەرینیێن مەزن لسەر جڤاکێ کوردستانێ کەت .
دبێژینە وی خەلکێ گۆمان لێکری و ئەوێن ل وان وەڵاتان دزڤڕن یێن کۆرۆنا لێ هەی ، بۆ پاراستنا ساخلەمیا خۆ و ماڵبات و جڤاکێ خۆ ، ئەگەر رێنمایی یێن حکومەتێ ژی نەبن ، وەکێ ئەرکەکێ مرۆڤایەتی و نشتیمانی و ئایینی ، لسەر تە پێتڤی یە حکومەتێ و سازیێن پەیوەندیدار ئاگادار بکەی و خۆ ل جڤاکێ ڤاڤێری و جودا بکەی هەتا کۆ بتەمامی دهێیە پشتراستکرن ،
چونکێ بەرۆڤای دبیت تۆ ببییە ئەگەرێ گەهاندنا ڤێ ڤایرۆسێ بۆ تمامیا جڤاکی ژ وانا خێزان و ماڵباتا تە ، چونکێ ئەڤ بەڵاڤبوونا وێ ل پڕانیا وەڵاتێن جیهانێ ل کەسەک بوویە ..!
ئەز باوەر ناکەم ئەڤ ڕەنگە کەسە ل کوردستانێ هەبن و حکومەت ژی قەبۆل بکەت ، لێ کەسێ تۆشبوویی ژی نابیت وە هزر بکەت ئیدی ژیانا وی ب دۆماهی هات و د خەما خەلکی ژی دا نیە ..!
هەر وەکی دبێژن ئەو بەهەشتا بۆ من نەبیت بلا کەر تێدا بزڕن ..!
چونکی پڕانیا خەلکێ ڤەگرتی ساخلەم دبنەڤە و ب ئاسایی دزڤرنەڤ ناڤ ماڵبات و جڤاکێ خوو ، ئەگەر بۆ دەمێ چەند ڕۆژەکان بهێیە ڤاڤارتن ( گرەنتینکرن ) یان بکەڤیە د خەستەخانێ دا بلا د ووڕە بلند بن و ساخلەمیا ماڵبات و جڤاکێ خۆ لبەرچاڤ بگرن بلا خۆڕاگر بن .
وە هزر بکە خودێ نەکەت ئەگەر ژیان لتە تاری و بەرتەنگ بوو و تۆ د ژیانێ ژی دا نەمای بلا ژیانا خەلکێ تە و نفشێ داهاتی نەکەڤیتە د مەترسیێ دا و ژیان بۆ وان بەهەشت بیت و نەبیتە دووزەخ .
سازیێن پەیوەندیدارێن حکومەتێ ژی پێتڤی یە ب چاڤێ وەک هەڤیێ سەرەدەریێ لگەل تەڤایا جڤاکی بکەت و ئەگەر پێتڤی بیت رێکارێن توند تر ژی بهێتە گرتن .
چالاکڤانێن سوشیال میدیایێ و کەسێن بکار دئینن و سازیێن ڕاگەهاندنێ ژی پێتڤی یە زۆر دهشیار بن و پەیامێن نە ڕاست و بێ بنەما و ژێدەرێن فەرمی بەڵاڤ نەکەن .
بلا کوردستانێ پیرۆز ببینین و هەول بدەین بکەینە بەهەشت چ بوو مە بیت یان نفشێن داهاتی .
