دڤان سالێن داویێ دا وەلاتێن ئەورۆپا و بتایبەت ئەندامێن ئێکەتیا ئەورۆپی ، ل سیاسەت و رەفتارێن تورکیا دلگرانن و زۆر جاران ئاستێ پەیوەندیێن ھندەک ژوان گەھشتینە نزمترین ئاست ، بتایبەت پشتی داگیرکرنا پشکەکا رۆژئاڤایا کوردستانێ و دانانا دەڤەکا ئارام ژلایێ تورکیا و کورشتن و ئاوارەبوونا خەلکەکێ زۆرێ وان دەڤەرێن تورکیا داگیر کری ب پشتەڤانیا تورکیا بۆ گرۆپێ توندڕەوێ ئۆپۆزسیۆنا تورکیا بناڤێ لەشکرێ سووریا یا ئازاد ، چونکی چەکدارێن ڤی گرۆپەی خەلکەکێ سڤیل ب درندەترین شێواز کوشتنە و ئەشکەنجەدانە . کو بووینە جھێ نەرازیبوونا ھژمارەکا وەلاتێن ئەورۆپا و رێکخستنێن مافێن مرۆڤ ، بەرامبەر نەرازیبوونا ڤان وەلات و رێکخستنا سەرۆکێ تورکیا بەردەوام گەفێن ڤەکرنا سنوورێ خۆ بەرامبەر پەنابەر و چەکدارێن تیرۆرستێن داعش بۆ ئەورۆوپا دکەت ، رەنگە ڤان گەفان ھەتا رادەیەکی ترس لسەر وان وەلاتان درۆست کربیت و ببیتە ئەگەرێ بێدەنگیا وان بەرامبەر وان ھەمی پێشێلکاریێن تورکیا .
چونکی ڤەکرنا سنوورێن تورکیا لھەمبەر پەنابەر و چەکدارێن داعش دێ مەترسیێن ئێمناھی و ئابووری و جڤاکی لسەر ئەورۆپا دروست کەن ، دڤان گەفان دا تورکیا ژ سێ لایەنان قازانج کر ،
١- کڕکرن یان کێمکرنا دەنگێ وان وەلاتان بەرامبەر پێشێلکاریێن تورکیا بەرامبەر رۆژ ئاڤایێ کوردستانێ ( باکوورێ رۆژھەلاتێ ) سووریا .
٢- بجهــ ئینانا پشکەکا مەرامێن خۆ بۆ بەرفرەھکرنا سنوورێن خۆ و داگیرکرنا پشکەکا ئاخا وەلاتەکێ خودان سەروەری و ئاکنجیکرنا خەلکەکێ لایەنگرێ خۆ ل وێ دەڤەرا داگیر کری بناڤێ دەڤەرا ئارام و گۆرینا دیموگرافیا دەڤەرێ لدیف بەرژەوەندێن خۆ .
٣- وەرگرتنا ھاوکاریا بۆ پەنابەرێن سووری ل وەلاتێن ئەورۆپا و سازی و رێکخراوێن نیڤ دەولەتی .
راستە ئەڤ سەرەدەریێن وەلاتێ تورکیا لگەل بنەمایێن نیڤ دەولەتی یێن پاراستنا سەروەری و سنوورێن وەلاتێن جیران ناگۆنجیت ، لێ پرانیا خەلکێ تورکیا و پارتیێن سیاسی یێن وەلاتێ تورکیا پشتەڤانێن ڤان گاڤێن تورکیا نە ئەڤەژی بوویە ھاندەرەک بۆ سەرۆک کۆمار و دەولەتا تورکیا بۆ بەردەوامیبوونێ .
وەکی ئەز دبینم ئێکەتیا نشتیمانیا کوردستانێ ژی ب ھندەک گەفێن بێ بنەما ھەول ددەت ھندەک مەرجێن پارتیا خۆ لسەر حکومەتا ھەرێما کوردستانێ بسەپینیت چ ب لبەردەستبوونا سازیەکا ئەمنی یان پشکەکا پێشمەرگەھێن کوردستانێ ، ھەر وەکی ئەوا پشتی راپرسیا سەرخۆبوونا ھەرێما کوردستانێ کری بەرامبەر کەرکووک و دەڤەرێن دیتر یێن کوردستانێ ل ١٦ ێ ئکتۆبەرا سالا ٢٠١٧ , نھۆ ژی پشتی دەمێ چەند رۆژایە ل بەغدا یا پایتەختێ عیراقێ و پرانیا بارێزگەھێن باشوورێ عیراقێ خۆنیشاندانێن بەرفرەھێن جەماوەری د بەرەوام داخازیێن خەلکێ عیراقێ ل چاکسازی و گەھاندنا پرۆێن خزمەتگۆزاری ، دەنگێن گۆرینا سیستەمێ سیاسی یێ عیراقێ و دەستوورێ ھەردەمیێ عیراقێ ھاتینە زێدەکرن و گڤاشتنەکا زۆر لسەر دەسھەلاتێ کریە و پەرلەمانێ عیراقێ نەچار کریە پەنایێ ببەتە بەر گۆڕینا دەستووری .
ئەڤەژی ئەگەر سەر بگریت مەترسیێ لسەر عیراقێ ب گشتی و ھەرێما کوردستانێ دکەت ، چونکی دبیت زۆر لایەنێن سیاسی یێن عیراقێ و جادا عیراقێ ، عیراقێ ل سیستەمێ پەرلەمانی و دیموکراسی و فیدرالی بکەنە سیستەمێ سەرۆکایەتی و ئەو بەندێن دەستووری یێن د بەرژەوەندا ھەرێما کوردستانێ ھەی بگۆرن مینا ماددێ ١٤٠ و نەھێلانا ھەرێما کۆ ئەڤە مژارەکا دیترە .
راستە گۆرینا دەستوورێ عیراقێ ب نەرازیبوونا زۆرینەیا خەلکێ سێ پارێزگەھان سەرناگریت ، لێ رەنگە ڤێ جارێ ژی گرۆپێ دەسھەلات دار دناڤ ئێکەتیێ دا گەفێن پشتەڤانیا گۆرینا دەستوورێ عیراقێ بکەن و بچنە بەرەیێ شوفینیێن عەرەب ، بۆ لدەست دانانا ھەوارێ ھەرێما کوردستانێ و دەسکەفتێن نشتیمانی و نەتەویێن خەلکێ کوردستانێ ل حکومەتا ھەرێما کوردستانێ و پارتی دیموکراتی کوردستان بکەن بەرامبەر ھندەک دەسکەفتێن بەرتەسکێن حزبایەتی و ماددی ...!
ژلایەکێ دیتر کڤاشتنا لسەر حکومەتا ھەرێما کوردستانێ بکەن کۆ پەنایێ نەبەنە بەر ھندەک بریار و یاسایێن گرنگ و پێتڤی یێن د بەرژەوەندا گشتی یا کوردستانێ دا وەک یاسایا چاکسایا و پێشمەرگەھی و سازیێن ئێمناھیێ و نەھێلانا چەکی ددەستێ خەلکی و حزیان دا .
لێ ئەز باوەرناکەم ئێکەتیا نشتیمانی دڤان داخازیان دا یا سەرکەفتی بیت ، چونکی بەرۆڤاژی تورکیا خەلکێ وان دەڤەرێن ئێکەتی بۆ خۆ ھژمار دکەن (سلێمانی و ھەلەبجە و گەرمیان ) د وی ئاستی دا بن پشتەڤانیا پیلانەکا بڤی رەنگی یا دژی کوردستانێ بکەن . چونکی خەلکێ ڤان دەڤەران زۆر قوربانی بۆ ئازادی و رزگاریا کوردستانێ و پاراستنا ڤێ ئەزمۆنێ داینە و مەحالە بچنە وی بەرەیێ پشکەکا دەسھەلاتدارێن دناڤ ئێکەتیێ دا , ژلایەکێ دیتر زۆر سەردێن ئێکەتیێ ژی بەرامبەر حەولەکا بڤی رەنگی ئەگەر ھەبیت ، دێ ھەلویست ھەبیت .
پێتڤی یە پەرلمان و حکومەتا ھەرێما کوردستانێ ، بزۆترین دەم گاڤێن چاکسازیێن دارایی و کارگێری بکەنە یاسا و پراکتیزەکرن و پرانیا خەلکێ کوردستانێ ئەڤە دڤێت نەک گۆڕینا دەستوورێ ھەردەمێ عیراقێ و پیلانێن پیلانگێرێن خەونێن بڤی ئاوایی دبین دێ شەرمزار کەن .