گرفتا توركیا و داگیرکەرێن کوردستانێ ئەوە، کو دخوازن کوردان چ هەبوونەکا خۆ یا سیاسی نەبیت!، ئەڤەژی هاتییە سەلماندن کو کورد هەر دێ هەبن، ئەڤجا ئەوا کو علمانی یێن تورک زێدەتر ژ هەفتێ ساڵان نەشیاین کوردان ژناڤ ببەن، سوڵتان ئەردۆگان یێ ل هویڤیێ ب سورەتا فەتح و لژێر ناڤێ "کانی یا ئاشتیێ" و ب لەشکەرێ موحەمەدی یێ وی ناڤلێنای، کوردان ل رۆژئاڤایێ کوردستانێ ب بۆمبە یێن تۆپ و فڕوکەیان، دەربئێخن و ل شونا وان عەرەبێن داعش و نوسرە و جەیش ئەلحور و خێزانێن وان و یێن وەک وان ئیخوانی و ئیسلاما سیاسی ئاکنجی بکەن.
داکو خیلافەتەکا وەکی خیلافەتا داعش ل سەر خوین و ئاخا وەڵاتێ کوردستانێ دروست بکەت.
دیسان تورکیا راست نا بێژیت دەما دبێژیت ئەڤە تیروریستە و ئەڤە دوستە، ئەگەر ژدەستێ وێ بهێت دێ ل هەر دەرەکێ کوردان لاواز کەت و ژناڤبەت، ژبەرکو "دوژمنێ باب و کالان نابیتە دوستێ لاوان"
ب دیتنا من ژی ئەڤ هەوڵە ژی دێ بیتە برایێ هەوڵێن دی یێن دەولەتێن کوردستان داگیرکری، وەکو ئەنفالێن سەدامی و خیلافەتا داعشێ و هێرشێن حەشدا شەعبی، ودێ چارەنڤیسێ پڕۆسە یا (کانی یا ئاشتیێ) یا بخوین و ئاگر کو دخوازن کوردان پێ ئاوارەبکەن، ئەوا مەلایێن تورک ب سورەتا فەتح دژی کوردان بەرپاکری، دێ ب دەردێ پڕۆسە یا ئەنفالێ چیت و سەرۆک و بەرپاکەرێن ڤێ کریارێ ژی دێ بهێنە دادگەهکرن، و مللەتێ کورد دێ ب سەرکەڤیت، چونکە شاە و سولتان و سەرۆکێن داگیرکەران گەلەک هەبوون و چوون، لێ مللەتێ کورد ژناڤ نەچوو و قەد ژ ناڤ ناچیت.
یا گرنگ ژی ئەوە هێزێن کوردستانێ ئێک بگرن و باوەڕی بخۆبوونا خۆ ب هێز بکەن و گرفت و ناکوکیان ژبیر بکەن، چونکە ئێکگرتنا مللەتی لسەر ئێکگرتنا هێزێن سیاسی ئاڤا دبیت، دیسان دڤێت دوژمنێ سپی یان سۆر یان رەش یان چ رەنگێ ل خوە بکەت، ب دۆژمن بزانین، لەوا ژی دڤێت ستراتیژ ئەو بیت کو دوژمن هەر چ رەنگ بیت هەر دوژمنە ژبۆ هەر هەموو هێز و پارچەیێن وەڵاتێ مە یێ رەنگین و گرانبها و هێڤێنا هەبوونا مە.