دڤان سالاندا جار جار ژمارەکا زۆر خەلکێ عیراقێ ل بەغدا یا پایتەخت و چەندین پارێزگەھان نەخاسمە پارێزگەھێن باشوورێ عیراقێ ژبوی گەھاندنا خزمەتێن گشتی و ئەنجامدانا چاکسازیا و دژبەریا گەندەڵی و گەندەلکاران خۆ نیشندانێن جەماوەری ئەنجام داینە و زۆر جاران ھندەک لایەنێن سیاسی یێن عیراقێ ئەڤ خۆ نیشاندانە رێکخستنە یان پشتەڤانی لێ کریە ، لێ ئەڤ خۆنیشاندانێن دەمێ چەند ھەفتیایە ل عیراقێ دھێنە کرن جوداھی لگەل خۆنیشاندانێن بەرێ ھەنە ، ژبەکۆ خۆنیشاندانێن جەماوەریێن دووری لایەنێن سیاسی یێن عیراقی نە و ئەو لایەنێن بۆ راکێشانا سرنجا وان چووینە دناڤ خۆنیشاندانا دا ھاتینە شەرمزارکرن و دەرکرن .
ژلایێ داخازیان ژی ، ژبۆ ئەنجامدانا چاکسازیا و سزادانا گەندەلکارا و دامەزراندنێ و پرۆژێن خزمەتگۆزرای ھاتنە گۆڕین بۆ داخازیێن سیاسی و گۆرینا سیستەمێ سیاسی و ھەلوەشاندنا پەرلەمانی و حکومەتێ و .... ھتد .
ئەز نابینم ھەمی داخازیێن خەلکێ خۆنیشاندەر د ڕەوا بن و ببنە ئەگەرێ پێشڤەبرنا رەوشا سیاسی و کارگێریا عیراقێ و خۆشترکرنا رەوشا ئابووری و جڤاکیا خەلکی . چونکی سیستەم و دەستوورێ عیراقێ لسەر بنەمایێ دیموکراسی و فیدالی و لامەرکەزی نە ، ئەڤەژی دەرفەتەکا مەزنە بۆ چەسپاندا دادوەریێ و خۆشکرنا ژین و ژیارا خەلکێ عیراقێ و پێشڤەبرنا وەلاتی ژلایێ جڤاکی و ئاڤەدانی و ئێمناھیێ ، لێ ئاریشە ل بجە نەئینانا دەستووری و بنەمایێن سیستەمێ عیراقێ و یاسایا نە .
لێ دەسھەلاتدارێن عیراقێ یێن پشتی سالا ٢٠٠٣ بتایبەت حکومەتێن سالا ٢٠٠٥ ھەتا نھو نەشیایە ببنە حکومەتێ، خەلکی و پتر بەرژەوەنێن حزبێن خۆ دابین کرینە و پاراستینە و پشتەکان زۆرا سەروەت و سامانێ عیراقا زەنگین ب ھەدەر داینە و دەستێن پرانیا وان ب گەندەلیا دارایی و ئیداری پیس بووینە ، لدیف راپورتەکا ل کەناڵێن راگەھاندنێ ھاتیە نیشاندان سالا ٢٠٠٥ ھەتا نھو (٤٥٠ ) ملیار دوولار ب گەندەڵی ھاتینە بھەدەردان ، ئەڤەی کارەساتەکا مەزنە .
ئەڤەژی ھەمی لسەر دەستێ کابینێن بەری ڤێ حکومەتا بسەرۆکاتیا عادل عەبدولمەھی بووینە و ئەڤ کابینە نەشێن گەندەلی و نەدادوەریا چاردە سالێن بوویە بن بڕ کەت ، پێتڤی بۆ خەلکێ عیراقێ پشتەڤانیا عادل عەبدولمەھدی کربا بۆ سزادان و دادگەھکرنا دەسھەلدارێن بەری وی ، نەک بڤی ئاوایی دژی ڤێ کابینێ راوەستا بانە ، چونکی گۆرینا سیستەم و دەستوور و ڤێ کابینێ رەوشا خەلکێ عیراقێ چارەسەر ناکەت بەرلکێ دێ بەرەڤ ئاریشەیێن مەزنتر بەت و دوور نینە ل سیستەمێ فیدرالی و دیموکراسی بەرەڤ تاکرَەویێ و دکاتۆریێ بچیت ، چونکی ب ھەر گۆرانکاریەکێ دەسھەلاتدارێن عیراقێ دێ ل عادل عەبولمەھی میانرەوتر و مەمخۆرترن نابن ، رەنگی ئەو سەرکردێن عیراقێ یێن دژایەتیا ڤێ کابینا حکومەتا عیراقێ دکەن ھەر بۆ وێ مەرەمێ بیت و خەونا ب دەسھەلاتداریا عیراقەکا مەرکەزی و نەدیموکراسی ببینن .
داخازیێن دیتر یێن گەھاندنا خزمەتگۆزاریا و دادوەریێ و گرتن و رێگریکرنا گەندەلیێ و گەندەلکارا و دامەزراندنێ و ئاڤەدانیێ داخازیێن ڕەوانە و پێتڤی یە برەنگەکێ ئاشتیانە بەردەوام دەنگێ خۆ بگەھینن .
ئەم کورد ژی ب خەلک و دەسھەلاتڤە پێتڤی یە پەندا لڤێ رەوشا عیراقێ وەربگرین و حکومەتا مە ب سەرۆکاتیا مەسروور بارزانی ئەو حکومەتا ھیڤیێن دادوەریێ و خزمەتێن باشتر و چاکسازیێن کارگێری و ئابووری و دارایی و دژبەریا گەندەل و گەندەکاریێ بۆ خەلکێ کوردستانێ زڤراندنی .
ئەم نابێژین کابینێن بەرێ یێن حکومەتا ھەرێما کوردستانێ خزمەتا خەلکێ خۆ نەکریە و لگەل حکومەتا عیراقێ ناھێتنە بەراوورد کرن ، چوکی رەوشا کوردستانێ ژلایێ ئێمناھیێ و ئاڤەدانیێ و بێکاریێ و دادوەریێ زۆر ل عیراقێ باشترە .
راستە ئاستێ گەندەلیا ھەرێما کوردستانێ ژی لگەل یا عیراقێ ناھێتە بەراوورد کرن ، لێ نابیت چاڤا ل وێ گەندەلی و نەدادوەریا ھەیی ب قوچینین ، چونکی ھژمارەکا دەسھەلاتدار و کاربدەست و سەرمایەداێن کوردستانێ ژی دناڤ گەندەلیێ دا نقوم بوونە و سەروەرت و سامانێ کوردستانێ بۆ بەرژەوەدێن تایبەت بھەدەر دایە و بەرپرسیاری و پێگەھێ خۆ برەنگەکێ نەداوەرانە بکارئینایە .
نەبوونا چاڤدێریێ و سزایان بەرامبەر وان پشکەکا زۆرا خەلکێ کوردستانێ تۆرە و بێزار کریە ، دەسھەلاتا ھەرێما کوردستانێ ژی ھەست بڤێ راستیێ کریە ، لەوما چەندین جاران لسەر ئاستێن بلند پرۆژێن چاکسازیا و بەرھنگاربوونا گەندەلیێ دارشتنە و گاڤێن باش بۆ ھاڤێتنە لێ ئەنجامێن پێتڤی دیار نەبوونە .
لەوما چاکسازی و دادوەری و بەرھنگاریا گەندەلیێ ژخالێن سەرەکی و بەرچاڤێن کارناما ڤێ کابینا حکومەتا ھەرێما کوردستانێ بووینە بسەرووکاتیا رێزدار مەسروور بارزانی .
دبیت ئەڤ خەلکێ تۆرە و بێزار ژلایێ ھندەک لایەنێن سیاسی و دەستێن دەرڤە بھێنە ھاندان کۆ بەرەڤ خۆنیشاندانا بچن بمەرەما چاکسازی و خزمەتێن باشتر و دامەزراندنێ ، د ڤان کاودانان دا خۆنیشاندانێن ئاشتیانەژی جھێ مەترسیێ نە ، چونکی دەستێن پیس و نەحەزێن ڤێ کابینێ و ئەزمۆنا ھەرێما کوردستانێ دێ ئاراستەیا داخازیا گووڕن و دەستێن ھەرێمی ژی ئینە دناڤ دا ، چونکی لسەر ئاستێ ھەرێمی ژی ب نەپەنی دژایەتیا ھەرێما کوردستانێ و ڤێ کابینا ھیڤیێن ژبەریا گەندەلکارا و داوەریێ ژلایێ خەلکی دروست کری ھەنە و ھندەک کەسایەتی و ئالیێن سیاسی یێن کوردستانێ ژی خەونا بوێ چەندێ دبینن ...! ھەر وەکی ئاراستە و داخازیێن خۆنیشاندەرێن عیراقێ بەرەڤ گووڕینا دەستووری و شێوازێ دەسھەلاتداریێ و ھەلوەشاندنا ڤێ کابینا حکومەتا عیراقێ برین .
پێویستە حکومەتا ھەرێما کوردستانێ ب چاکسازی و سزادانا گەندەلکارا و دادوەریێ باوەریا خەلکێ کوردستانێ ب حکومەتا خۆ موکۆمتر بکەت و پیلان و خەونێن نەیار و نەحەز و دیڤەلانکێن دوژمنا بھەلوەشینیت و بمرینیت و پلان بۆ ھەر ئەگەرەکا نەچاڤەرێکری ھەبن و پەندا ل رەوشا عیراقێ و لبنان وەربگرن . دبیت ئەڤە پێشبینیەکا دوور بیت ل راستیێ ، لێ بەرھەڤی ھەبین باشترە .