ڕەنگە تانکەرا نەفتێ و کامیرە دوو تشتێن ژێک جودا بن ، لێ ل هەرێما کوردستانێ دووراتی دناڤبەرا واندا نەهێلایە و هاتینە پێکڤە گرێدان .
لڤی سەردەمی چافکێ کامیرێ باشترین هێزا چاڤدێریێ و پارێزڤانیێ یە و بوویە پێتڤیەکا سەردەمانە .
لدەمێ دابەشکرنا ( گازا سپی ) من دیت کۆ کامیرەیا ب پیڤەرا یا هاتیە گرێدان و ئەڤە ئێکەمین جارە ڤێ دیاردێ ل هەرێما کوردستانێ دبینم و کار و بریارەکا هەرە باشە ، لێ ژلایێ جڤاکی گرێدانا کامیرا چاڤدێریێ ب پیڤەرا تانکەرا نەفتێ نیشانێ نەساخلەمیا جڤاکێ کورستانێ و نەبوونا باوەریێ یە دناڤبەرا ( کۆمپانیێن بازرگانی و خەلکی ) و ( حکومەتێ و کۆمپانیا ) و ( خەلکی و حکومەتێ) .
ب ڕامانەکا دیکە دزی و گەندەلی گەهشتیە ئاستێن خوارێ ، ئانکۆ باوەری ب دەسهەڵاتدارێن هەرە کێم ژی نەهێت مینا شوفێرێ تانکەرا نەفتێ یان نوونەرێ کۆمپانیایێ کۆ چ پلەیێن بەرپرسیاریێ نینە .
دێ شێین بێژین نەباوەری و گەندەڵی بوویە دیاردەکا جڤاکی ل هەرێما کوردستانێ ، کچکە و مەزن ، پلەدار و بێ پلە کەفتینەدناڤ ڤێ گۆمێ دا .
ژلایەکێ دیتر ئەڤە نیشانێ هندێ یە حکومەتا هەرێما کوردستانێ هەست بڤێ چەندێ کریە ، لەوما ئەڤ کابینا حکومەتا هەرێما کوردستانێ بەرهنگاربوون و راوەستاندنا وێ کریە بەرنامە و کارناما خۆ و گاڤێن پڕاکتیکی بەرامبەر هاڤێتینە .
لێ دەمێ من کامیرا چاڤدێریێ ب تانکەرا نەفتێڤە دیتی ، من هەست ب شەرمزاریێ کر ، چونکی مخابنە جڤاکێ ساخلەم و دادوەر و ڕاست گۆیێ کوردستانێ بگەهیتە ڤی ئاستی ...!
ئەڤەژی نە گۆنەها خەلکی و جڤاکی یە ، بەلکی گۆنەها دەسهەڵاتێ و حکومەتێ و بەرپرس و حزبێن کوردستانێ یە ، کۆ ڕەوش گەهاندیە ڤی ئاستی و زوی رێگری ل دز و گەندەڵ و گەندەڵیێ نەگرت ، بەلکی ئەو بوونە پشکەکا سەرەکی ل بەردەمیدان و تەشەنەکرنا ڤێ ڤایرۆسا کۆژەک . هەتا گەهشتیە ئاستێ دروست بوونا نەباوەریەکا مەزن دناڤبەرا دەسهەڵاتێ و جەماوەری و خەلکی بەرپرسان . دەسهەڵاتا دادوەریێ ژی نەخاسمە داواکاریا گشتی پشکەکا گونەها وێ هەلدگریت ، چونکی هەتا نهو نەشیایە ب دروستی ب ئەرکێ خۆ ڕاببیت و بەڕەڤانیێ ل مافێن گشتی بکەت ، ژ وانا بەرهنگاربوونا گەندەل و گەندەلکاران ، کۆ سەروەت و سامانێ گشتی و نشتیمانی ب هەدەر دایە ، یان بۆ بەرژەوەندێن تایبەت ب کارئینانە . ئەگەر هندەک گاڤ ژی هاڤێتبن د ڤەشارتی بوونە و جهێ ڕەزامەندیا خەلکی نینە .
رێگری و چارەسەریا وێ ژی ، دەمەکێ درێژ و ووڕ و وێرەکیەکا نشتیمایانە پیدڤێت .
نەک چارەسەریێن دەمکی و ئێش شکێن بەلکێ چارەسەریێن بنەڕەتی یێن نەهێلانا ڤێ ئێشێ ب ڕهــ و ریشال ڤە .
ئەز باوەرم پڕانیا خەلکێ دلسۆز و نشتیمان پەڕوەرێ کوردستانێ باوەریەکا موکۆم ب سەرۆک وەزیرێ نهۆ ( مەسروور بارزانی ) هەیە ب ڕاگرتن و بەهنگاربوونا گەندەل و گەندەلکارا موعجیزەکا مەزن ئەنجام بدەت و بێ ئۆمێدیا خەلکێ کوردستانێ بەرامبەر ڤێ دیاردێ بکەتە ئۆمێدەکا گەش و باوەریا خەلکێ کوردستانێ ب دەسهەلاتێ بزڤرینتەڤە و گاڤێن جەنابێ وی یێن بەرهنگاروونا گەندەلیێ و سەروەریکرنا یاسایێ و دادوەریا جڤاکی لسەر ئاستێ جیهانێ دەنگ ڤەبدەن . چونکی لسەر ئاستێ جەماوەری پشتەڤانی و پشتگیریەکا زۆر هەیە ، هەر وەسا لسەر ئاستێ سیاسی و حزبی ژی دیسان مەزنترین پشتەڤان لێ دهێتە کرن ، ئەو ژی پارتی دیموکراتی کوردستانە . لسەر ئاستی کەسایەتی ژی پێگەهەکێ مەزن و تایبەت هەیە .
ئەڤە هەمی فاکتەرن کۆ سەرۆکێ حکومەتا هەرێما کوردستانێ ( مەسروور بارزانی ) بشێت بریار و کارناما خۆ بجهــ بینیت و چ کەس و لایەن نەشێن هەڤدژیێ لێ بکەن و بریار و ڕاسپاردێن جەنابێ وی دێ بنە کامیرێن چاڤدێریێ و هەمی خەلک بەرپرس و نەبەرپرس ، بازرگان و جوتیار ، فەرمانبەر و کاسبکار ، دێ خۆ لێ پارێزن .